ບັນດາຜູ້ເຂົ້າຮ່ວມການເສັງໄດ້ສວມບົດເປັນຜູ້ນຳທ່ຽວ ໄທ ນຳສະເໜີຢ່າງຈັບອົກຈັບໃຈ ດ້ວຍການສວມບົດເປັນຜູ້ນຳທ່ຽວ ໄທ ແລະ ໄດ້ເອົາລົງໃນສື່ສັງຄົມອອນໄລຕ່າງໆຄື Facebook ແລະ  Tiktok, ອັນໄດ້ສະແດງໃຫ້ເຫັນຄວາມສາມາດໃນການນຳໃຊ້ພາສາ ຫວຽດ ຢ່າງອຸດົມສົມບູນ ແລະ ຄວາມຮູ້ຄວາມເຂົ້າໃຈຢ່າງເລິກເຊິ່ງກ່ຽວກັບພື້ນຖານວັດທະນະທຳຂອງທັງສອງປະເທດ, ກ່ຽວກັບບັນດາສະຖານທີ່ທີ່ມີຊື່ສຽງຂອງ ໄທ ຄື ອະນຸສາວະລີປະທານ ໂຮ່ຈີມິນ ແລະ ຖະໜົນ ຫວຽດນາມ ຢູ່ແຂວງ ອຸດອນ ທານີ, ເຂດພາກຕາເວັນອອກສ່ຽງເໜືອຂອງ ໄທ.

ຄະນະຈັດຕັ້ງ ແລະ ເອກອັກຄະລັດຖະທູດ ຫວຽດນາມ ປະຈຳ ໄທ ຖ່າຍຮູບເປັນທີ່ລະນຶກກັບຜູ້ເຂົ້າຮ່ວມການເສັງ (ພາບ: VOV)

ໂດຍໄດ້ຮັບການອຸປະຖຳຈາກສະຖານທູດ ຫວຽດນາມ ປະຈຳ ໄທ, ການເສັງດັ່ງກ່າວແມ່ນກິດຈະກຳສຶກສາທີ່ມີຄວາມໝາຍ, ລະດົມຂະບວນການສອນ ແລະ ຮຽນພາສາ ຫວຽດ ກໍຄື ເຊີດຊູພາສາ ຫວຽດ ຢູ່ ໄທ ໃນສະພາບການພົວພັນລະຫວ່າງສອງປະເທດພວມພັດທະນາຮອບດ້ານໃນຫຼາຍຂົງເຂດ. ທ່ານນາງ ບຸ່ຍທິເຮວ້ ອັກຄະລັດຖະທູດທີ່ປຶກສາ ຫວຽດນາມ ປະຈຳ ໄທ ຢັ້ງຢືນວ່າ:

“ການພົວພັນລະຫວ່າງ ຫວຽດນາມ - ໄທ ພວມພັດທະນາຢ່າງດີງາມໃນຫຼາຍຂົງເຂດໃນຂອບເຂດການພົວພັນຄູ່ຮ່ວມມືຍຸດທະສາດຮອບດ້ານທີ່ເພີ່ມທະວີ. ການແຜ່ກະຈາຍເລື່ອງຮຽນພາສາ ຫວຽດ ຢູ່ ໄທ ຈະປະກອບສ່ວນສຳຄັນເຂົ້າໃນການຮັດແໜ້ນສາຍພົວພັນມິດຕະພາບລະຫວ່າງ 2 ປະເທດ, ພ້ອມທັງເປີດໂອກາດໃໝ່ໃຫ້ແກ່ພວກນ້ອງນັກຮຽນ. ຂ້າພະເຈົ້າເຊື່ອໝັ້ນວ່າ ຜ່ານການເສັງຄັ້ງນີ້, ພວກນ້ອງຈະບໍ່ພຽງແຕ່ຍົກສູງຄວາມສາມາດນຳໃຊ້ພາສາ ຫວຽດ ຂອງຕົນເທົ່ານັ້ນ ຫາກຍັງແມ່ນໂອກາດທີ່ດີເພື່ອແລກປ່ຽນຄວາມຮູ້ ແລະ ປະສົບການໃຫ້ກັນອີກດ້ວຍ”. 

