(VOVWORLD) - ນັບແຕ່ຄາວຍັງມີຊີວິດ ຫຼື ຈາກໂລກນີ້ໄປແລ້ວ, ປະທານໂຮ່ຈີມິນ ຍາມໃດກໍ່ໄດ້ຮັບນ້ຳໃຈອາລົມຈິດຄວາມຮັກແພງຂອງປະຊາຊົນຫວຽດນາມ ກໍ່ຄືເພື່ອນມິດໃນທົ່ວ 5 ທະວີບ. ແບບຢ່າງກ່ຽວກັບຄຸນສົມບັດປະຕິວັດ, ບັນດາເລື່ອງລາວກ່ຽວກັບການດຳລົງຊີວິດທີ່ລຽບງ່າຍຂອງການນຳຜູ້ຍິ່ງໃຫຍ່ຂອງຊາດ ຫວຽດນາມ, ເພື່ອນຜູ້ຍິ່ງໃຫຍ່ຂອງໂລກ ຍາມໃດໄວໜຸ່ມລຸ້ນປັດຈຸບັນກໍ່ໄດ້ຮ່ຳຮຽນເອົາ, ຍ້ອງຍໍເສັນລະເສີນດ້ວຍຄວາມນັບຖື ແລະ ແສນເຄົາລົບຮັກ! ນັກຂ່າວ ງວຽນຮ່າ ໄດ້ແບ່ງປັນບັນດາເລື່ອງລາວຂອງເພື່ອນໜຸ່ມໃນພາກພື້ນ ອາຊຽນ ທີ່ມີຕໍ່ລຸງໂຮ່.
 Rifo Ridillah ມີຄວາມຫວັງມາ ຫວຽດນາມ ເຂົ້າສຸສານໄຫວ້ອາໄລປະທານໂຮ່ຈີມິນ |
ໃນຕອນເຊົ້າຂອງທຸກວັນ, ການອ່ານປຶ້ມແມ່ນຄວາມລຶ້ງເຄີຍຂອງນັກຂ່າວໜຸ່ມ ທິບພະວົງ ສຸມາວາດ ສັງກັດສະຖານີໂທລະພາບກອງທັບປະຊາຊົນລາວ ນັບແຕ່ຊຸມປີຍັງຮຽນສາມັນ. ຜ່ານບັນດາປຶ້ມກ່ຽວກັບການນຳ ແລະ ນັກວິລະຊົນບັນດາາດໃນໂລກ, ອ້າຍ ທິບພະວົງ ມີຄວາມສົນໃຈເປັນພິເສດ ຕໍ່ປະທານໂຮ່ຈີມິນ. ອ້າຍໄດ້ເມົາມົວຄົ້ນຄ້ວາ, ຊອກຮູ້ບັນດາເລື່ອງລາວ, ເອກະສານກ່ຽວກັບລຸງໂຮ່. ອ້າຍແບ່ງປັນວ່າ ລຸງໂຮ່ ແມ່ນແຮງໃຈເພື່ອໃຫ້ອ້າຍມັກຮັກການຮຽນພາສາຫວຽດ ຍ້ອນວ່າ ການຮຽນພາສາຫວຽດໄດ້ຊ່ວຍໃຫ້ອ້າຍມີເງື່ອນໄຂສຳຜັດກັບປຶ້ມ ແລະ ຮູບເງົາ, ເອກະສານອັນລ້ຳຄ່າກ່ຽວກັບລຸງ.
ສຳລັບປະເທດລາວພວກຂ້າພະເຈົ້າ, ປະທານໂຮ່ຈີມິນ ແມ່ນການນຳໄດ້ສ້າງພື້ນຖານໃຫ້ແກ່ການພົວພັນມິດຕະພາບອັນຍິ່ງໃຫຍ່, ນ້ຳໃຈສາມັກຄີແບບພິເສດລະຫວ່າງສອງປະເທດ ຫວຽດນາມ - ລາວ. ຂ້າພະເຈົ້າສົ່ງໄດ້ຮູ້ສຶກປະທັບໃຈທີ່ສຸດຕໍ່ຄຸນສົມບັດ, ແບບແຜນດຳລົງຊີວິດອັນລຽບງ່າຍຂອງລຸງໂຮ່. ຂ້າພະເຈົ້າຫວັງວ່າໃນອະນາຄົດ, ຈະມີໂອກາດໄດ້ໄປຮຽນຢູ່ ຫວຽດນາມ, ໄປຢາມສະຖານທີ່ລຸງໂຮ່ ດຳລົງຊີວິດ ແລະ ເຮັດວຽກ... ຂ້າພະເຈົ້າໄດ້ແຂວນພາບລຸງໂຮ່ ໄວ້ໃນຫ້ອງຢ່າງສະຫງ່າ, ສຳລັບຂ້າພະເຈົ້າແລ້ວ ພາບນັ້ນມີຄວາມໝາຍທີ່ສຸດ, ແມ່ນແສງສະຫວ່າງເຍືອງທາງຊ່ວຍໃຫ້ຂ້າພະເຈົ້າເດີນໄປເພື່ອບັນລຸໄດ້ເປົ້າໝາຍຂອງຕົນ.
