ປະກອບຄຳເຫັນໃສ່ຮ່າງບົດລາຍງານວຽກງານຂອງສະພາແຫ່ງຊາດແລະຄະນະປະຈຳສະພາແຫ່ງຊາດຊຸດທີ13
ທ່ານ ອວງຈູລິວ, ຮອງປະທານສະພາແຫ່ງຊາດ
(ພາບປະກອບ)
(vovworld) – ຕອນເຊົ້າວັນທີ 04/03, ຢູ່ນະຄອນໂຮ່ຈິມິນ, ຄະນະປະຈຳສະພາແຫ່ງຊາດ ໄດ້ຈັດກອງປະຊຸມຮັບເອົາຄຳເຫັນຂອງບັນດາຄະນະສະມາຊິກສະພາແຫ່ງຊາດ, ສະພາປະຊາຊົນບັນດາແຂວງ, ນະຄອນທາງພາກໃຕ້ ກ່ຽວກັບຮ່າງບົດລາຍງານສະຫຼຸບວຽກງານຂອງສະພາແຫ່ງຊາດ ແລະ ຄະນະປະຈຳສະພາແຫ່ງຊາດຊຸດທີ 13. ທ່ານ ອວງຈູລິວ, ຮອງປະທານສະພາແຫ່ງຊາດ, ຫົວໜ້າຄະນະຊີ້ນຳສະຫຼຸບການເຄື່ອນໄຫວຂອງສະພາແຫ່ງຊາດ ເປັນປະທານກອງປະຊຸມ.
ພ້ອມກັບການຮັບຮອງເອົາລັດຖະທຳມະນູນສະບັບໃໝ່, ສະພາແຫ່ງຊາດຊຸດທີ 13 ໄດ້ປະກາດໃຊ້ເອກະສານນິຕິກຳຫຼາຍກວ່າໝູ່ນັບແຕ່ກ່ອນມາຮອດປະຈຸບັນ ດ້ວຍຄຸນນະພາບນັບມື້ນັບໄດ້ຮັບການຍົກສູງຂຶ້ນ. ບັນດາກົດໝາຍ, ປະມວນກົດໝາຍສຳຄັນໄດ້ສ້າງລະບົບກົດໝາຍກ່ຽວກັບການກໍ່ສ້າງລັດແຫ່ງອຳນາດນິຕິບັນຍັດສັງຄົມນິຍົມລະບອບເສດຖະກິດການຕະຫຼາດ, ກົດໝາຍກ່ຽວກັບມະນຸດ…ສຳເລັດໂດຍພື້ນຖານ. ການປະຕິບັດພາລະໜ້າທີ່ຕົກລົງບັນດາບັນຫາສຳຄັນຂອງປະເທດຊາດ, ການເຄື່ອນໄຫວຕິດຕາມກວດກາສູງສຸດ, ການເຄື່ອນໄຫວພົວພັນຕ່າງປະເທດຂອງສະພາແຫ່ງຊາດກໍບັນລຸໄດ້ບັນດາໝາກຜົນທີ່ສຳຄັນ. ທ່ານ ບຸ່ຍແມ້ງຮຸ່ງ, ຮອງຫົວໜ້າຄະນະສະມາຊິກສະພາແຫ່ງຊາດ ແຂວງບິ່ງເຟືອກ, ໃຫ້ຂໍ້ສັງເກດວ່າ.
“ສະພາແຫ່ງຊາດຊຸດທີ 13 ມີການປ່ຽນໃໝ່ຫຼາຍຢ່າງ ແຕ່ການປ່ຽນໃໝ່ສຳຄັນທີ່ສຸດນັ້ນແມ່ນລັກສະນະ ເປີດເຜີຍ, ປະຊາທິປະໄຕ, ກະຈາງແຈ້ງ ໃນການເຄື່ອນໄຫວຂອງສະພາແຫ່ງຊາດ. ຈາກນັ້ນເຮັດໃຫ້ເພີ່ມຜົນສັກສິດ, ປະສິດທິຜົນການເຄື່ອນໄຫວຂອງສະພາແຫ່ງຊາດ, ເຮັດໃຫ້ບັນດາສະມາຊິກສະພາແຫ່ງຊາດ ສະແດງຖືກກັບຄວາມສາມາດຂອງຕົນ.”
ທີ່ກອງປະຊຸມ, ບັນດາຄຳເຫັນສ່ວນຫຼາຍລ້ວນແຕ່ສະແດງຄວາມເປັນເອກະພາບກັບຮ່າງບົດລາຍງານສະຫຼຸບການເຄື່ອນໄຫວອາຍຸການຊຸດທີ 13 ຂອງສະພາແຫ່ງຊາດ. ມີບາງຄຳເຫັນສະເໜີຄະນະສະຫຼຸບຕ້ອງໄຈ້ແຍກແຈ້ງເຫດຜົນບັນດາສິ່ງຈຳກັດຢ່າງຈະແຈ້ງ, ພິເສດແມ່ນເຫດຜົນພາວະວິໄຊ, ມາດຕະການຍົກສູງຄຸນນະພາບການສ້າງກົດໝາຍ.