ຜູ້ຄົນທີ່ເຂົ້າຮ່ວມລາຍການຊົມຮູບເງົາເອກະສານ “ທາດພິດສີສົ້ມ - ລູກລະເບີດທີ່ຍັງບໍ່ທັນແຕກ” ຂອງນັກປະພັນ ໂຮ່ຖ໋ຍຕຽນ ຊາວ ຫວຽດນາມ ແລະ ທ່ານ Lindebrings ຊາວ ຝລັ່ງ.(ພາບ: TTXVN)

  ຕອນຄ່ຳວັນທີ 15 ຕຸລາ ຢູ່ນະຄອນຫຼວງ ບຣຸກແຊນ (ປະເທດແບນຊິກ), ສະມາຄົມ ແບນຊິກ - ຫວຽດນາມ ໄດ້ຈັດຕັ້ງລາຍການແຫ່ງຄວາມສາມັກຄີກັບຜູ້ປະສົບເຄາະຮ້າຍຈາກທາດພິດສີສົ້ມ ດີໂອຊິນ ຫວຽດນາມ ແລະ ງານວາງສະແດງຮູບພາບຂົນຂວາຍ, ບຸກລະດົມ, ພາບເອກະສານກ່ຽວກັບສົງຄາມຢູ່ ຫວຽດນາມ, ໂດຍມີການເຂົ້າຮ່ວມຂອງທ່ານນາງ ເຈິ່ນໂຕ໊ງາ ເຊິ່ງເປັນຜູ້ທີ່ພວມຕໍ່ສູ້ກັບບັນດາບໍລິສັດຜະລິດທາດເຄມີ ອາເມລິກາ ເພື່ອຮຽກທວງຄວາມຍຸຕິທຳໃຫ້ແກ່ຜູ້ປະສົບເຄາະຮ້າຍຈາກທາດພິດສີສົ້ມ ດີໂອຊິນ ຫວຽດນາມ. ເຫດການດັ່ງກ່າວ ໄດ້ດູງດູດເພື່ອນແບນຊິນ ທີ່ມີຄວາມຮັກແພງກັບ ຫວຽດນາມ ແລະ ຊາວຫວຽດນາມ ອາໄສຢູ່ ແບນຊິກ ເຊິ່ງເປັນອະດີດນັກສຶກສາ ຫວຽດນາມ ທີ່ຮ່ຳຮຽນຢູ່ແບນຊິກແຕ່ສະໄໝ 1970 – 1980.

        ຜູ້ຄົນທີ່ເຂົ້າຮ່ວມລາຍການດັ່ງກ່າວ ຈະໄດ້ຮັບຊົມຮູບເງົາເອກະສານ “ທາດພິດສີສົ້ມ - ລູກລະເບີດທີ່ຍັງບໍ່ທັນແຕກ” ຂອງນັກປະພັນ ໂຮ່ຖ໋ຍຕຽນ ຊາວ ຫວຽດນາມ ແລະ ທ່ານ Lindebrings ຊາວ ຝລັ່ງ. ຮູບເງົາດັ່ງກ່າວ ໄດ້ພັນລະນາກ່ຽວກັບຊີວິດການເປັນຢູ່ທີ່ລຳບາກກາກກຳຂອງປະຊາຊົນ ຫວຽດນາມ ຢູ່ເຂດຕິດທາດພິດສີສົ້ມ.

        ເມື່ອແບ່ງປັນຕໍ່ນັກຂ່າວ, ທ່ານ Pierre Grega, ປະທານສະມາຄົມ ແບນຊິກ - ຫວຽດນາມ (ABV) ໃຫ້ຮູ້ວ່າ ທາງສະມາຄົມ ຍາມໃດກໍຊອກຫາວິທີໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ຫວຽດນາມ ເພື່ອຫຼຸດຜ່ອນຄວາມຫຍຸ້ງຍາກໃຫ້ແກ່ເຂົາເຈົ້າໃນການດຳລົງຊີວິດ ແລະ ສືບຕໍ່ສະໜັບສະໜູນທ່ານນາງ ເຈິ່ນໂຕ໊ງາ ໃນການຕໍ່ສູ້ຮຽກທວງໃຫ້ຮັບຮູ້ສິດຂອງຜູ້ປະສົບກັບຄວາມຫຍຸ້ງຍາກຈາກທາດພິດດີໂອຊີນ.