ທ່ານຮອງສາດສະດາຈານ, ປອ. ນາງ ອັນຊະລີ ຈັນເສມ, ຫົວໜ້າພະແນກສັງຄົມສາດ, ມະຫາວິທະຍາໄລ ສີນະຄະລິນວິໂລດ ໄດ້ສະແດງຄວາມປິຕິຊົມຊື່ນເມື່ອເປັນຄັ້ງທຳອິດທີ່ຈັດງານການເສັງເວົ້າພາສາ ຫວຽດ ໃຫ້ແກ່ນັກສຶກສາ ຂັ້ນມະຫາວິທະຍາໄລໃນທົ່ວປະເທດ ໄທ. ທ່ານກ່າວວ່າ:

“ພວກເຮົາຈັດງານເສັງຊອກຮູ້ກ່ຽວກັບຄວາມງາມຂອງພາສາ ຫວຽດ ກໍຄືສາຍພົວພັນອັນແໜ້ນແຟ້ນລະຫວ່າງ ໄທ ກັບ ຫວຽດນາມ. ເຫດການນີ້ໄດ້ນຳມາເຊິ່ງກາລະໂອກາດອັນລ້ຳຄ່າໃຫ້ແກ່ພວກນ້ອງນັກສຶກສາໄດ້ຝຶກທັກສະໃນການນຳໃຊ້ພາສາ ຫວຽດ, ເພີ່ມທະວີຄວາມເຂົ້າໃຈດ້ານວັດທະນະທຳ ແລະ ສະແດງຄວາມເຄົາລົບເຊິ່ງກັນ ແລະ ກັນ”.

ທ່ານເອກອັກຄະລັດຖະທູດ ຫວຽດນາມ ປະຈຳ ໄທ ຟ້າມຫວຽດຮຸ່ງ ມອບລາງວັນທີໜຶ່ງ (ພາບ: VOV)

ງານເສັງເວົ້າພາສາ ຫວຽດ ຂັ້ນມະຫາວິທະຍາໄລທົ່ວປະເທດ ໄທ ໄດ້ຈັດຂຶ້ນແຕ່ວັນທີ 1 ພະຈິກ ແລະ ໄດ້ຮັບການຕອບສະໜອງ, ການເຂົ້າຮ່ວມຢ່າງຕັ້ງໜ້າຂອງນັກສຶກສາຈາກຫຼາຍມະຫາວິທະຍາໄລທີ່ມີຊື່ສຽງຢູ່ ໄທ ຄື ມະຫາວິທະຍາໄລ ທຳມະສາດ, ມະຫາວິທະຍາໄລ ສີນະຄະລິນວິໂລດ, ມະຫາວິທະຍາໄລ ອຸດອນ ທານີ ລາດຊະພັດ.

ເມື່ອແບ່ງປັນກ່ຽວກັບບຸນວາດສະໜາເລືອກຮຽນພາສາ ຫວຽດ, ນາງ Kathira Phaosung, ນັກສຶກສາປີທີ 3 ຂອງພະແນກ ສັງຄົມວິທະຍາ, ມະຫາວິທະຍາໄລ ສີນະຄະລິນວິໂລດ, ຜູ້ຄວ້າໄດ້ລາງວັນທີ 3 ໃນຮອບຊິງຊະນະເລີດ, ໃຫ້ຮູ້ວ່າ:

“ນ້ອງຮຽນພາສາ ຫວຽດ ຫາກໍ່ໄດ້ 1 ປີ. ນ້ອງເລືອກຮຽນພາສາ ຫວຽດ ເພາະວ່າ ນ້ອງມັກອາຫານ ຫວຽດນາມ ແລະ ພາສາ ຫວຽດ ກໍຈັບໃຈຫຼາຍ”.

ປັດຈຸບັນ, ມະຫາວິທະຍາໄລ ແລະ ໂຮງຮຽນສາມັນຫຼາຍແຫ່ງຂອງ ໄທ ໄດ້ແລກປ່ຽນວິຊາການສຶກສາກັບ ຫວຽດນາມ, ສະເພາະຢູ່ທາງທິດຕາເວັນອອກສ່ຽງເໜືອ, ໄທ ມີໂຮງຮຽນຫຼາຍກວ່າ 30 ແຫ່ງ ສອນພາສາ ຫວຽດ. ການເຄື່ອນໄຫວສອນພາສາ ຫວຽດ ຢູ່ຂັ້ນມະຫາວິທະຍາໄລ ຢູ່ ໄທ ໄດ້ ແລະ ພວມຕອບສະໜອງບຸກຄະລາກອນທີ່ສາມາດລົມພາສາ ຫວຽດ ໄດ້ຢ່າງຫຼ່ຽນໄຫຼ, ເຂົ້າໃຈວັດທະນະທຳ, ສັງຄົມ ຫວຽດນາມ, ເປີດໂອກາດຮ່ວມມືນັບມື້ນັບຫຼາຍໃຫ້ແກ່ສອງປະເທດ, ປະກອບສ່ວນຖະໜຸຖະໜອມ ແລະ ເພີ່ມພູນຄູນສ້າງສາຍພົວພັນມິດຕະພາບບົນພື້ນຖານພາສາກາງ ນັ້ນແມ່ນພາສາ ຫວຽດນາມ./.