ການປະຊຸມຂ່າວປະຈຳເດືອນຂອງກະຊວງການຕ່າງປະເທດ
(vovworld) – ທີ່ການປະຊຸມຂ່າວປະຈຳເດືອນໂດຍກະຊວງການຕ່າງປະເທດ ຫວຽດນາມ ຈັດຕັ້ງໃນວັນທີ 4/7, ໂຄສົກກະຊວງການຕ່າງປະເທດ ຫວຽດນາມ ເລືອງແທງງີ້ ປະກາດການເຄື່ອນໄຫວຕ່າງປະເທດຈຳນວນໜຶ່ງຂອງ ຫວຽດນາມ ໃນເດືອນ 7/2013. ໜຶ່ງໃນບັນດາເຫດການການຕ່າງປະເທດທີ່ເປັນໜ້າສົນໃຈນັ້ນແມ່ນ, ໃນວັນທີ 9/7/2013, ທ່ານນາຍົກລັດຖະມົນຕີ ຫງວຽນເຕີນຢູງ ແລະ ຄູ່ຕຳແໜ່ງ ສປປ ລາວ ທອງສິງ ທຳມະວົງ ຈະເຂົ້າຮ່ວມພິທີເປີດສະຫຼອງຫຼັກໝາຍເລກທີ 460 ຢູ່ດານຊາຍແດນ ແທງຖູຍ (ແຂວງ ເງາະອານ, ຫວຽດນາມ) ແລະ ນ້ຳອອນ (ແຂວງບໍ່ແກ້ວ, ປະເທດລາວ) ແລະ ເຂົ້າຮ່ວມພິທີຊົມເຊີຍຜົນສຳເລັດຂອງວຽກງານປັກຫຼັກໝາຍຊາຍແດນທາງບົກລະຫວ່າງ ຫວຽດນາມ - ລາວ. ທ່ານ ເລືອງແທງງີ້ ເວົ້າວ່າ:
“ນີ້ແມ່ນເຫດການມີຄວາມໝາຍສຳຄັນພິເສດ, ເປັນຂີດໝາຍເລື່ອງປະຕິບັດສຳເລັດໂຄງການປັກຫຼັກໝາຍຖີ່, ບູລະນະລະບົບຫຼັກໝາຍຊາຍແດນ ຫວຽດນາມ - ລາວ, ປະກອບສ່ວນກໍ່ສ້າງຊາຍແດນສັນຕິພາບ, ມິດຕະພາບ, ສະຖຽນລະພາບ, ຮ່ວມມື, ພ້ອມກັນພັດທະນາ, ສ້າງເງື່ອນໄຂສະດວກໃຫ້ແກ່ເລື່ອງຊຸກຍູ້ການພັດທະນາເສດຖະກິດ - ສັງຄົມຢູ່ເຂດຊາຍແດນເວົ້າສະເພາະ ແລະ ພັດທະນາເສດຖະກິດຂອງ 2 ປະເທດ ເວົ້າລວມ. ເນື່ອງໃນໂອກາດນີ້, 2 ຝ່າຍຈະເຊັນຂໍ້ຕົກລົງຂັ້ນລັດຖະບານ ແກ້ໄຂບັນຫາອົບພະຍົບເສລີ ແລະ ສົມລົດໂດບບໍ່ຈົດທະບຽນໃນເຂດຊາຍແດນ ຫວຽດນາມ - ລາວ. ນີ້ແມ່ນຂໍ້ຕົກລົງທີ່ມີຄວາມໝາຍສຳຄັນ, ປະກອບສ່ວນຍົກສູງປະສິດທິຜົນການປະຕິບັດສັນຍາກ່ຽວກັບກົດລະບຽບຄຸ້ມຄອງຊາຍແດນລະຫວ່າງ 2 ປະເທດ”
ທ່ານຮອງລັດຖະມົນຕີການຕ່າງປະເທດ ລາວ ບຸນເກີດ ແສງສົມສັກ
(ພາບ: Hoàng Chương/Vietnam+)
ແລະກໍ່ໃນວັນດຽວກັນ, ຢູ່ສຳນັກງານກະຊວງການຕ່າງປະເທດ ລາວ, ທ່ານຮອງລັດຖະມົນຕີການຕ່າງປະເທດ ລາວ ບຸນເກີດ ແສງສົມສັກ ມີການພົບປະກັບສື່ມວນຊົນລາວ ແລະ ບັນດານັກຂ່າວສຳນັກຂ່າວສານ ຫວຽດນາມ ປະຈຳລາວ, ເພື່ອແຈ້ງໝາກຜົນຂອງວຽກງານປັກຫຼັກໝາຍຊາຍແດນ ຫວຽດນາມ - ລາວ. ທ່ານຮອງລັດຖະມົນຕີ ບຸນເກີດ ແສງສົມສັກ ຊີ້ແຈ້ງວ່າ:
“ຜົນສຳເລັດຂອງວຽກງານປັກຫຼັກໝາຍຊາຍແດນລະຫວ່າງ ຫວຽດນາມ ແລະ ລາວ ຄັ້ງນີ້, ມີຄວາມໝາຍ ແລະ ຄຸນຄ່າປະຫວັດສາດສຳຄັນໃນສາຍພົວພັນມິດຕະພາບ ແລະ ການຮ່ວມມືລະຫວ່າງ ຫວຽດນາມ ແລະ ລາວ, ຄຽງຄູ່ກັນນັ້ນ, ຍັງມີຄວາມໝາຍອັນໃຫຍ່ຫຼວງສຳລັບພາກພື້ນ, ຍ້ອນວ່າ ລາວ ມີຊາຍແດນລວມກັບ 4 ປະເທດ, ແຕ່ເລື່ອງປັກຫຼັກໝາຍຊາຍແດນກັບ ຫວຽດນາມ ໄດ້ເປັນແບບຢ່າງໃຫ້ແກ່ບັນດາປະເທດໃນພາກພື້ນກ່ຽວກັບຂົງເຂດນີ້, ”
ການປະຊຸມຂ່າວຍັງແຈ້ງກ່ຽວກັບເຫດການເມື່ອວັນທີ 3/7, ຫວຽດນາມ ໄດ້ສົ່ງ ຢູຣານຽມ ທີ່ໄດ້ຮັບການເສີມໃນລະດັບສູງ11 ກິໂລກຣາມ ສຸດທ້າຍຈາກສະຖາບັນຄົ້ນຄ້ວານິວເຄຼຍ ດ່າລາດ ເຖິງ ສະຫະພັນ ລັດເຊຍ. ທ່ານ ເລືອງແທງງີ້ ຊີ້ແຈ້ງວ່າ: ເຫດການນີ້, ອີກຄັ້ງໜຶ່ງຢືນຢັນນະໂຍບາຍຢ່າງສະເໝີຕົ້ນສະເໝີປາຍຂອງ ຫວຽດນາມ ໃນການພັດທະນາ ແລະ ນຳໃຊ້ພະລັງງານນິວເຄຼຍເພື່ອຈຸດປະສົງສັນຕິພາບ ແລະ ບໍ່ແຜ່ຂະຫຍາຍອາວຸດນິວເຄຼຍ. ຫວຽດນາມ ຈະສືບຕໍ່ຮ່ວມມືຢ່າງແໜ້ນແຟ້ນກັບອົງການພະລັງງານປະລະມານູສາກົນ ແລະ ປະຊາຄົມໂລກ ໃນການຮັບປະກັນຄວາມປອດໄພ ແລະ ຄວາມໝັ້ນຄົງດ້ານນິວເຄຼຍ.