ເພື່ອນ ທອນສະໄໝ ຈະເລີນສຸກ, ຢູ່ນະຄອນຫຼວງ ວຽງຈັນ, ເພື່ອນ ພອນແສງ, ຢູ່ແຂວງ ຫົວພັນ, ເພື່ອນ ດາລາວັນ ພິຈິດ, ຢູ່ແຂວງ ຈຳປາສັກ... ໄດ້ໂທລະສັບ, ສົ່ງອີເມວ ແລະ ມີຄຳເຫັນໃນ Facebook ຂອງພາກພາສາ ລາວ, VOV5. ໃນນັ້ນ, ເພື່ອນ ຄຳສຸວັນ, ຢູ່ແຂວງ ວຽງຈັນ ໄດ້ສົ່ງຈົດໝາຍມາຫາລາຍການດ້ວຍເນື້ອໃນທີ່ວ່າ: “ເວລາຜ່ານໄປໄວຫຼາຍ, ປະຈຸບັນກໍ່ແມ່ນເດືອນສຸດທ້າຍຂອງປີ 2024 ແລ້ວ.ໃນຊຸມປີຜ່ານມາ, ຂ້າພະເຈົ້າໄດ້ຕິດຕໍ່ກັບລາຍການເປັນປະຈຳ, ຂ້າພະເຈົ້າກໍ່ສົ່ງຄຳຖາມຈຳນວນໜຶ່ງມາຫາລາຍການ ແລະ ໄດ້ຮັບຄຳຕອບຢ່າງວ່ອງໄວ, ຊັດເຈນຈາກບັນດາອ້າຍ, ເອື້ອຍ, ນ້ອງບັນນາທິການໃນລາຍການໂອ້ລົມກັບເພື່ອນ ລາວ. ໃນປີ 2025 ຈະມາເຖິງນີ້, ຂ້າພະເຈົ້າຈະສືບຕໍ່ສຳຜັດກັບລາຍການໃຫ້ຫຼາຍກວ່າ”.

ລາຍການພາກພາສາ ລາວ ຂໍຂອບໃຈເພື່ອນ ຄຳສຸວັນ ທີ່ໄດ້ຕິດຕາມລາຍການເປັນປະຈຳໃນຊຸມປີຜ່ານມາ. ຫວັງວ່າ, ໃນປີ 2025 ແລະ ຊຸມປີຕໍ່ໆໄປ, ພວກຂ້າພະເຈົ້າຈະສືບຕໍ່ໄດ້ຮັບຄຳເຫັນປະກອບ, ການແບ່ງປັນຂອງທ່ານຜູ້ຟັງທີ່ສົ່ງມາຫາລາຍການ. ເນື່ອງໃນໂອກາດໃກ້ຈະຮອດປີໃໝ່ 2025, ລາຍການພາກພາສາ ລາວ ຂໍອວຍພອນໃຫ້ເພື່ອນ ແລະ ຄອບຄົວ, ພ້ອມກັບທ່ານຜູ້ຟັງທຸກໆທ່ານ ປີໃໝ່ເຕັມໄປດ້ວຍຄວາມມ່ວນຊື່ນ ແລະ ຄວາມຜາສຸກ.

