ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ເຂົ້າຮ່ວມການຮັບປະທານອາຫານເຊົ້າ ສົມທົບກັບເຮັດວຽກກັບທ່ານນາຍົກລັດຖະມົນຕີ ກຳປູເຈຍ Hun Manet ແລະ ທ່ານນາຍົກລັດຖະມົນຕີ ລາວ ສອນໄຊ ສີພັນດອນ.

ນາຍົກລັດຖະມົນຕີສາມທ່ານໄດ້ຕົກລົງເປັນເອກະພາບສືບຕໍ່ຮັກສາການພົບປະແລກປ່ຽນສາມຝ່າຍໃນບັນດາຊ່ອງທາງ, ທຸກຂັ້ນ, ໃນຕໍ່ໜ້າແມ່ນບັນດາການພົບປະລະຫວ່າງລັດຖະມົນຕີກະຊວງປ້ອງກັນປະເທດ, ຕຳຫຼວດ ແລະ ການຕ່າງປະເທດ, ພ້ອມດຽວກັນນັ້ນ, ເພີ່ມທະວີບັນດາຮູບແບບໂຄສະນາເຜີຍແຜ່ກ່ຽວກັບຜົນງານການຮ່ວມມື ແລະ ຄຸນຄ່າປະຫວັດສາດຂອງການພົວພັນສາມັກຄີ, ມິດຕະພາບ, ໂດຍສະເພາະແມ່ນການເສຍສະຫຼະໃຫ້ແກ່ກັນລະຫວ່າງສາມປະເທດ, ສາມຊາດ, ຊຸກຍູ້ການຜູກພັນລະຫວ່າງການນຳໜຸ່ມ, ສະມາຊິກລັດຖະສະພາໜຸ່ມ, ຊາວໜຸ່ມ ແລະ ປະຊາຊົນສາມປະເທດ. ນາຍົກລັດຖະມົນຕີສາມທ່ານກໍຕົກລົງເຫັນດີເພີ່ມທະວີການແລກປ່ຽນ, ການຮ່ວມມືກ່ຽວກັບເສດຖະກິດດີຈີຕອນ, ລັດຖະບານດີຈີຕອນ; ຍູ້ແຮງການຮ່ວມມືຕໍ່ສູ້, ປ້ອງກັນ, ຕ້ານບັນດາອາດຊະຍາກຳ, ປົກປັກຮັກສາເສັ້ນຊາຍແດນມິດຕະພາບ, ສັນຕິພາບ, ສະຖຽນລະພາບ ແລະ ພັດທະນາ, ຍູ້ໄວການແບ່ງກຳນົດປັກຫຼັກໝາຍຊາຍແດນ; ສະກັດກັ້ນບັນດາສ່ວນບຸກຄົນ, ອົງການຈັດຕັ້ງທີ່ມ້າງທຳລາຍສາຍພົວພັນສາມປະເທດຢ່າງທັນການ; ແກ້ໄຂບັນດາບັນຫາເກີດຂຶ້ນບັງເອີນໃຫ້ສົມເຫດສົມຜົນ. ພ້ອມທັງຖືວ່າ, ໃນໄລຍະຈະມາເຖິງ ຕ້ອງເອົາໃຈໃສ່ເຖິງການຍູ້ແຮງການເຊື່ອມຕໍ່ພື້ນຖານໂຄງລ່າງຄົມມະນາຄົມ; ຍູ້ແຮງການຮ່ວມມືພັດທະນາຊາຍແດນ; ສົມທົບກັນສ້າງບາດກ້າວບຸກທະລຸໃນການຮ່ວມມືດ້ານເສດຖະກິດ, ການຄ້າ, ການລົງທຶນ, ການເງິນ, ການເຊື່ອມໂຍງເຂົ້າກັບສາກົນ, ເປັນກຳລັງໜູນຊຸກຍູ້ການຍົກວົງເງິນການຄ້າລະຫວ່າງ ຫວຽດນາມ - ກຳປູເຈຍ ໃຫ້ບັນລຸ 20 ຕື້ USD ແລະ ຫວຽດນາມ - ລາວ ຂຶ້ນເປັນ 5 ຕື້ USD ໂດຍໄວ.

ນາຍົກລັດຖະມົນຕີສາມທ່ານໄດ້ຕົກລົງເປັນເອກະພາບສືບຕໍ່ຮັກສາການພົບປະແລກປ່ຽນສາມຝ່າຍໃນບັນດາຊ່ອງທາງ

        ນາຍົກລັດຖະມົນຕີສາມທ່ານເຫັນດີປຶກສາຫາລືເຊິ່ງກັນແລະກັນກ່ຽວກັບບັນດາບັນຫາສາກົນ, ພາກພື້ນ ທີ່ຕ່າງຝ່າຍຕ່າງມີຄວາມສົນໃຈ; ບັນດາບັນຫາທີ່ກ່ຽວຂ້ອງເຖິງການພົວພັນສອງຝ່າຍ  ແລະ ລະຫວ່າງສາມຝ່າຍ; ສົມທົບກັນກະກຽມໃຫ້ແກ່ບັນດາເຫດການໃຫຍ່ຂອງແຕ່ລະປະເທດໃນໄລຍະຈະມາເຖິງໃຫ້ເປັນຢ່າງດີ.

        ໃນວັນດຽວກັນ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ມີການພົບກະກັບທ່ານປະທານາທິບໍດີ ສ.ເກົາຫຼີ Lee Jae Myung, ທ່ານປະທານາທິບໍດີ ອິນໂດເນເຊຍ Prabowo Subianto, ທ່ານນາຍົກລັດຖະມົນຕີ ນິວຊີແລນ Christopher Luxon ແລະ ທ່ານນາງ ຜູ້ອຳນວຍການໃຫຍ່ກອງທຶນເງິນຕາສາກົນ  (IMF) Kristalina Georgieva.

ລ້າຍຮວາ