ທ່ານລັດຖະມົນຕີ ຫງວຽນເຕີນຢຸງ ຕ້ອນຮັບ ຮອງນາຍົກລັດຖະມົນຕີລາວ ທອງລຸນສີສຸລິດ
ທ່ານນາຍົກລັດຖະມົນຕີ ຫງວຽນເຕີນຢຸງຕ້ອນຮັບ
ທ່ານຮອງນາຍົກລັດຖະມົນຕີລາວ ທອງລຸນ ສີສຸລິດ
( ພາບ: cpv.org.vn )
|
( vovworld ) - ຕອນບ່າຍວັນທີ 16/3, ຢູ່ສຳນັກງານລັດຖະບານທີ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢຸງ ໃຫ້ການຕ້ອນຮັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດລາວ ທອງລຸນ ສີສຸລິດ ທີ່ພວມຢູ່ຢ້ຽມຢາມຫວຽດນາມ ແລະ ເປັນປະທານຮ່ວມການພົບປະແລກປ່ຽນຄັ້ງທີ 6 ລະຫວ່າງສອງກະຊວງການຕ່າງປະເທດຫວຽດນາມ ແລະ ລາວ. ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ສະເໜີໃຫ້ສອງຝ່າຍຄວນສຸມໃສ່ຜັນຂະຫຍາຍປະຕິບັດບັນດາຂໍ້ຕົກລົງເຊິ່ງກົມການເມືອງ, ການນຳຂອງສອງປະເທດໄດ້ເປັນເອກະພາບນຳກັນຢ່າງມີປະສິດທິຜົນ, ສືບຕໍ່ນຳສາຍພົວພັນຮ່ວມມືລະຫວ່າງສອງປະເທດນັບມື້ນັບເຂົ້າສູ່ລວງເລິກ, ໂດຍສະເພາະແມ່ນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ. ທ່ານນາຍົກລັດຖະມົນຕີ ຫງວຽນເຕີນຢຸງ ປາດຖະໜາວ່າກະຊວງການຕ່າງປະເທດຂອງສອງປະເທດເພີ່ມທະວີບັນດາການເຄື່ອນໄຫວຮ່ວມມື ຫຼາຍກວ່າອີກ, ຜ່ານນັ້ນປະກອບສ່ວນຊຸກຍູ້ການພົວພັນຮ່ວມມືສອງຝ່າຍໃນບັນດາຂົງເຂດ, ພ້ອມກັນນັ້ນປະກອບສ່ວນຊຸກຍູ້ການພົວພັນຮ່ວມມືຂອງຫວຽດນາມ ແລະ ຂອງລາວ ກັບບັນດາປະເທດໃນກຸ່ມອາຊຽນ. ທ່ານນາຍົກລັດຖະມົນຕີ ຫງວຽນເຕີນຢຸງ ກໍຢືນຢັນວ່າຫວຽດນາມ ພ້ອມແລ້ວໃຫ້ການຮ່ວມມື, ຊ່ວຍເຫຼືອລາວ ເມື່ອເປັນເຈົ້າພາບຈັດຕັ້ງກອງປະຊຸມສາກົນ. ທີ່ການຕ້ອນຮັບ, ສອງຝ່າຍກໍຢືນຢັນຈະສົມທົບກັນຢ່າງແໜ້ນແຟ້ນເພື່ອແນໃສ່ຜັນຂະຫຍາຍການຈັດຕັ້ງບັນດາການເຄື່ອນໄຫວຢ່າງມີປະສິດທິຜົນ, ບັນດາເຫດການໃນປີສາມັກຄີມິດຕະພາບຫວຽດນາມ - ລາວ.