ເຈົ້າເຫຼົ່າ ອາເບີ (ຢູ່ເບື້ອງຊ້າຍ) ລົງພົບປະ ລະດົມໃຈຜູ້ອາຍຸສູງຢູ່ຕາແສງດັກລອງ

    ຊຸມວັນທ້າຍເດືອນ ສິງຫາ ສະພາບການໂລກລະບາດໂຄວິດ - 19 ຢູ່ບັນດາແຂວງທາງພາກໃຕ້ ຫວຽດນາມ ມີການຜັນແປຢ່າງສັບສົນ ຢູ່ແຂວງ ກອນຕູມ ມີ 21 ກໍລະນີກັບມາຈາກເຂດມີໂລກລະບາດ ຖືກກວດພົບເປັນບວກກັບເຊື້ອໄວລັດ ໂຄວິດ - 19. ຕໍ່ໜ້າຄວາມສ່ຽງຂອງໂລກລະບາດທີ່ອາດຈະແຜ່ລະບາດໃນຊຸມຊົນ, ເຈົ້າເຫຼົ່າ ອາເບີ ເລຂາໜ່ວຍພັກບ້ານ ຕົວແຕມ ຕາແສງ ດັກລອງ ເມືອງ ດັກຮ່າ ໄດ້ລົງໄປແຕ່ລະຄອບຄົວ ເພື່ອໂຄສະນາແນະນຳໃຫ້ຊາວບ້ານປະຕິບັດຫຼັກອະນາໄມ ສິ່ງແວດລ້ອມ, ນຳໃຊ້ນ້ຳຢາຂ້າເຊື້ອ, ໃສ່ຜ້າອັດປາກ - ດັງ ເມື່ອລົງຖະໜົນ ແລະ ແຈ້ງອາການສຸຂະພາບເມື່ອມີລູກຫຼານ ຫຼື ຍາດຕິພີ່ນ້ອງມາຈາກເຂດເກີດໂລກລະບາດ. ແຕ່ລະຄຳບອກເຕືອນຂອງເຈົ້າເຫຼົ່າ ອາເບີ ນັ້ນ ຊາວບ້ານ ຕົວແຕມ ໄດ້ຈົດຈຳ ແລະ ປະຕິບັດດ້ວຍຄວາມຕື່ນຕົວ. ເມື່ອຖືກຖາມກ່ຽວກັບເຄັດລັບ ກ່ຽວກັບວຽກງານໂຄສະນາຂົນຂວາຍ ໃຫ້ບັນລຸປະສິດທິຜົນສູງນັ້ນ. ເຈົ້າເຫຼົ່າ ອາເບີ ໄດ້ເວົ້າດ້ວຍຄວາມພູມໃຈວ່າ ບໍ່ມີເຄັດລັບຫຍັງເລີຍ ເຮົາມີຄວາມເອົາໃຈໃສ່ເປັນຫ່ວງເປັນໃຍໃຫ້ແກ່ຊຸມຊົນ, ດັ່ງນັ້ນ ພໍ່ແມ່ພີ່ນ້ອງກໍ່ມີຄວາມເຂົ້າໃຈເຮົາ. ເຈົ້າເຫຼົ່າ ອາເບີ ເວົ້າວ່າ:

      “ຂ້າພະເຈົ້າ ຍາມໃດກໍ່ໃກ້ຊິດຕິດແທດກັບປະຊາຊົນ ລົງໄປຮອດແຕ່ລະຄອບຄົວ ເພື່ອໂຄສະນາ  ເປັນຕົ້ນແມ່ນວິທີນຶກຄິດ ວິທີປະຕິບັດ ເພື່ອພັດທະນາເສດຖະກິດໃຫ້ນັບມື້ນັບເຕີບໃຫຍ່ເຂັ້ມແຂງ. ກ່ຽວກັບຄວາມສາມັກຄີໃນເຂດຊຸມຊົນ ກ່ຽວກັບການຮ່ຳຮຽນຂອງລູກຫຼານ ແມ່ນຂາດບໍ່ໄດ້. ການສ້າງວິຖີຊີວິດວັດທະນະທຳໃນບ້ານ ກໍ່ເຮັດແນວໃດ ເພື່ອໃຫ້ປະຊາຊົນຮູ້ວິທີລ້ຽງສັດປູກຝັງ ພັດທະນາເສດຖະກິດ ແລ້ວກໍ່ຮອດການຮ່ຳຮຽນຂອງພວກລູກຫຼານ ໃຫ້ນັບມື້ນັບກ້າວໜ້າ”.

