ທ່ານ ອັດທະພົນ ເຣືອງສິຣິໂຊກ

“ຂ້າພະເຈົ້າມັກສອນພາສາ ຫວຽດ ໃຫ້ລຸ້ນລູກລຸ້ນຫຼານຊາວ ໄທ ເຊື້ອຊາດ ຫວຽດນາມ ເພາະວ່າ ຫຼັງປີ 1975, ການຮຽນ, ການສອນ ພາສາ ຫວຽດ ຢູ່ຫຼາຍແຂວງຢູ່ ໄທ, ພິເສດແມ່ນ ອຸດອນທານີ ຖືກຢຸດສະຫງັກເຮັດໃຫ້ຄົນລຸ້ນລູກລຸ້ນຫຼານຊາວ ຫວຽດນາມ ໄລຍະຫຼັງໆມານີ້ ຮູ້ພາສາ ຫວຽດ ໜ້ອຍລົງ. ຂ້າພະເຈົ້າກໍເປັນຫ່ວງວ່າ ໃນພາຍພາກໜ້າ, ພາສາ ຫວຽດ ອາດຈະຖືກສູນເສຍໄປ, ລູກຫຼານຊາວ ຫວຽດນາມ ຢູ່ໄທ ບໍ່ສາມາດໂອ້ລົມກັບຊາວ ຫວຽດນາມ ຢູ່ພາຍໃນປະເທດ ດ້ວຍພາສາ ຫວຽດ ໄດ້. ຂ້າພະເຈົ້າ ຈຶ່ງສະໝັກໃຈມາສອນພາສາ ຫວຽດ ເພາະວ່າ ຂ້າພະເຈົ້າຮູ້ທັງພາສາ ຫວຽດ ແລະ ໄທ”.

                   ທ່ານ ອັດທະພົນ ເຣືອງສິຣິໂຊກ, ມີຊື່ພາສາ ຫວຽດວ່າ ວັນວຽດແທັ່ງ, ເກີດປີ 1970 ໃນຄອບຄົວ ມີພໍ່ເຖົ້າ ແລະ ພໍ່ແມ່ລ້ວນແຕ່ເປັນນາຍຄູສອນພາສາ ຫວຽດ ໃຫ້ປະຊາຄົມຊາວ ຫວຽດນາມ ອາໄສ ຢູ່ ສະກົນນະຄອນ ແລະ ອຸດອນທານີ. ຍາມໃດທ່ານກໍມີຄວາມຮູ້ສຶກໃກ້ຊິດສະໜິດສະໜົມກັບປະເທດຊາດ, ປະຊາຊົນ ແລະ ວັດທະນະທຳ ຫວຽດນາມ. ເພາະວ່າໃນຕະຫຼອດເກືອບ 20 ປີຜ່ານມາ, ທ່ານເປັນຜູ້ຟັງປະຈຳຂອງລາຍການກະຈາຍສຽງພາສາໄທ, ວິທະຍຸກະຈາຍສຽງ ຫວຽດນາມ, ເຄີຍຍາດໄດ້ລາງວັນໃນການເສັງ “ເພື່ອນຮູ້ຫຍັງກ່ຽວກັບ ຫວຽດນາມ” ໂດຍ VOV5 ຈັດຂຶ້ນເປັນ 3 ຄັ້ງ. ເລື່ອງຮັບຟັງລາຍການ ແລະ ອ່ານຂ່າວໃນເວັບໄຊຂອງ VOV ເປັນປະຈຳ ໄດ້ຊ່ວຍໃຫ້ທ່ານມີຄວາມຮູ້ກ່ຽວກັບປະເທດ ຫວຽດນາມ, ກ່ຽວກັບ ລຸງໂຮ່ ຫຼາຍຂຶ້ນ ແລະ ອັບເດດຂໍ້ມູນຂ່າວກ່ຽວກັບ ຫວຽດນາມ ໄດ້ຢ່າງທັນການ ແລະ ຊັດເຈນ. ນັບແຕ່ເມື່ອສື່ສັງຄົມອອນໄລ໌ ພັດທະນາ, ໃນບັນຊີ facebook ສ່ວນຕົວຂອງທ່ານ ຍາມໃດກໍເຕັມໄປດ້ວຍຂໍ້ມູນກ່ຽວກັບ ລຸງໂຮ່, ປະເທດຊາດ, ປະຊາຊົນ ຫວຽດນາມ ແລະ ກ່ຽວກັບການພົວພັນຮ່ວມມືອັນດີງາມໃນບັນດາຂົງເຂດເສດຖະກິດ, ສັງຄົມ, ການເມືອງ... ລະຫວ່າງ 2 ປະເທດ. ນັ້ນກໍແມ່ນວິທີເຊິ່ງທ່ານສະແດງນ້ຳໃຈຄວາມຮັກຂອງຕົນທີ່ມີຕໍ່ ຫວຽດນາມ, ມີຕໍ່ລຸງໂຮ່ ແລະ ອະນຸລັກຮັກສາມູນເຊື້ອ, ຊຸກຍູ້ການພົວພັນລະຫວ່າງ 2 ຊາດ.

