ທີ່ການພົບປະ, ທ່ານປະທານປະເທດ ຫວຽດນາມ ເລືອງເກື່ອງ ຢັ້ງຢືນວ່າ ຫວຽດນາມ ຍາມໃດກໍຖືເປັນສຳຄັນ ແລະ ໃຫ້ບຸລິມະສິດແຖວໜ້າແກ່ການປັບປຸງ ແລະ ພັດທະນາການພົວພັນກັບ ກຳປູເຈຍ. ທ່ານປະທານປະເທດ ສະເໜີໃຫ້ ພະບາດສົມເດັດ ໃນຖານະຕຳແໜ່ງອັນສູງສົ່ງຂອງຕົນ ຈະສືບຕໍ່ເອົາໃຈໃສ່, ພ້ອມກັບບັນດາການນຳຂັ້ນສູງ ກຳປູເຈຍ ຊີ້ນຳແກ້ໄຂຄວາມຫຍຸ້ງຍາກ, ຂໍ້ຕິດຂັດ, ສືບຕໍ່ສ້າງເງື່ອນໄຂໃຫ້ຊາວເຊື້ອຊາດ ຫວຽດນາມ ຜູ້ທີ່ມີເງື່ອນໄຂຄົບຖ້ວນ ໄດ້ຖືສັນສາດ ກຳປູເຈຍ, ອຳນວຍຄວາມສະດວກໃຫ້ແກ່ເຂົາເຈົ້າດຳລົງຊີວິດ, ເຮັດວຽກເປັນປົກກະຕິ, ສອດຄ່ອງກັບກົດໝາຍ ກຳປູເຈຍ, ເຊື່ອມຕົວເຂົ້າກັບສັງຄົມປະເທດປະຈຳຖິ່ນໄດ້ເປັນຢ່າງດີ ແລະ ເປັນຂົວຕໍ່ມິດຕະພາບລະຫວ່າງສອງປະເທດ.

         ສ່ວນພະບາດສົມເດັດ Norodom Sihamoni ຢັ້ງຢືນວ່າ ປະຊາຊົນ ກຳປູເຈຍ ຍາມໃດກໍຈົດຈຳປະເທດ ແລະ ປະຊາຊົນ ຫວຽດນາມ ທີ່ໄດ້ຊ່ວຍເຫຼືອປະຊາຊົນ ກຳປູເຈຍ ດັບສູນເຊື້ອຊາດປອນປົດໃນເມື່ອກ່ອນ ກໍຄື ໃນພາລະກິດແຫ່ງການສ້າງສາ ແລະ ພັດທະນາປະເທດຊາດໃນປັດຈຸບັນ; ພ້ອມທັງຢັງຢືນວ່າ ຈະພ້ອມກັບປະທານສະພາສູງ, ປະທານສະພາແຫ່ງຊາດ ແລະ ທ່ານນາຍົກລັດຖະມົນຕີ ສືບຕໍ່ປັບປຸງ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອອັນດີງາມ ລະຫວ່າງສອງປະເທດກໍຄືການພົວພັນອັນສະໜິດແໜ້ນລະຫວ່າງສອງຊາດ.

         ສອງຝ່າຍເຫັນດີຊຸກຍູ້ການພົວພັນສອງຝ່າຍພັດທະນາຢ່າງເລິກເຊິ່ງກວ້າງຂວາງ, ໝັ້ນໜຽວໃນທຸກຂົງເຂດ, ໃນນັ້ນ ເອົາໃຈໃສ່ຍູ້ແຮງການໂຄສະນາໃຫ້ຄົນລຸ້ນໜຸ່ມສອງປະເທດມີຄວາມເຂົ້າໃຈຢ່າງເລິກເຊິ່ງກ່ຽວກັບສາຍພົວພັນມິດຕະພາບ ຫວຽດນາມ - ກຳປູເຈຍ.

         ຕອນບ່າຍຂອງວັນດຽວກັນ, ທ່ານເລຂາທິການໃຫຍ່ ໂຕເລິມ, ທ່ານນາຍົກລັດຖະມົນຕີ ຟ້າມມິງຈິງ, ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝິນ ໄດ້ພົບປະກັບພະບາດສົມເດັດ ກຳປູເຈຍ Norodom Sihamoni ເນື່ອງໃນໂອກາດມາຢ້ຽມຢາມທາງລັດຖະກິດຢູ່ ຫວຽດນາມ.