ກໍ່ຄືກັນກັບ ທິບພະວົງ ສຸມາວາດ, ຊາຍໜຸ່ມ Rifo Ridillah ມາຈາກອິນໂດເນເຊຍ ກໍ່ຍັງບໍ່ທັນມີໂອກາດໄປຫວຽດນາມຈັກເທື່ອ ແຕ່ໄດ້ສະຫງວນນ້ຳໃຈ ອາລົມຈິດຄວາມຮັກແພງແບບພິເສດໃຫ້ ປະທານໂຮ່ຈີມິນ ແລະ ປະເທດ ຫວຽດນາມ. ບັນດາເລື່ອງລາວທຳອິດກ່ຽວກັບລຸງໂຮ່ ເຊິ່ງ Rifo Ridillah ໄດ້ຮັບຟັງແມ່ນຈາກພໍ່ຂອງຕົນ ເຊິ່ງແມ່ນທ່ານຜູ້ຟັງທີ່ສະໜິດຕິດພັນກັບສະຖານີວິທະຍຸກະຈາຍສຽງ ຫວຽດນາມ. ເພິ່ນຊ່ວຍໃຫ້ Rifo ສາມາດມີຄວາມຮູ້ກ່ຽວກັບລຸງໂຮ່, ກ່ຽວກັບປະເທດ ຫວຽດນາມ. ປັດຈຸບັນ Rifo ພວມຮຽນພາສາຫວຽດ ດ້ວຍຄວາມຫວັງໃນອະນາຄົດຈະມີໂອກາດໄປຢາມ ຫວຽດນາມ, ໄປສຸສານໄຫວ້ອາໄລປະທານໂຮ່ຈີມິນ:
ໄວໜຸ່ມອິນໂດເນເຊຍ ຮູ້ຈັກເຖິງປະທານ ໂຮ່ຈີມິນ ໂດຍຜ່ານປະຫວັດສາດແຫ່ງການຕໍ່ສູ້ຂອງຊາດອິນໂດເນເຊຍ ຍ້ອນວ່າລຸງໂຮ່ແມ່ນເພື່ອນມິດທີ່ສະໜິດສະໜົມຂອງປະທານາທິບໍດີ Sukarno. ທ່ານນາງ Megawati, ລູກສາວຂອງອະດີດປະທານາທິບໍດີ Sukarno ປັດຈຸບັນແມ່ນປະທານພັກປະຊາທິປະໄຕກຳອຳນາດອິນໂດເນເຊຍ ຍັງໄດ້ເລົ່າຄືນເລື່ອງລາວລຸງໃສ່ເກີບຢາງພາລາເມື່ອມາຢາມອິນໂດເນເຊຍ . ສຳລັບຂ້າພະເຈົ້າ, ປະທານໂຮ່ຈີມິນ ແມ່ນການນຳທີ່ລຽບງ່າຍ, ແມ່ນນັກວິລະຊົນຕໍ່ສູ້ເພື່ອເອກະລາດຂອງປະຊາຊົນ ຫວຽດນາມ. ຂ້າພະເຈົ້າມີຄວາມເຄົາລົບນັບຖື ປະທານໂຮ່ຈີມິນ ຢ່າງແທ້ຈິງ, ເຊິ່ງຍາມໃດເພິ່ນກໍ່ຢຶດໝັ້ນກັບຫຼັກການປົກປັກຮັກສາອະທິປະໄຕຂອງປະເທດ ຫວຽດນາມ.
