ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີເມວ 458 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 35 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 17 ສະບັບຈາກທ່ານຜູ້ຟັງລາວ.

(ພາບປະກອບ)

ເພື່ອນ ວັນວິໄລ ວິໄລວົງ ຢູ່ແຂວງ ຫົວພັນ ໄດ້ສົ່ງອີເມວມາຫາລາຍການ, ດ້ວຍເນື້ອໃນທີ່ວ່າ: “ໃນຊຸມປີມໍ່ໆມານີ້, ຫວຽດນາມ ໄດ້ມີການປ່ຽນແປງຫຼາຍພໍສົມຄວນ. ຫວຽດນາມ ໄດ້ຜ່ານຜ່າການປະຕິຮູບຫຼາຍຄັ້ງ, ລວມມີທັງການປະຕິຮູບໃນຂົງເຂດກະຈາຍສຽງ ແລະ ໂທລະພາບ. ຫວຽດນາມ ກໍ່ມີບັນດາການດັດປັບຢ່າງຮອບດ້ານກ່ຽວກັບຫົວໜ່ວຍບໍລິຫານ ແລະ ຊີວິດການເປັນຢູ່ຂອງປະຊາຊົນໄດ້ຮັບການປົວແປງ. ຂ້າພະເຈົ້າເຊື່ອໝັ້ນວ່າ ພາຍໃຕ້ການຳພາຂອງພັກ, ລັດ, ປະຊາຊົນທຸກຊັ້ນຄົນຈະສືບຕໍ່ເຕີບໃຫຍ່, ເຂັ້ມແຂງໃນອະນາຄົດ”.

ເພື່ອນ ແສງດາວົງ ຢູ່ແຂວງ ອັດຕະປື ໄດ້ສົ່ງຂໍ້ຄວາມມາຫາລາຍການ, ແບ່ງປັນວ່າ: “ເນື້ອໃນບັນດາລາຍການກະຈາຍສຽງຂອງພວກເພື່ອນແມ່ນມີຄວາມດຶງດູດໃຈທີ່ສຸດ, ພິເສດແມ່ນບັນດາບົດຂຽນກ່ຽວກັບວັດທະນະທຳ - ສັງຄົມຂອງ ຫວຽດນາມ. ຂ້າພະເຈົ້າມັກລາຍການເລື່ອງລາວເຂດບ້ານນາ, ວິຖີຊີວິດ, ວິທີເຮັດວຽກ ແລະ ຄວາມກ້າວໜ້າ, ເຂົາເຈົ້າໄດ້ແບ່ງປັນ, ໜູນຊ່ວຍບຳລຸງສ້າງກ່ຽວກັບກະສິກຳ ແລະ ການລ້ຽງສັດຂອງເຂົາເຈົ້າເພື່ອພ້ອມກັນພັດທະນາ”.

ສ່ວນເພື່ອນ ສຸລິວົງ ຢູ່ແຂວງ ຫຼວງພະບາງ ໄດ້ໂທລະສັບມາຫາລາຍການ, ດ້ວຍເນື້ອໃນທີ່ວ່າ: “ຂ້າພະເຈົ້າຂໍແບ່ງເບົາຄວາມເສົ້າສະຫຼົດໃຈ ແລະ ຄວາມເຫັນອົກເຫັນໃຈຕໍ່ບັນດາຄອບຄົວຜູ້ປະສົບເຄາະຮ້າຍທີ່ຖືກຜົນສະທ້ອນຈາກພາຍຸຢູ່ ຫວຽດນາມ ທີ່ຜ່ານມາ. ຜ່ານແຫຼ່ງຂ່າວທີ່ຂ້າພະເຈົ້າໄດ້ອ່ານ, ຂ້າພະເຈົ້າເຫັນວ່າ ລັດຖະບານ ຍັງສືບຕໍ່ຂຸ້ນຂ້ຽວຜັນຂະຫຍາຍວຽກງານກູ້ໄພກູ້ຊີບ, ໄດ້ຊ່ວຍໃຫ້ປະຊາຊົນມີຄວາມອຸ່ນອຽນໃຈກວ່າ ເຖິງວ່າຄວາມເສຍຫາຍຈະໜັກໜ່ວງ. ນອກນັ້ນ, ເຖິງວ່າບໍ່ຮຽກຮ້ອງ ປະຊາຊົນໃນທົ່ວປະເທດ ຫວຽດນາມ ກໍ່ຮ່ວມແຮງຮ່ວມໃຈ, ໜູນຊ່ວຍບັນດາເຂດຖືກໄພທຳມະຊາດ, ນີ້ແມ່ນການເຄື່ອນໄຫວມີລັກສະນະມະນຸດສະທຳສູງຂອງຊາວ ຫວຽດນາມ”.