                  “ຂ້າພະເຈົ້າເລືອກມາເຮັດວຽກຢູ່ອະນຸສະຖານປະທານ ໂຮ່ຈີມິນ ຍ້ອນວ່າຂ້າພະເຈົ້າມີຄວາມເຄົາລົບນັບຖື ປະທານ ໂຮ່ຈີມິນ. ທີສອງແມ່ນ, ຂ້າພະເຈົ້າຍາກແນະນຳເຜີຍແຜ່ກ່ຽວກັບຄຸນສົມບັດ, ແນວຄິດ ແລະ ອະນຸສອນອັນດີງາມເຊິ່ງເພິ່ນມີຕໍ່ປະຊາຊົນ ໄທ ໃນໄລຍະທີ່ເພິ່ນເຄື່ອນໄຫວປະຕິວັດຢູ່ ໄທ. ທີສາມແມ່ນ, ຂ້າພະເຈົ້າຢາກປະກອບສ່ວນເລັກໆນ້ອຍໆເຂົ້າໃນການພັດທະນາຂອງແຂວງ ອຸດອນທານີ - ບ້ານເກີດເມືອງນອນຂອງຂ້າພະເຈົ້າ”.

ທ່ານ ອັດທະພົນ ເຣືອງສິຣິໂຊກ ເຂົ້າຮ່ວມການສອນພາສາ ຫວຽດ ໃຫ້ແກ່ຄົນ ໄທ ເຊື້ອຊາດ ຫວຽດນາມ

                   ໂດຍເປັນຜູ້ບັນຍາຍໃນອະນຸສອນສະຖານ ປະທານ ໂຮ່ຈີມິນ ຢູ່ ອຸດອນທານີ ສະນັ້ນ ວຽກງານປະຈຳວັນໃນເກືອບ 10 ປີຜ່ານມາຂອງທ່ານແມ່ນແນະນຳກ່ຽວກັບເຂດອະນຸສອນສະຖານແຫ່ງນີ້ໃຫ້ແກ່ແຂກທ່ອງທ່ຽວ. ທ່ານໃຫ້ຮູ້ວ່າ, ໃນຈຳນວນຄະນະແຂກທ່ອງທ່ຽວທີ່ມາທ່ຽວຊົມ, ທັດສະນະສຶກສາສະຖານທີ່ແຫ່ງນີ້ ສ່ວນຫຼາຍແມ່ນມາຈາກ ຫວຽດນາມ ແລະ ບັນດາປະເທດຄື ອັງກິດ, ຝລັ່ງ, ເຢຍລະມັນ, ສ.ເກົາຫຼີ, ຍີ່ປຸ່ນ.. ເຂົາເຈົ້າມາຊອກຮູ້ກ່ຽວກັບຊີວິດ ແລະ ພາລະກິດຂອງ ປະທານ ໂຮ່ຈີມິນ, ການນຳຜູ້ຍິ່ງໃຫຍ່, ພິເສດແມ່ນໄລຍະເຄື່ອນໄຫວຢູ່ ໄທ ແຕ່ປີ 1928 – 1929. ໃນຊຸມມື້ທຳອິດທີ່ເລີ່ມເປີດຕ້ອນຮັບແຂກທ່ອງທ່ຽວ, ເມື່ອວັນທີ 2 ກັນຍາ 2002, ແຕ່ລະມື້, ສະຖານທີ່ແຫ່ງນີ້ໄດ້ຕ້ອນຮັບແຂກທ່ອງທ່ຽວພຽງແຕ່ 2 – 3 ຄົນເທົ່ານັ້ນ, ແຕ່ປັດຈຸບັນ ແຕ່ລະມື້ມີແຂກທ່ອງທ່ຽວແຕ່ 50 – 120 ເທື່ອຄົນເຂົ້າມາທ່ຽວຊົມ.