ເພື່ອນ ທິດາ ກິດຈະເລີນ, ດຳລົງຊີວິດຢູ່ແຂວງ ຄຳມ່ວນ, ໄດ້ສົ່ງຂໍ້ຄວາມທາງ Facebook, ແບ່ງປັນວ່າ: ວັນມະນຸດສະທຳສາກົນ ແມ່ນວັນບຸນທີ່ມີຄວາມໝາຍ ໄດ້ຈັດຂຶ້ນໃນວັນທີ 10 ທັນວາ ຂອງແຕ່ລະປີ, ເພື່ອເຊີດຊູການປົກປ້ອງ, ຊຸກຍູ້ ແລະ ປະຕິບັດສິດທິມະນຸດໃນທົ່ວໂລກ. ຂ້າພະເຈົ້າໄດ້ຮູ້ວ່າ, ຢູ່ ຫວຽດນາມ, ແນວທາງ, ແຜນນະໂຍບາຍຂອງພັກ, ນະໂຍບາຍ, ກົດໝາຍຂອງລັດ, ກໍຄືບັນດາຍຸດທະສາດ, ລາຍການ, ໂຄງການພັດທະນາເສດຖະກິດ - ສັງຄົມລ້ວນແຕ່ໄດ້ສ້າງຂຶ້ນບົນພື້ນຖານຖືປະຊາຊົນເປັນໃຈກາງ, ມຸ່ງໄປເຖິງປະຊາຊົນ ແລະ ຮັບໃຊ້ຜົນປະໂຫຍດຂອງປະຊາຊົນ. ບັນດາເນື້ອໃນກ່ຽວກັບສິດທິມະນຸດ ແລະ ພັນທະພື້ນຖານຂອງພົນລະເມືອງໃນລັດຖະທຳມະນູນ ແລະ ກົດໝາຍຂອງ ຫວຽດນາມ ລ້ວນແຕ່ສອດຄ່ອງກັບສັນຍາສາກົນເຊິ່ງ ຫວຽດນາມ ເປັນສະມາຊິກ. ສິ່ງດັ່ງກ່າວບໍ່ພຽງແຕ່ສະແດງໃຫ້ເຫັນວ່າ ຫວຽດນາມ ນັບມື້ນັບມີສະຕິຄວາມຮັບຮູ້ຢ່າງຈະແຈ້ງກວ່າ, ຄົບຖ້ວນກວ່າກ່ຽວກັບສິດທິມະນຸດເທົ່ານັ້ນ, ຫາກຍັງໄດ້ຢັ້ງຢືນ, ໃຫ້ຄຳໝັ້ນສັນຍາຢ່າງແຮງຂອງພັກ ແລະ ລັດ ຫວຽດນາມ ໃນການປະຕິບັດສິດທິມະນຸດ. ເນື່ອງໃນໂອກາດນີ້, ຂ້າພະເຈົ້າຂໍອວຍພອນໃຫ້ປະຊາຊົນ ຫວຽດນາມ ນັບມື້ນັບອີ່ມໜຳສຳລານ, ສົມບູນພູນສຸກ.

(Festival ດອກໄມ້ ດ່າລາດ ຄັ້ງທີ 10 ປີ 2024)

ເພື່ອນ ສີບຸນເຮືອງ, ຢູ່ແຂວງ ຊຽງຂວາງ ໄດ້ສົ່ງຂໍ້ຄວາມທາງ Facebook ມາຫາລາຍການ ຢາກຮູ້ວ່າ, ປີ 2024 ນີ້, ຢູ່ແຂວງ ເລິມດົ່ງ ໄດ້ຈັດງານບຸນດອກໄມ້ ດ່າລາດ ອີກບໍ່? ເຫດການປີນີ້ໄດ້ຈັດຂຶ້ນໃນເວລາໃດ ແລະ ມີການເຄື່ອນໄຫວພົ້ນເດັ່ນໃດແດ່?.

ເພື່ອນ ສີບຸນເຮືອງ ທີ່ຮັກແພງ, ຕາມຄະນະຈັດ Festival ດອກໄມ້ ດ່າລາດ ຄັ້ງທີ 10 ປີ 2024 ແລ້ວ, ງານບຸນດອກໄມ້ ດ່າລາດ ຄັ້ງທີ 10 ດ້ວຍຫົວຂໍ້ວ່າ “ດອກໄມ້ ດ່າລາດ - ສີສັນຂອງດອກໄມ້” ຈັດຂຶ້ນແຕ່ວັນທີ 05 – 31 ທັນວາ 2024. ບັນດາເຫດການຂອງງານບຸນປີນີ້ໄດ້ເນັ້ນໜັກເຖິງປັດໄຈສາກົນ. ສ.ເກົາຫຼີ, ເຊິ່ງແມ່ນຄູ່ຮ່ວມມືການທ່ອງທ່ຽວຂອງ ດ່າລາດ ແລະ ຫຼາຍປະເທດໄດ້ເຂົ້າຮ່ວມການເຄື່ອນໄຫວວັດທະນະທຳ, ສິລະປະ. ຄາດວ່າ, ມີ 10 ລາຍການສະແດງດົນຕີ ແລະ ບັນດາການເຄື່ອນໄຫວຕອບສະໜອງ, ຄື: Carnival ຖະໜົນດອກໄມ້ ແລະ ມໍລະດົກ, ຖະໜົນເຫຼົ້າແວງ - ຊາ - ກາເຟ ແລະ ຜະລິດຕະພັນພິເສດຂອງ ດ່າລາດ - ເລີມດົ່ງ, ງານຕະຫຼາດຜັກ ແລະ ດອກໄມ້ ດ່າລາດ, ງານພົບປະແລກປ່ຽນວັດທະນະທຳສິລະປະສາກົນ ດ່າລາດ - Chuncheon (ສ.ເກົາຫຼີ)… ນີ້ບໍ່ພຽງແຕ່ແມ່ນວັນບຸນຂອງປະຊາຊົນບັນດາເຜົ່າແຂວງ ເລິມດົ່ງ ເທົ່ານັ້ນ, ຫາກຍັງແມ່ນຈຸດພົບປະຂອງແຂກທ່ອງທ່ຽວຢູ່ພາຍໃນປະເທດ ແລະ ສາກົນທີ່ມາຢ້ຽມຊົມບັນດາຄຸນຄ່າວັດທະນະທຳ - ທ່ອງທ່ຽວທີ່ເປັນເອກະລັກສະເພາະຂອງ ດ່າລາດ ອີກດ້ວຍ. ພ້ອມກັນນັ້ນ, ກໍ່ສືບຕໍ່ໄດ້ຢັ້ງຢືນ, ເຊີດຊູບັນດາຄຸນຄ່າກ່ຽວກັບດອກໄມ້ ແລະ ອາຊີບປູກດອກໄມ້ ດ່າລາດ - ເລີມດົ່ງ.

