ຫັນເປັນດີຈີຕອນ ແມ່ນໜ້າທີ່ຈຸດສຸມຂອງຂະແໜງຖະແຫຼງຂ່າວ ແລະ ການສື່ສານ
(VOVWORLD) -ຕອນເຊົ້າວັນທີ 6 ກໍລະກົດ, ຢູ່ຮ່າໂນ້ຍ, ກະຊວງຖະແຫຼງຂ່າວ ແລະ ສື່ສານຫວຽດນາມ ໄດ້ຈັດຕັ້ງກອງປະຊຸມສະຫຼູບວຽກງານຖະແຫຼງຂ່າວ ແລະ ສື່ສານ ໃນໄລຍະ 6 ເດືອນຜ່ານມາ ແລະ ຜັນຂະຫຍາຍໜ້າທີ່ 6 ເດືອນທ້າຍປີ 2020.
 ທ່ານ ຟານເຕິມ ຮອງລັດຖະມົນຕີກະຊວງຖະແຫຼງຂ່າວ ແລະ ສື່ສານຫວຽດນາມ (ພາບ: Vietnam+) |
6 ເດືອນຜ່ານມາ, ການເຄື່ອນໄຫວພົ້ນເດັ່ນຂອງຂະແໜງຖະແຫຼງຂ່າວ ແລະ ສື່ສານ ແມ່ນຮ່ວມແຮງຮ່ວມໃຈພ້ອມກັບ ລັດຖະບານ ແລະ ປະຊາຊົນ ຍູ້ໂລກລະບາດໂຄວິດ - 19 ໃຫ້ຖອຍໄປ. ໃນ 6 ຂົງເຂດຄຸ້ມຄອງລັດຂອງກະຊວງ, ສື່ມວນຊົນ ໄດ້ກາຍເປັນໜຶ່ງໃນບັນດາກໍາລັງຫຼັກແຫຼ່ງໃນແນວໜ້າການປ້ອງກັນ, ສະກັດກັ້ນໂລກລະບາດ.
ໃນໄລຍະຈະມາເຖິງ, ກະຊວງຖະແຫຼງຂ່າວ ແລະ ສື່ສານ ຈະສຸມໃສ່ຜັນຂະຫຍາຍຂໍ້ຕົກລົງຂອງນາຍົກລັດຖະມົນຕີວ່າດ້ວຍໂຄງການຫັນເປັນດີຈີຕອນແຫ່ງຊາດ. ນີ້ແມ່ນໜ້າທີ່ ບຸລິມະສິດຈຸດສຸມຂອງຂະແໜງຖະແຫຼງຂ່າວ ແລະ ສື່ສານ ເພື່ອແນໃສ່ຫັນເປັນດີຈີຕອນແຫ່ງຊາດໄດ້ຜັນຂະຫຍາຍຢ່າງທົ່ວເຖິງ. ທ່ານ ຟານເຕິມ ຮອງລັດຖະມົນຕີກະຊວງຖະແຫຼງຂ່າວ ແລະ ສື່ສານຫວຽດນາມ ຊີ້ແຈ້ງວ່າ:
“ນັບແຕ່ນີ້ຮອດທ້າຍປີ 2020, ກະຊວງ ຖະແຫຼງຂ່າວ ແລະ ສື່ສານ ຈະໜູນຊ່ວຍ, ແນະນໍາເພື່ອໃຫ້ 100% ທ້ອງຖິ່ນພັດທະນາພື້ນຖານໂທລະຄົມມະນາຄົມລຸ້ນໃໝ່. ໃນປີນີ້, ທາງກະຊວງກໍຈະອະນຸຍາດໃຫ້ບັນດາວິສາຫະກິດໂທລະຄົມມະນາຄົມຜັນຂະຫຍາຍການສະໜອງບໍລິການອິນເຕີແນັດ 5G ຢູ່ບັນດາເຂດເຕັກໂນໂລຢີຂໍ້ມູນຂ່າວສານ ເຊິ່ງເຕົ້າໂຮມບັນດາຮາກຖານຄົ້ນຄວ້າ, ມະຫາວິທະຍາໄລ ແລະ ຢູ່ໃຈກາງບັນດາແຂວງ, ນະຄອນໃຫຍ່ຂອງປະເທດ”.
ທີ່ກອງປະຊຸມ, ກະຊວງຖະແຫຼງຂ່າວ ແລະ ສື່ສານໄດ້ປະກາດ ປະຕິບັດສໍາເລັດ 100% ບໍລິການສາທາລະນະອອນລາຍ ລະດັບ 4 ດ້ວຍ ກວ່າ 200 ການບໍລິການສາທາລະນະຂອງກະຊວງ.