ພິທີເຊັນໃນຂໍ້ຕົກລົງຮ່ວມມື (ພາບ: vietnamairlines.com)

ເພື່ອນ ຄຳສີ, ຢູ່ແຂວງ ຈຳປາສັກ ໄດ້ສົ່ງອີເມວມາຫາລາຍການແບ່ງປັນຂໍ້ມູນທີ່ວ່າ: “ຫວ່າງມໍ່ໆມານີ້, ບໍລິສັດໃຫຍ່ການບິນ ຫວຽດນາມ ແລະ ບໍລິສັດໂທລະຄົມ Star Telecom (Unitel) ໄດ້ເຊັນໃນຂໍ້ຕົກລົງຮ່ວມມືຍຸດທະສາດກ່ຽວກັບການຜັນຂະຫຍາຍການບໍລິການ logistics ຢູ່ ລາວ. ການຮ່ວມມືດັ່ງກ່າວຈະຊ່ວຍໃຫ້ 2 ຝ່າຍສ້າງເຄືອຂ່າຍ logistics ທີ່ມີປະສິດທິຜົນ, ເຊື່ອມຕໍ່ປະເທດ ລາວ ກັບບັນດາທະວີບຄື ອາຊີ, ເອີລົບ, ອາເມລິກາ, ຜ່ານນັ້ນ ກໍ່ປະກອບສ່ວນສ້າງມູນຄ່າທີ່ຍືນຍົງໃຫ້ແກ່ພື້ນຖານເສດຖະກິດຂອງ ລາວ. ດັ່ງນັ້ນ, ບັນດາວິສາຫະກິດຂອງ ລາວ ຈະສາມາດເຂົ້າເຖິງຕະຫຼາດທົ່ວໂລກໄດ້ຢ່າງວ່ອງໄວ, ປອດໄພ ແລະ ປະຢັດກວ່າ. ບັນດາປະເພດສິນຄ້າຄື ຜະລິດຕະພັນເຕັກໂນໂລຊີສູງ, ຜະລິດຕະພັນກະເສດ ຫຼື ສິນຄ້າສົ່ງອອກຍຸດທະສາດ ຈະໄດ້ຂົນສົ່ງດ້ວຍວິທີທີ່ດີທີ່ສຸດ, ຮັບປະກັນຈະສົ່ງໄປເຖິງບັນດາຄູ່ຮ່ວມມືສາກົນຖືກຕາມການກຳນົດເວລາ. ຝ່າຍ Star Telecom (Unitel) ໃຫ້ຂໍ້ສັງເກດວ່າ, ການຜັນຂະຫຍາຍການບໍລິການ logistics ບໍ່ພຽງແຕ່ຊ່ວຍຍົກສູງກຳລັງຄວາມສາມາດໃນການຂົນສົ່ງສິນຄ້າຂອງ ລາວ ເທົ່ານັ້ນ, ຫາກຍັງແມ່ນກຳລັງໜູນໃຫ້ແກ່ການພັດທະນາຕະຫຼາດແບບຍືນຍົງອີກດ້ວຍ”.

ມູ່ກາງຈາຍ ແມ່ນສະຖານທີ່ດີທີ່ສຸດສຳລັບແຂກທ່ອງທ່ຽວທີ່ຢາກຊົມຄວາມງາມຍາມທົ່ງນາຂັ້ນໄດ (ພາບ: wetrek.vn)

ເພື່ອນ ພຸດດາລາ, ພວມເຮັດວຽກຢູ່ ຫາຍຟ່ອງ, ໄດ້ສົ່ງຂໍ້ຄວາມມາທາງ Facebook, ດ້ວຍເນື້ອໃນທີ່ວ່າ: “ດ້ວຍຄວາມງາມມະຫັດສະຈັນຂອງລະດູໃບໄມ້ຫຼົ່ນ (ປະມານເດືອນ ສິງຫາ - ຕຸລາ), ຂ້າພະເຈົ້າຢາກຮູ້ວ່າ ບັນດາສະຖານທີ່ທ່ອງທ່ຽວແຫ່ງໃດຂອງ ຫວຽດນາມ ຈະນຳມາເຊິ່ງການລົງຕົວຈິງທີ່ເປັນເອກະລັກສະເພາະກ່ຽວກັບທິວທັດເຂົ້າສຸກເຫຼືອງ, ດອກໄມ້ຕາມລະດູ, ຫຼືບ່ອນອາກາດເຢັນໆທີ່ເປັນເອກະລັກສະເພາະທີ່ສຸດ, ແລະ ເຮັດແນວໃດແຂກທ່ອງທ່ຽວຕ່າງປະເທດຈະສາມາດມີການລົງຕົວຈິງທີ່ດີທີ່ສຸດ?”