     ເຖິງວ່າປີນີ້ມີອາຍຸ 70 ປີແລ້ວກໍ່ຕາມ ແຕ່ເຈົ້າເຫຼົ່າ ອາເບີ ຍັງຫ້າວຫັນກັບວຽກງານ, ລະອຽດຄື  ການປະຕິບັດແຜນນະໂຍບາຍຂະຫຍາຍສະມາຊິກພັກໃນໝູ່ປະຊາຊົນທີ່ເຊື່ອຖືສາສະໜາ, ໜ່ວຍພັກບ້ານ ຕົວແຕມ ໂດຍເຈົ້າເຫຼົ່າເປັນເລຂາ ກໍ່ມີສະມາຊິກພັກ 11 ຄົນ ໃນນັ້ນ 10 ຄົນ ແມ່ນເຊື່ອຖືສາສະໜາ. ໃນການປະຕິບັດຄຳສັ່ງເລກທີ 05 ຂອງກົມການເມືອງ “ກ່ຽວກັບການຍູ້ແຮງການຮ່ຳຮຽນ ແລະ ເຮັດຕາມແນວຄິດຄຸນສົມບັດ ແບບແຜນການດຳລົງຊີວິດປະທານ ໂຮ່ຈີມິນ”. ໜ່ວຍພັກບ້ານ ຕົວແຕມ ຍາມໃດກໍ່ນຳໜ້າ ໃນຈຳນວນ 9 ໜ່ວຍພັກທີ່ຂຶ້ນກັບອົງຄະນະພັກຕາແສງ. ທ່ານ ເຈິ່ນງອກຈຶກ ເລຂາຄະນະພັກຕາແສງ ດັກລອງ ໃຫ້ຮູ້ວ່າ:

     “ອົງຄະນະພັກໄດ້ຕີລາຄາວ່າ ໜ່ວຍພັກນີ້ໄດ້ຜັນຂະຫຍາຍປະຕິບັດຄຳສັ່ງ ເລກທີ 05 ແມ່ນດີທີ່ສຸດ. ກ່ຽວກັບວຽກງານຜັນຂະຫຍາຍລົງສູ່ສະມາຊິກພັກແຕ່ລະຄົນ, ມີບັນດາຮູບແບບວິທີການປະຕິບັດບັນລຸປະມິດທິຜົນທີ່ສຸດ. ສະມາຊິກພັກ ປະຊາຊົນໄດ້ຕອບສະໜອງເປັນຢ່າງດີ. ສະຫຼຸບ 5 ປີແຫ່ງການປະຕິບັດຄຳສັ່ງ ເລກທີ 05, ໜ່ວຍພັກ ແລະ ສະຫາຍ ອາເບີ ເອງ ໄດ້ຖືກອົງຄະນະພັກຕາແສງ ນຳສະເໜີຕໍ່ຄະນະປະຈຳພັກເມືອງພິຈາລະນາ ມອບໃບຍ້ອງຍໍໃຫ້ແກ່ໝູ່ຄະນະ ແລະ ສ່ວນບຸກຄົນໃນໜ່ວຍພັກນີ້ ໃນການປະຕິບັດຄຳສັ່ງ ເລກທີ 05 ຢ່າງດີເດັ່ນ”.

