ຫວຽດນາມ ສົມທົບກັບບັນດາປະເທດຊຸກຍູ້ບັນດາການເຄື່ອນໄຫວຮ່ວມມືສິດທິມະນຸດຂອງ AICHR ໃນພາກພື້ນ
(VOVWORLD) - ໃນລະຫວ່າງວັນທີ 23 – 25 ພະຈິກ 2020 ໄດ້ດຳເນີນກອງປະຊຸມພິເສດທາງອອນລາຍ ຄັ້ງທີ 2 ປີ 2020 ຂອງ ຄະນະກຳມະການລະຫວ່າງລັດຖະບານ ອາຊຽນ ກ່ຽວກັບສິດທິມະນຸດ (AICHR), ໂດຍມີການເຂົ້າຮ່ວມຂອງຜູ້ຕາງໜ້າ AICHR ບັນດາປະເທດສະມາຊິກ ອາຊຽນ ແລະ ຄະນະເລຂາ ອາຊຽນ.
 ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ (ພາບ: baoquocte.vn) |
ນີ້ແມ່ນກອງປະຊຸມເປັນທາງການຄັ້ງສຸດທ້າຍໃນອາຍຸການເປັນປະທານ AICHR 2020 ຂອງ ຫວຽດນາມ, ສຸມໃສ່ສຳຫຼວດກວດຄືນສະພາບການຮ່ວມມື ແລະ ບັນດາເນື້ອໃນທີ່ຕ້ອງຜັນຂະຫຍາຍໃນປີ 2020, ກຳນົດທິດການຮ່ວມມືໃນປີ 2021 ແລະ ແລກປ່ຽນເພື່ອກະກຽມໃຫ້ແກ່ການພົບປະລະຫວ່າງ AICHR ກັບບັນດາຄູ່ຮ່ວມມື. ໃນຖານະເປັນປະທານ AICHR 2020, ທ່ານນາງເອກອັກຄະລັດຖະທູດ ຫງວຽນຖ໊າຍອຽນເຮືອງ ໄດ້ເນັ້ນໜັກເຖິງຄວາມສຳຄັນຂອງການຜັນຂະຫຍາຍບັນດາໂຄງການດຳເນີນງານ ແລະ ການເຄື່ອນໄຫວຮ່ວມມືກ່ຽວກັບການຊຸກຍູ້ ແລະ ປົກປ້ອງສິດທິມະນຸດໃນ ອາຊຽນ, ຊົມເຊີຍບັນດາປະເທດໄດ້ຕັ້ງໜ້າສົມທົບກັນ ຮຽບຮຽງ ແລະ ຮັບຮອງເອົາເນື້ອໃນແຜນການປະຕິບັດງານ AICHR ໄລຍະ 2021 – 2025, ໂຄງການບຸລິມະສິດ AICHR 2021 ແລະ ເອກະສານແນະນຳກ່ຽວກັບການພົວພັນຕ່າງປະເທດ ຂອງ AICHR. ຫວຽດນາມ ຢັ້ງຢືນວ່າ ໃນຖານະເປັນປະທານ AICHR ເວົ້າສະເພາະ ແລະ ປະທານ ອາຊຽນ 2020 ເວົ້າລວມ ຈະສືບຕໍ່ສົມທົບກັບບັນດາປະເທດຢ່າງຕັ້ງໜ້າ ເພື່ອເພີ່ມທະວີຄວາມສະໜິດຕິດພັນ ແລະ ເປັນເຈົ້າການຮັບມື ຕໍ່ບັນດາຜົນກະທົບທີ່ສັບສົນ ແລະ ຫຼາຍສົ້ນຂອງໂລກລະບາດໂຄວິດ - 19, ຊຸກຍູ້ຄວາມຄືບໜ້າໃນການຜັນຂະຫຍາຍບັນດາການເຄື່ອນໄຫວຮ່ວມມືສິດທິມະນຸດຂອງ AICHR ໃນພາກພື້ນ, ປະກອບສ່ວນເຂົ້າໃນຄວາມມານະພະຍາຍາມລວມຂອງທັງປະຊາຄົມ ອາຊຽນ.
ທີ່ກອງປະຊຸມ, ຫວຽດນາມ ໄດ້ມອບຕຳແໜ່ງ ປະທານ AICHR ໃຫ້ ບຣຸໄນ Darussalam ໃນປີ 2021 ຢ່າງເປັນທາງການ.