(vovworld) - ໂດຍໄດ້ຮັບຄຳເຊີນຂອງທ່ານນາງປະທານາທິບໍດີ Park Geun – hye, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ເດີນທາງອອກຈາກ ຮ່າໂນ້ຍ ໄປຢ້ຽມຢາມທາງລັດຖະກິດ ສ. ເກົາຫຼີ ແຕ່ວັນທີ 1 – 4/10. ໄປພ້ອມກັບທ່ານເລຂາທິການໃຫຍ່ ຫງວຽນຟູ໋ຈ້ອງ ມີການນຳບັນດາຄະນະ, ຂະແໜງການສູນກາງຄື: ຄະນະຈັດຕັ້ງສູນກາງ, ຄະນະພົວພັນສູນກາງ, ຫົວໜ້າຫ້ອງວ່າການສູນກາງ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ…
ການຢ້ຽມຢາມ ສ. ເກົາຫຼີ ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ເພື່ອແນໃສ່ຍູ້ແຮງການພົວພັນຄູ່ຮ່ວມມື, ການຮ່ວມມືຍຸດທະສາດ ຫວຽດນາມ - ສ. ເກົາຫຼີ ຢ່າງຮອບດ້ານ ແລະ ເລິກເຊິ່ງດ້ວຍຈຸດສຸມແມ່ນເພີ່ມທະວີການຮ່ວມມືດ້ານເສດຖະກິດ, ພ້ອມທັງເປີດກ້ວາງ ແລະ ຍົກສູງປະສິດທິຜົນແຫ່ງການຮ່ວມມືໃນຂົງເຂດອື່ນ. ໃນການຢ້ຽມຢາມນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ ຈະມີການເຈລະຈາ, ພົບປະຄັ້ງຕ່າງໆເພື່ອບັນລຸໄດ້ບັນດາຂໍ້ຕົກລົງສຳຄັນກັບບັນດາການນຳຂັ້ນສູງ 2 ປະເທດ, ຊຸກຍູ້ການຮ່ວມມືລະຫວ່າງພັກກອມມູນິດ ຫວຽດນາມ ກັບພັກກຳອຳນາດໂລກໃໝ່ (Saenuri) ແລະ ການພົວພັນມິດຕະພາບລະຫວ່າງປະຊາຊົນ 2 ປະເທດ. 2 ຝ່າຍກໍ່ໄດ້ແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນທີ່ຕາງຝ່າຍຕ່າງມີຄວາມສົນໃຈ ປະກອບສ່ວນສ້າງສັນຕິພາບ, ສະຖຽນລະພາບ ແລະ ການພັດທະນາຂອງອາຊີ ແລະ ໂລກ.