      ເສີມຂະຫຍາຍບົດບາດຂອງຕົນ, ເຈົ້າເຫຼົ່າ ອາເບີ ໄດ້ມີບັນດາການປະກອບສ່ວນໃຫ້ແກ່ການພັດທະນາຂອງໝູ່ບ້ານ ແລະ ຂອງຕາແສງ ດັກລອງ. ກ່ອນນີ້ 7 ປີ ໃນຈຸດເວລາທີ່ຕາແສງ ດັກລອງ ໄດ້ຮັບການສ້າງຕັ້ງຂຶ້ນ ອັດຕາສ່ວນຄອບຄົວທຸກຍາກອຶດຫິວກວມກວ່າ 73%, ແຕ່ປັດຈຸບັນຕົວເລກນີ້ ໄດ້ຫຼຸດລົງພຽງແຕ່ 37,2%. ໃນການພັດທະນາເສດຖະກິດປົວແປງຊີວິດການເປັນຢູ່, ເຈົ້າເຫຼົ່າ ອາເບີ ທັງເປັນແບບຢ່າງນຳໜ້າ ທັງເປັນຜູ້ແບ່ງປັນລະດັບຄວາມຮູ້ ແນະນຳ ໃຫ້ພໍ່ແມ່ພີ່ນ້ອງຮູ້ຈັກເຕັກນິກ ໃນການປູກຝັງບົວລະບັດຕົ້ນກາເຟ ຢາງພາລາ; ການປ້ອງກັນພະຍາດໃຫ້ແກ່ງົວຄວາຍ, ຂະຫຍາຍຝຸງໝູ... ທ່ານ ອາຊື ປະທານຄະນະກຳມະການແນວໂຮມປະເທດຊາດ ຫວຽດນາມ ຕາແສງ ດັກລອງ ໃຫ້ຮູ້ວ່າ:

      “ເຈົ້າເຫຼົ່າ ອາເບີ ແມ່ນມີຄວາມກະຕືລືລົ້ນໃນວຽກງານແລກປ່ຽນກັບປະຊາຊົນຄ ແລະ ໂຄສະນາບັນດາແຜນນະໂຍບາຍ ນະໂຍບາຍໃໝ່ຂອງພັກ ແລະ ລັດ ໃຫ້ແກ່ພໍ່ແມ່ປະຊາຊົນ. ເຈົ້າເຫຼົ່າແມ່ນແບບຢ່າງບໍ່ພຽງແຕ່ໃຫ້ແກ່ລູກຫຼານໃນຄອບຄົວເທົ່ານັ້ນ ຫາກຍັງແມ່ນແບບຢ່າງຂອງປະຊາຊົນໃນບ້ານອີກດ້ວຍ”.

     ພ້ອມກັບການດຳລົງຊີວິດຂອງປະຊາຊົນທີ່ນັບມື້ໄດ້ຮັບການປົວແປງ, ຊຸມປີມໍ່ໆມານີ້ ຢູ່ຕາແສງ ດັກລອງ ເມືອງ ດັກຮ່າ ແຂວງ ກອນຕູມ ຍ້ອນມີບັນດາແບບຢ່າງນຳໜ້າຄືເຈົ້າເຫຼົ່າ ອາເບີ, ບັນດາຄຸນຄ່າວັດທະນະທຳ ພື້ນເມືອງອັນດີງາມຂອງຊາວເຜົ່າ ເຊິດັງ ໄດ້ຮັບການຮັກສາ ແລະ ເສີມຂະຫຍາຍ. ບັນດາກອງສິລະປະຄ້ອງ, ຟ້ອນຊວາງ ໄດ້ຮັບການຮັກສາ ແລະ ຖ່າຍທອດໃຫ້ແກ່ລຸ້ນໜຸ່ມ. ບາງຂະແໜງອາຊີບຫັດຖະກຳຄື ເຮັດເຄື່ອງຈັກສານ, ຕ່ຳແຜ່ນແພພື້ນເມືອງ... ພວມເປີດໂອກາດໃຫ້ແກ່ຊາວເຜົ່າ ເຊີດັງ ຢູ່ທີ່ນີ້ ພັດທະນາເສດຖະກິດຄອບຄົວ.