                   “ຈົ່ງເອກອ້າງທະນົງໃຈເມື່ອຕົນເອງເປັນຄົນ ຫວຽດນາມ ເພາະວ່າ ຫວຽດນາມ ແມ່ນປະເທດທີ່ອົງອາດກ້າຫານ, ມີຄວາມຢຶດໝັ້ນ. ພວກເຮົາເປັນລູກຫຼານຊາວ ຫວຽດນາມ, ເຖິງວ່າຈະຢູ່ພາຍໃນ ຫຼື ຕ່າງປະເທດ, ຈົ່ງຮູ້ສຶກເອກອ້າງທະນົງໃຈຕໍ່ປະຫວັດສາດຂອງຊາດ, ຕໍ່ສິ່ງທີ່ລຸ້ນພໍ່ລຸ້ນອ້າຍໄດ້ສະຫຼະເພື່ອປົກປັກຮັກສາ ແລະ ປະໄວ້ໃຫ້ພວກເຮົາໃນວັນນີ້. ພະຍາຍາມເຮັດແນວໃດເພື່ອໃຫ້ປະເທດ ຫວຽດນາມ ພັດທະນາເທົ່າທຽມກັບບັນດາປະເທດໃນທົ່ວ 5 ທະວີບ ຄືດັ່ງຄວາມໄຝ່ຝັນຂອງ ປະທານ ໂຮ່ຈີມິນ. ເພື່ອໃຫ້ອະນາຄົດພາຍພາກໜ້າ, ເມື່ອເຮົາໄປຮອດໃສ, ພວກເຮົາແນະນຳວ່າ ເຮົາເປັນຄົນ ຫວຽດ, ໃຜໆກໍຮູ້ຈັກເຖິງ ຫວຽດນາມ, ດີໃຈ ແລະ ຮູ້ສຶກເປັນກຽດເມື່ອໄດ້ພົບປະໂອ້ລົມ, ໄດ້ເປັນເພື່ອນກັບຄົນ ຫວຽດ”.

ທ່ານ ອັດທະພົນ ເຣືອງສິຣິໂຊກ ແນະນຳອະນຸສອນສະຖານ ປະທານ ໂຮ່ຈີມິນ ໃຫ້ແກ່ແຂກທ່ອງທ່ຽວ

ຄຳຝາກຝັງເຖິງຄົນລຸ້ນໜຸ່ມ ຫວຽດນາມ ທີ່ອາໄສຢູ່ຕ່າງປະເທດ ກໍແມ່ນຄວາມໃນໃຈ ແລະ ຄວາມໄຝ່ຝັນທີ່ທ່ານພວມມານະພະຍາຍາມປະຕິບັດທຸກໆມື້. ສຳລັບທ່ານແລ້ວ, ການທີ່ໄດ້ເກີດມາມີເລືອດເນື້ອເຊື້ອສາຍ ຫວຽດນາມ ແມ່ນຄວາມໂຊກດີ ແລະ ຄວາມເອກອ້າງທະນົງໃຈ. ແລະ ທ່ານປາດຖະໜາວ່າ ຈະສືບຕໍ່ປະກອບສ່ວນເຖິງວ່າເລັກໆນ້ອຍໆເຂົ້າໃນການໂຄສະນາເຜີຍແຜ່ກ່ຽວກັບປະເທດຊາດ, ຊາວ ຫວຽດນາມ, ກ່ຽວກັບປະທານ ໂຮ່ຈີມິນ, ກ່ຽວກັບໄມຕີຈິດມິດຕະພາບທີ່ມີມາແຕ່ດົນນານລະຫວ່າງສອງຊາດ ຫວຽດນາມ - ໄທ ແລະ ຍິ່ງໄປກວ່ານັ້ນ ແມ່ນປະກອບສ່ວນເຂົ້າໃນການອະນຸລັກຮັກສາ ພາສາ ຫວຽດ - ວັດທະນະທຳ ຫວຽດ ໃນປະຊາຄົມຊາວ ຫວຽດນາມ ອາໄສ ຢູ່ ໄທ./.