ປະທານປະເທດ ເຈືອງເຕີນຊາງ ຕ້ອນຮັບລັດຖະມົນຕີກະຊວງເຕັກໂນໂລຢີ ອັງໂກລາ
ປະທານປະເທດ ເຈືອງເຕີນຊາງ ຕ້ອນຮັບລັດຖະມົນຕີກະຊວງເຕັກໂນໂລຢີ ອັງໂກລາ
(ພາບ: Nguyễn Khang/TTXVN)
(vovworld) – ຕອນບ່າຍວັນທີ 30/10, ຢູ່ສຳນັກງານປະທານປະເທດ, ທ່ານປະທານປະເທດ ເຈືອງເຕີນຊາງ ໄດ້ໃຫ້ການຕ້ອນຮັບທ່ານນາງ Maria Candida Teixeira ລັດຖະມົນຕີກະຊວງວິທະຍາສາດ - ເຕັກໂນໂລຢີ ອັງໂກລາ, ທີ່ພວມຢູ່ຢ້ຽມຢາມ ຫວຽດນາມ ແລະ ເຂົ້າຮ່ວມກອງປະຊຸມລະຫວ່າງລັດຖະບານ 2 ປະເທດ. ທ່ານປະທານປະເທດ ເຈືອງເຕີນຊາງ ໄດ້ຂອບອົກຂອບໃຈການສະໜັບສະໜູນຂອງປະຊາຊົນ ອັງໂກລາ ທີ່ສະຫງວນໃຫ້ແກ່ ຫວຽດນາມ ໃນຈຸດເວລາທີ່ຫຍຸ້ງຍາກຂອງການຕໍ່ສູ້ປົດປ່ອຍຊາດກ່ອນນີ້, ພ້ອມທັງຫວັງວ່ານ້ຳໃຈອັນລ້ຳຄ່ານີ້ຈະໄດ້ຮັບການເສີມຂະຫຍາຍໃນໄລຍະໃໝ່. ຜ່ານກົນໄກລະຫວ່າງລັດຖະບານ, ທ່ານປະທານປະເທດ ເຈືອງເຕີນຊາງ ສະເໜີໃຫ້ 2 ຝ່າຍຊຸກຍູ້ການຮ່ວມມືທຸກດ້ານຄືການເມືອງ - ການພົວພັນຕ່າງປະເທດ, ເສດຖະກິດ - ການຄ້າ, ການຮ່ວມມືລົງທຶນ, ວັດທະນະທຳ - ການຄ້າ... ສຳລັບບັນດາຂໍ້ຕົກລົງທີ່ໄດ້ຮັບການເຊັນກັນແລ້ວ, ຄວນສຸມໃສ່ແກ້ໄຂຂໍ້ຕິດຂັດ, ຜັນຂະຫຍາຍຢ່າງວ່ອງໄວ, ນຳມາເຊິ່ງຜົນປະໂຫຍດອັນແທດຈິງໃຫ້ທັງ ຫວຽດນາມ ແລະ ອັງໂກລາ.
ສ່ວນທ່ານນາງ ລັດຖະມົນຕີກະຊວງວິທະຍາສາດ - ເຕັກໂນໂລຢີ Maria Candida Teixeira ກໍ່ຢັ້ງຢືນຄວາມຕັດສິນໃຈຍູ້ແຮງການຮ່ວມມື ຫວຽດນາມ - ອັງໂກລາ ໃຫ້ບັນລຸໝາກຜົນດີງາມ. ທ່ານນາງຖືວ່າ, ປະຈຸບັນ ການຮ່ວມມືເສດຖະກິດລະຫວ່າງ ຫວຽດນາມ - ອັງໂກລາ ບໍ່ທັນເໝາະສົມກັບຄວາມໄວ້ເນື້ອເຊື່ອໃຈດ້ານການເມືອງ, ດັ່ງນັ້ນ, 2 ຝ່າຍຄວນມານະພະຍາຍາມຊອກຫາບັນດາມາດຕະການແກ້ໄຂຢ່າງລະອຽດ, ກ່ອນອື່ນໝົດແມ່ນບັນດາຂົງເຂດທີ່ໄດ້ກຳນົດໃນກອງປະຊຸມລະຫວ່າງລັດຖະບານ.