 ທ້າວ ຕືແທັງຟອງ ນັກຮົບຕຳຫຼວດ ຢູ່ອິນໂດເນເຊຍ |
ເລື່ອງລາວຂອງ ທິບພະວົງ ສຸມາວາດ ແລະ Rifo Ridillah ພຽງແຕ່ແມ່ນ 2 ໃນຈຳນວນບັນດາເລື່ອງລາວຂອງໄວໜຸ່ມສາກົນກ່ຽວກັບຄວາມຮັກ ແລະ ຄວາມເຄົາລົບນັບຖືຕໍ່ ປະທານໂຮ່ຈີມິນ. ສ່ວນໄວໜຸ່ມ ຫວຽດນາມ ໃນປັດຈຸບັນ, ລຸງໂຮ່ ບໍ່ພຽງແຕ່ແມ່ນການນຳຜູ້ຍິ່ງໃຫຍ່ເທົ່ານັ້ນ ຫາກຍັງແມ່ນຜູ້ເປັນພໍ່ຂອງຊົນຊາດ, ຄູສອນຜູ້ຍິ່ງໃຫຍ່ຂອງການປະຕິວັດຫວຽດນາມ. ທ້າວ ຕືແທັງຟອງ ນັກຮົບຕຳຫຼວດ ພວມເຮັດວຽກຢູ່ແຂວງ ບິ່ງດິ້ງ, ຜູ້ຍາດໄດ້ລາງວັນພິເສດໃນການສອບເສັງຊອກຮູ້ກ່ຽວກັບການໄປຢ້ຽມຢາມອິນໂດເນເຊຍ ຂອງປະທານໂຮ່ຈີມິນ ແລະ ການໄປຢ້ຽມຢາມຫວຽດນາມ ຂອງທ່ານປະທານາທິບໍດີ Soekarno” ປີ 2020 ໂດຍສະຖານີວິທະຍຸກະຈາຍສຽງ ຫວຽດນາມ ສົມທົບກັບສະຖານທູດອິນໂດເນເຊຍ ປະຈຳຫວຽດນາມ ຈັດຂຶ້ນເນື່ອງໃນໂອກາດສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນສອງປະເທດ. ດ້ວຍລາງວັນແມ່ນການໄປຢ້ຽມຢາມອິນໂດເນເຊຍ 5 ວັນ, ທ້າວ ຟອງ ໄດ້ໄປຢ້ຽມຢາມຫຼາຍສະຖານທີ່ທີ່ມີຊື່ສຽງຂອງອິນໂດເນເຊຍ. ໃນນັ້ນມີສະຖານທີ່ພິເສດ ເຊິ່ງແມ່ນສະຖານທີ່ກ່ອນນີ້ 64 ປີ ປະທານໂຮ່ຈີມິນ ໄດ້ມາຢ້ຽມຢາມ ແລະ ຮັບໃບປະກາດສະນີຍະບັດປະລິນຍາເອກກິດຕິມະສັກ ຂະແໜງກົດໝາຍ ຂອງມະຫາວິທະຍາໄລ Padjadjaran, ເຊິ່ງແມ່ນໃບປະກາດສະນີຍະບັດໜຶ່ງດຽວໃນຊີວິດທີ່ ປະທານໂຮ່ຈີມິນ ເຫັນດີຮັບ.
ຂ້າພະເຈົ້າຮູ້ສຶກຕື້ນຕັນໃຈທີ່ສຸດເມື່ອໄດ້ໄປຍັງສະຖານທີ່ເຊິ່ງ ປະທານໂຮ່ຈີມິນ ເຄີຍໄປຢາມ. ຂ້າພະເຈົ້າໄດ້ຮັບຟັງການແນະນຳກ່ຽວກັບການເດີນທາງຂອງລຸງໂຮ່ ຢູ່ແຫ່ງນີ້, ໄປຢ້ຽມຢາມບັນດາສະຖານທີ່ເຊິ່ງເພິ່ນເຄີຍມາ. ຂ້າພະເຈົ້າຮູ້ສຶກໄດ້ເຖິງອາລົມຈິດຄວາມຮັກແພງຂອງປະຊາຊົນຢູ່ແຫ່ງນີ້ມີຕໍ່ລຸງໂຮ່. ແທ້ຈິງແລ້ວ, ມັນແມ່ນຄວາມຮູ້ສຶກທີ່ຍາກຈະພັນລະນາໄດ້. ມາແຫ່ງນີ້ຂ້າພະເຈົ້າຍິ່ງຮູ້ສຶກເອກອ້າງທະນົງໃຈກ່ຽວກັບການນຳຂອງຊາດ, ເພື່ອນມິດຜູ້ຍິ່ງໃຫຍ່ຂອງປະເທດ ອິນໂດເນເຊຍ.
ໃນຊຸມວັນເດືອນພຶດສະພານີ້, ປະຊາຊົນຫວຽດນາມ ແລະ ເພື່ອນມິດສາກົນໝົດທຸກຄົນ ລ້ວນແຕ່ຄິດເຖິງວັນຄ້າຍວັນເກີດລຸງໂຮ່ (19/5/1890) ດ້ວຍຄວາມເຄົາລົບນັບຖື ແລະ ຄວາມຮູ້ບຸນຄຸນອັນເລິກເຊິ່ງ.