ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ລົງຢ້ຽມຢາມຄອບຄົວນັກຮົບເກົ່າ ຮ່ວາງວັນໄບ
|
(vovworld) –ສະເຫຼີມສະຫຼອງ 60 ປີແຫ່ງວັນໄຊຊະນະດ້ຽນບຽນຝູ (7/5/1954-7/5/2014), ຕອນບ່າຍວັນທີ 6/5, ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ລົງຢ້ຽມຢາມນັກຮົບເກົ່າບາງຄົນ, ຊຶ່ງແມ່ນບັນດາຕົວພະຍາຫຼັກຖານ, ປະກອບສ່ວນໂດຍກົງເພື່ອສ້າງໃຫ້ມີໄຊຊະນະດ້ຽນບຽນຝູທີ່ລື່ຊາຜາກົດກ່ອນນີ້ 60 ປີເຕັມ. ທີ່ການພົບປະ, ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ຢືນຢັນວ່າ ພັກ ແລະ ລັດຍາມໃດກໍຈົດຈຳການປະກອບສ່ວນອັນໃຫຍ່ຫຼວງຂອງບັນດານັກຮົບເກົ່າ ແລະ ບັນດາກຳລັງໄດ້ ສ້າງໃຫ້ມີໄຊຊະນະດ້ຽນບຽນຝູທີ່ລື່ຊາຜາກົດ. ທ່ານປະທານປະເທດຫວຽດນາມ ເຈືອງເຕີ້ນຊາງ ຫວັງວ່າ ບັນດານັກຮົບເກົ່າສືບຕໍ່ສຶກສາອົບຮົມມູນເຊື້ອປະຕິວັດໃຫ້ຄົນລຸ່ນໜຸ່ມ ແລະ ເຊື້ອໝັ້ນວ່າ ຈິດໃຈດ້ຽນບຽນຝູ ຈະສືບຕໍ່ໄດ້ຮັບການສືບທອດຈາກລຸ່ນຄົນຕ່າງໆໃນກິດຈະການສ້າງສາ ແລະ ພັດທະນາປະເທດຊາດໃນປະຈຸບັນ.
ວັນທີ 6/5, ທີ່ແຂວງ ບິງເຢືອງ, ມະຫາວິທະຍາໄລວິທະຍາສາດສັງຄົມ ແລະ ມະນຸດຊາດນະຄອນ ໂຮ່ຈີ໋ມິນ, ມະຫາວິທະຍາໄລ ຖູເຢົ່າເລກ 1, ສະຖາບັນວິທະຍາສາດສັງຄົມເຂດພາກໃຕ້, ຫໍພິພິດທະພັນຮ່ອງຮ້ອຍສົງຄາມຈັດຕັ້ງກອງປະຊຸມສຳມະນາວິທະຍາສາດ ”ໄຊຊະນະ ດ້ຽນບຽນຝູ - ບັນດາບັນຫາປະຫວັດສາດ”, ດ້ວຍການເຂົ້າຮ່ວມຂອງນັກວິທະຍາສາດ, ນັກຄົ້ນຄວ້າ 200 ຄົນທີ່ມາຈາກບັນດາມະຫາວິທະຍາໄລ, ບັນດາສະຖາບັນຄົ້ນຄວ້າໃນທົ່ວປະເທດ. ກອງປະຊຸມສຳມະນາຢືນຢັນຂອບຂະໜາດ, ຄຸນຄ່າດ້ານປະຫວັດສາດທີ່ຍິ່ງໃຫຍ່ຂອງໄຊຊະນະ ດ້ຽນບຽນຝູ ພ້ອມກັບບັນດາຜົນທະທ້ອນ, ຜົນກະທົບ ແລະ ສື່ສຽງຮຽງນາມຂອງ ດ້ຽນບຽນຝູ - ສັນຍາ ເຊີແນວ ກ່ຽວກັບຫວຽດນາມ ທີ່ມີຕໍ່ບັນດາປະເທດ, ພາກພື້ນ, ຂະບວນການປົດປ່ອຍຊາດ.
ແລະກໍ່ໃນຕອນເຊົ້າວັນທີ 6/5, ຢູ່ ຮ່າໂນ້ຍ, ຫໍພິພິດທະພັນແມ່ຍິງ ຫວຽດນາມ ໄດ້ໄຂງານວາງສະແດງ “ຄວາມຊົງຈຳ ດ້ຽນບຽນຝູ”. ນີ້ແມ່ນການເຄື່ອນໄຫວສະເຫຼີມສະຫຼອງ 60 ປີແຫ່ງວັນໄຊຊະນະ ດ້ຽນບຽນຝູ ແລະ ຕອບສະໜອງວັນຫໍພິພິດທະພັນສາກົນ 18/5/2014, ກໍ່ຄືຮັບຮູ້ ແລະ ເຊີດຊູບັນດາການປະກອບສ່ວນຂອງແມ່ຍິງ ຫວຽດນາມ ຫຼາຍຊັ້ນຄົນໃນບັ້ນຮົບ ດ້ຽນບຽນຝູ. ທ່ານນາງ ຫງວຽນທິບິກເວີນ, ຜູ້ອຳນວຍການຫໍພິພິດທະພັນ ແມ່ຍິງ ຫວຽດນາມ, ໃຫ້ຮູ້ວ່າ:
“ພວກຂ້າພະເຈົ້າ ບໍ່ສ່ອງແສງຮູບພາບຂອງແມ່ຍິງຜູ້ຈັບປືນອອກສະໜາມຮົບ, ແຕ່ພວກຂ້າພະເຈົ້າໄດ້ສ່ອງແສງແມ່ຍິ່ງ ບັນດາຜູ້ເຄື່ອນໄຫວຢູ່ນອກສະໜາມຮົບ. ເຂົາເຈົ້າແມ່ນບັນດາຜູ້ເຮັດວຽກງານທີ່ມິດງຽບມີໜ້ອຍຄົນຮູ້ຈັກເຖິງ ແລະ ຖ້າຫາກພວກເຮົາບໍ່ສ່ອງແສງບັນດາບຸກຄົນດັ່ງກ່າວນັ້ນ, ກໍ່ຍາກທີ່ຈະມີຄວາມເຫັນຢ່າງຄົບຖ້ວນກ່ຽວກັບແມ່ຍິງ ຫວຽດນາມ ໃນບັ້ນຮົບ ດ້ຽນບຽນຝູ ປະຫວັດສາດ. ດັ່ງນັ້ນ, ພວກເຮົາສ່ອງແສງ ແມ່ຍິງຜູ້ເຂົ້າຮ່ວມການລຳລຽງທະຍາຫັນ, ອາວຸດ, ຜູ້ເບິ່ງແຍງດູແລທະຫານເສຍອົງຄະ, ຖືກບາດເຈັບ, ແມ່ຍິງຜູ້ເປັນນັກສິລະປິນຮັບໃຊ້ດ້ານສິລະປະນັ້ນແມ່ນບັນດາເລື່ອງລາວທີ່ປະທັບໃຈທີ່ສຸດ.”