(vovworld) – ຕອນບ່າຍວັນທີ 27/6, ຢູ່ສຳນັກງານລັດຖະບານ, ທ່ານຮອງນາຍົກລັດຖະມົນຕີ ຫວຽດນາມ ຫງວຽນທ້ຽນເຍີນ ໃຫ້ການຕ້ອນຮັບບັນດາຄະນະກິລານັກຮຽນ ອາຊີ ຕາເວັນອອກສ່ຽງໃຕ້, ເນື່ອງໃນໂອກາດງານມະຫາກຳກິລານັກຮຽນ ອາຊາ ຕາເວັນອອກສ່ຽງໃຕ້ ຄັ້ງທີ 5 ພວມຈັດຂຶ້ນຢູ່ ຫວຽດນາມ. ງານມະຫາກຳດຶງດູດການເຂົ້າຮ່ວມຂອງ 8 ປະເທດຄື: ສິງກາໂປ, ອິນໂດເນເຊຍ, ມາເລເຊຍ, ໄທ, ບຣູໄນ, ຟີລິບປິນ, ລາວ ແລະ ຫວຽດນາມ. ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ຕີລາຄາສູງການເຂົ້າຮ່ວມຢ່າງຕັ້ງໜ້າຂອງບັນດາຄະນະເຂົ້າໃນການເຄື່ອນໄຫວກິລານັກຮຽນໃນພາກພື້ນ ແລະ ເຂົ້າໃນງານມະຫາກຳກິລານັກຮຽນ ອາຊີຕາເວັນອອກສ່ຽງໃຕ້ ຄັ້ງທີ 5 ໂດຍ ຫວຽດນາມ ຈັດຕັ້ງ. ທ່ານຮອງນາຍົກລັດຖະມົນຕີ ຂອບໃຈສະພາກິລານັກຮຽນ ອາຊີຕາເວັນອອກສ່ຽງໃຕ້ໄດ້ເອົາໃຈໃສ່ສ້າງເງື່ອນໄຂເພື່ອໃຫ້ ຫວຽດນາມ ເປັນເຈົ້າພາບຈັດຕັ້ງກອງປະຊຸມຄັ້ງນີ້, ຖືວ່າ ບັນດາການເຄື່ອນໄຫວກິລານັກຮຽນປະຈຳປີໂດຍສະພາຈັດຕັ້ງປະກອບສ່ວນພັດທະນາກິລານັກຮຽນ ອາຊີຕາເວັນອອກສ່ຽງໃຕ້ ແລະ ເພີ່ມທະວີນ້ຳໃຈມິດຕະພາບສາມັກຄີ, ສະນິດສະໜົມ ແລະ ເຂົ້າອົບເຂົ້າໃຈເຊິ່ງກັນ ແລະ ກັນຂອງບັນດານັກຮຽນພາກພື້ນ ອາຊີ ປາຊີຟິກ. ທ່ານຮອງນາຍົກລັດຖະມົນຕີ ຢືນຢັນວ່າ: ລັດຖະບານ ຫວຽດນາມ ສ້າງເງື່ອນໄຂດີທີ່ສຸດເພື່ອໃຫ້ນັກຮຽນ ຫວຽດນາມ ເຂົ້າຮ່ວມຢ່າງຕັ້ງໜ້າເຂົ້າໃນບັນດາການເຄື່ອນໄຫວກິລານັກຮຽນ ອາຊີ ປາຊີຟິກ, ປະກອບສ່ວນສ້າງອົງການທີ່ມີຄວາມສະໜິດສະໜົມ, ມິດຕະພາບ.