ເພື່ອນ ພຸດດາລາ, ທີ່ຮັກແພງ, ລະດູໃບໄມ້ຫຼົ່ນຢູ່ທາງພາກເໜືອ ຫວຽດນາມ ມີຫຼາຍແຫ່ງມີທິວທັດທຳມະຊາດທີ່ດຶງດູດໃຈ. ໃນລາຍການໂອ້ລົມກັບເພື່ອນ ລາວ ມື້ນີ້, ພວກຂ້າພະເຈົ້າຂໍສະເໜີສະຖານທີ່ຈຳນວນໜຶ່ງທີ່ມີທິວທັດທຳມະຊາດສວຍງາມໃຫ້ທຸກທ່ານ.

+ ມູ່ກາງຈາຍ: ແມ່ນສະຖານທີ່ດີທີ່ສຸດສຳລັບແຂກທ່ອງທ່ຽວທີ່ຢາກຊົມຄວາມງາມຍາມທົ່ງນາຂັ້ນໄດມີຕົ້ນເຂົ້າສຸກເຫຼືອງຢູ່ ຫວຽດນາມ. ຈຸດເວລາທົ່ງນາງາມທີ່ສຸດແມ່ນລະຫວ່າງກາງເດືອນ ກັນຍາ ຫາກາງເດືອນ ຕຸລາ. ນີ້ແມ່ນເວລາທີ່ເຂົ້າມີສີເຫຼືອງງາມຕາ, ປົກຄຸມບັນດາເຂດໂນນພູ, ສ້າງເປັນ “ທົ່ງທະເລຕົ້ນເຂົ້າ” ມະສັດສະຈັນ. ໂນນພູ ເມິມໂຊຍ (ລາປານເຕິນ): ເຂດທີ່ມີຊື່ສຽງດ້ວຍບັນດາທົ່ງນາຂັ້ນໄດເປັນວົງມົນ ແມ່ນສັນຍາລັກຂອງ ມູ່ກາງຈາຍ. ໂນນພູ ມອງເງື້ອ (ຕາແສງ ເຈກູຍາ): ແມ່ນສະຖານທີ່ຖ່າຍຮູບງາມທີ່ສຸດ. ໂດດຈ້ອງເວີ່ນ (ກີ່ວ ເຄົາຟ້າ): ຖ້າຫາກມາແຫ່ງນີ້ກົງກັບງານບຸນ, ແຂກທ່ອງທ່ຽວສາມາດໂດດຈ້ອງເວີ່ນ ເພື່ອຊົມວິວເຂດຮ່ອມພູເຂົ້າສຸກເຫຼືອງຈາກມູມສູງ.

+ ຮ່າຢາງ ມີຊື່ສຽງດ້ວຍບັນດາເສັ້ນທາງກິ່ວມະຫັດສະຈັນ ແລະ ຊົມດອກໄມ້ທີ່ເປັນເອກະລັກສະເພາະ ເຊິ່ງມີພຽງແຈ່ໃນລະດູໃບໄມ້ຫຼົ່ນ - ລະດູໜາວເທົ່ານັ້ນ. ຈຸດເວລານີ້ທົ່ງນາສຸກເຫຼືອງ (ປະມານທ້າຍເດືອນ ກັນຍາ). ດອກບັກວິດ (ປະມານທ້າຍເດືອນ ຕຸລາ ຮອດເດືອນ ພະຈິກ). ນອກນັ້ນ, ເມື່ອມາ ກິ່ວ ມ້າຟີແລ່ງ ແລະ ແຮມຕູສານ, ແຂກທ່ອງທ່ຽວຈະໄດ້ຊົມຮ່ອມພູເລິກທີ່ສຸດຢູ່ເຂດ ອາຊີຕາເວັນອອກສ່ຽງໃຕ້, ເປັນແຫ່ງທີ່ໄດ້ຮັບຖືວ່າແມ່ນໜຶ່ງໃນຈຳນວນ 4 ກິ່ວທີ່ມີຊື່ສຽງຂອງ ຫວຽດນາມ. ຖະໜົນເກົ່າ ດົ່ງວັນ: ຢູ່ແຫ່ງນີ້, ແຂກທ່ອງທ່ຽວຈະໄດ້ຮັບປະທານບັນດາເຍື່ອງອາຫານ ແລະ ຊົມບັນດາສະຖາປັດຕະຍາກຳເກົ່າແກ່. ທົ່ງດອກບັກວິດ (ສຸງລ່າ, ລຸ້ງຕາວ): ມາແຫ່ງນີ້, ແຂກທ່ອງທ່ຽວຈະມີໂອກາດຖ່າຍຮູບກັບດອກໄມ້ທີ່ເປັນເອກະລັກສະເພາະຂອງເຂດພູພຽງຫີນ.

ເພື່ອນ ພຸດດາລາ ແລະ ທ່ານຜູ້ຟັງກໍ່ຢ່າລືມເບິ່ງພະຍາກອນອາກາດກ່ອນຈະເດີນທາງເດີ, ຍ້ອນໃນຊ່ວງເວລານີ້ທາງພາກເໜືອ ຫວຽດນາມ ມັກມີພາຍຸ, ຝົນຕົກ.