(ພາບອີນເຕີເນັດ)

ເພື່ອນ ບຸນພາຄຳ, ຢູ່ແຂວງ ຫົວພັນ, ໄດ້ສົ່ງອີເມວມາຫາລາຍການໂດຍຢາກຊອກຮູ້ວ່າ, ຢູ່ ຫວຽດນາມ ແຂວງໃດປູກຕົ້ນອາງຸ່ນຫຼາຍທີ່ສຸດ? ຫວຽດນາມ ໄດ້ປູກຕົ້ນອາງຸ່ນເພື່ອຜະລິດເຫຼົ້າແວງບໍ່?

ເພື່ອນ ບຸນພາຄຳ ທີ່ຮັກແພງ, ເຂດປູກຕົ້ນອາງຸ່ນຫຼາຍທີ່ສຸດຂອງ ຫວຽດນາມ ແມ່ນຢູ່ຕາແສງ ຊວັນຫາຍ, ເມືອງ ນິງຫາຍ, ແຂວງ ນິງທ້ວນ. ແຂວງ ນິງທ້ວນ ໄດ້ຄັດເລືອກແນວພັນຕົ້ນອາງຸ່ນເພື່ອຜະລິດເຫຼົ້ົາຫຼາຍຊະນິດ ດ້ວຍຄວາມສາມາດໃຫ້ສະມັດຕະພາບສູງ, ມີຄຸນນະພາບເໝາະສົມກັບຄວາມຮຽກຮ້ອງໃນການຜະລິດເຫຼົ້າແວງ (ເຫຼົ້າແວງແດງ: ໝາກອາງຸ່ນ NH02-90, ໝາກອາງຸ່ນ NH02-97 ແລະ  ແນວພັນໝາກອາງຸ່ນຜະລິດເຫຼົ້າແວງຂາວ NH02-37). ຈາກນັ້ນ, ກໍ່ຍົກສູງຄຸນນະພາບ, ເພີ່ມກຳລັງແກ່ງແຍ້ງຂອງເຫຼົ້ົາແວງທີ່ຜະລິດຢູ່ພາຍໃນປະເທດ ກັບຜະລິດຕະພັນເຫຼົ້າແວງນຳເຂົ້າ. ນອກນັ້ນ, ຕາມຂະແໜງກະສິກຳແຂວງ ນິງທ້ວນ ແລ້ວ, ທົ່ວແຂວງ ມີເນື້ອທີ່ປູກຕົ້ນອາງຸ່ນກວ່າ 1.000 ເຮັກຕາ, ສ່ວນຫຼາຍປູກຢູ່ບັນດາເມືອງ, ຄື: ນິງເຟືອກ, ນິງຫາຍ, ນິງເຊີນ, ທ້ວນນາມ ແລະ ນະຄອນ ຟານຣາງ - ທາບຈ່າມ, ແຕ່ລະປີກໍ່ສະໜອງໝາກອາງຸ່ນສົດໃຫ້ຕະຫຼາດ ແຕ່ 26.000 – 28.000 ໂຕນ. ປະຈຸບັນ, ແຂວງ ນິງທ້ວນ ກໍ່ພວມຍູ້ແຮງການພັດທະນາບັນດາຊະນິດໝາກອາງຸ່ນສົດ, ຫັນບັນດາຜະລິດຕະພັນທີ່ຜະລິດອອກຈາກໝາກອາງຸ່ນສົດເປັນຫຼາຍຮູບຫຼາຍແບບ, ສົມທົບກັບການພັດທະນາການທ່ອງທ່ຽວຊີວະພາບ ເພື່ອຍົກສູງປະສິດທິຜົນການຜະລິດ, ດຳເນີນທຸລະກິດ.