ເຂດພັກຜ່ອນແຫ່ງໜຶ່ງຢູ່ແຂວງ ບາເຮັ້ຍ-ວຸ້ງເຕົາ |
(vovworld)- ຕາມການປະເມີນຂອງຂະແໜງທ່ອງທ່ຽວບັນດາແຂວງ, ນະຄອນເຂດທາງທິດຕາເວັນອອກພາກກາງແລ້ວ, ແຕ່ ວັນທີ 20 – 22/2 ກົງກັບວັນທີ 2 ຫາວັນທີ 4 ຂອງບຸນເຕັດ, ຈຳນວນແຂກທ່ອງທ່ຽວມາພັກຜ່ອນຢູ່ຕາມເຮືອນພັກ, ໂຮງແຮມແມ່ນເຕັມຫ້ອງ. ສິ່ງທີ່ດູດດື່ມສຳລັບແຂກທ່ອງທ່ຽວແມ່ນບັນດາລາຍການຕ້ອນຮັບບຸນເຕັດຄື ຟ້ອນສິງໂຕ, ເປີດໄຫເຫຼົ້າຍາມຕົ້ນລະດູບານໃໝ່ ແລະ ພິເສດແມ່ນແມ່ນການແຂ່ງຂັນຫໍ່ເຂົ້າຕົ້ມ ໄດ້ສ້າງຄວາມປະທັບໃຈແກ່ແຂກທ່ອງທ່ຽວທັງຫຼາຍ. ທ່ານ Steven Cropper ແຂກທ່ອງທ່ຽວມາຈາກອາເມລິກາ ໃຫ້ຮູ້ວ່າ :
“ ຂ້າພະເຈົ້າໄດ້ມີໂອກາດໄປທັດສະນະສຶກສາ, ທ່ອງທ່ຽວຢູ່ຫຼາຍແຫ່ງໃນໂລກ, ແຕ່ເມື່ອມາຮອດແຂວງ ບາເຮັ້ຍ-ວຸ້ງເຕົາຂອງຫວຽດນາມ, ຂ້າພະເຈົ້າໄດ້ມີຄວາມປະທັບໃຈແທ້ກ່ຽວກັບເຂດດິນແຫ່ງນີ້. ພາຍຫຼັງການຢ້ຽມຢາມນີ້, ຂ້າພະເຈົ້າຈະກັບເມືອແນະນຳກັບໝູ່ເພື່ອນຂອງຕົນກ່ຽວກັບແຂວງ ບາເຮັ້ຍ-ວຸ້ງເຕົາເວົ້າສະເພາະ ແລະ ຫວຽດນາມເວົ້າລວມແມ່ນດູດດື່ມແທ້. ຂ້າພະເຈົ້າປາຖະໜາວ່າ ຈະໄດ້ກັບຄືນຢ້ຽມຢາມແຫ່ງນີ້ອີກໃນໄວໆນີ້ ”
ສ່ວນຢູ່ເຂດທ່ອງທ່ຽວ Sealinks city ນະຄອນຟານທຽດ ແຂວງ ບິງຖ້ວນ, ງານແຂ່ງຂັນຫໍ່ເຂົ້າຕົ້ມໄດ້ຖືກຈັດຂຶ້ນ ອັນໄດ້ດຶງດູດ 35 ຄອບຄົວແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດເຂົ້າຮ່ວມ. ນາງ ແທງທິຈຸກມາຍ ຊາວບິງຖ້ວຍ ໃຫ້ຮູ້ວ່າ
“ ນ້ອງມານີ້ພ້ອມກັບພວກເພື່ອນ, ເຫັນວ່າບ້ານເກີດເມືອງນອນຂອງຕົນນັບມື້ນັບຂະຫຍາຍຕົວ, ມີຫຼາຍການເຄື່ອນໄຫວຕ້ອນຮັບບຸນເຕັດເພື່ອຮັບໃຊ້ແຂກທ່ອງທ່ຽວ, ເປັນຕົ້ນແມ່ນບັນດາຮ້ານວາງສະແດງຜະລິດຕະພັນ, ອາຫານການກິນຂອງຊາວເຜົ່າຈຳ. ນີ້ແມ່ນບຸນປີໃໝ່ປະຈຳຊາດ , ຫາກບໍ່ແມ່ນບຸນເຕັດຂອງຊາວເຜົ່າຈຳ. ໄດ້ຈັດຕັ້ງບັນດາການເຄື່ອນໄຫວທີ່ຟົດຟື້ນເຊັ່ນນີ້ເພື່ອຮັບໃຊ້ແຂກທ່ອງທ່ຽວ ກໍມ່ວນຫຼາຍ”