(vovworld)- ບັນດາຮ້ານວາງສະແດງຂອງ 33 ວິສາຫະກິດ ຫວຽດນາມ ເຂົ້າຮ່ວມງານຕະຫລາດນັດ Gulfood, ດູບາຍ ໄດ້ຮັບຄວາມສົນໃຈ ແລະ ຢາກຕິດຕໍ່ພົວພັນດຳເນີນທຸລະກິດ ຈາກລູກຄ້າສາກົນ.
ເຂົ້າຮ່ວມ ງານຕະຫລາດນັດ Gulfood ປີ 2017 ມີກວ່າ 5000 ວິສາຫະກິດມາຈາກ 120 ປະເທດໃນໂລກ, ດ້ວຍແຂກມາຊົມ, ຊື້ເຄື່ອງຂອງ ກວ່າ 95.000 ເທື່ອຄົນທີ່ມາຈາກ 170 ປະເທດ. ປີນີ້ ຫວຽດນາມ ມີ 33 ວິສາຫະກິດເຂົ້າຮ່ວມ. ນີ້ແມ່ນງານຕະຫລາດນັດກ່ຽວກັບຂົງເຂດຜະລິດຕະພັນກະເສດ. ງານຕະຫລາດນັດ Gulfood ກໍ່ແມ່ນການກຳນົດທ່າອ່ຽງໃຫ້ແກ່ຂະແຫນງສະບຽງອາຫານໃນອະນາຄົດ, ແມ່ນໂອກາດດີສຸດເພື່ອໃຫ້ບັນດາວິສາຫະກິດຜະລິດຕະພັນກະເສດເຂົ້າຮ່ວມ.
 ທ່ານ ຟ້າມບີງດາມ ເອກອັກຄະລັດຖະທູດຫວຽດນາມ ປະຈຳ ຢູໄນເຕັດ ອາຣັບ ເອມມີເຣດ(UAE) ຕັດແຖບຜ້າໄຂຮ້ານວາງສະແດງຂອງຫວຽດນາມ ທີ່ ງານຕະຫລາດນັດ Gulfood ປີ 2017.
|
ງານຕະຫລາດນັດ Gulfood ໄດ້ຮັບການຈັດຕັ້ງປະຈຳປີ, ໄດ້ຮັບຖືວ່າແມ່ນແຫ່ງເຊື່ອມຕໍ່ບັນດາປະເທດ ແລະ ບໍລິສັດສະຫນອງ, ເປີດບັນດາລະບົບຈຳຫນ່າຍໃຫ້ແກ່ການເຄື່ອນໄຫວທຸລະກິດໃນຂົງເຂດອຸດສາຫະກຳສະບຽງອາຫານ ແລະ ບໍລິການກ່ຽວຂ້ອງ. ເຂົ້າຮ່ວມ ງານຕະຫລາດນັດ Gulfood ນີ້ ນອກຈາກບັນດາວິສາຫະກິດໄດ້ສົ່ງຜະລິດຕະພັນໄປຂາຍຢູ່ຕະຫລາດ ຕາເວັນອອກກາງ ຄື: Vinamilk, ບໍລິສັດໃຫຍ່ການຄ້າ ຮ່າໂນ້ຍ Hapro ຍັງມີວິສາຫະກິດຫລາຍແຫ່ງເປັນຄັ້ງທຳອິດເຂົ້າຮ່ວມຄື: ບໍລິສັດ ລົງທຶນຜະລິດພັດທະນາກະສິກຳ VinEco ຈຳກັດ, ສະມາຊິກ ຂອງກຸ່ມບໍລິສັດ VinGroup, ບໍລິສັດ LaFooco ຂອງລອງອານ, ບໍລິສັດຫຸ້ນສ່ວນສະບຽງອາຫານ Richy. ສຳລັບຫວຽດນາມ, ງານຕະຫລາດນັດ Gulfood ແມ່ນໂອກາດເພື່ອໃຫ້ບັນດາວິສາຫະກິດຫວຽດນາມ ໂຄສະນາຜະລິດຕະພັນເຖິງລູກຄ້າ ແລະ ວິສາຫະກິດປະເທດເພື່ອນມິດ.
ທ່ານນາງ ຫງວຽນທິເຟືອງຖາວ, ຮອງຜູ້ອຳນວຍການໃຫຍ່ ຮັບຜິດຊອບດ້ານເຕັກນິກເຕັກໂນໂລຊີຂອງ ບໍລິສັດ VinEco, ກຸ່ມບໍລິສັດ VinGroup ແບ່ງປັນວ່າ: “ນີ້ເປັນຄັ້ງທຳອິດ VinEco ສົ່ງຜະລິດຕະພັນກະເສດໄປຍັງຕ່າງປະເທດ. ທ່າແຮງຂອງ VinEco ເມື່ອທຽບໃສ່ບັນດາວິສາຫະກິດອື່ນ ນັ້ນແມ່ນມີຟາມແຫ່ງຫນຶ່ງໄດ້ຮັບການກໍ່ສ້າງເປັນລະບົບ. ປະຈຸບັນ VinEco ພວມຊອກທິດສົ່ງຜະລິດຕະພັນໄປຂາຍຢູ່ຕ່າງປະເທດ ແລະ ດູບາຍ ແມ່ນຕະຫລາດທີ່ພວກຂ້າພະເຈົ້າພວມມຸ້ງໄປເຖິງ.
 ທ່ານນາງ ຫງວຽນທິເຟືອງຖາວ(ເບື້ອງຂວາ), ຮອງຜູ້ອຳນວຍການໃຫຍ່ ຮັບຜິດຊອບດ້ານເຕັກນິກເຕັກໂນໂລຊີຂອງ ບໍລິສັດ VinEco
|
ບັນດາວິສາຫະກິດຂອງຫວຽດນາມ ນຳມາຜະລິດຕະພັນຫລາຍປະເພດ, ຄຽງຂ້າງບັນດາຜະລິດຕະພັນທີ່ເປັນມູນເຊື້ອຄື: ໝາກພິກໄທ, ຊາ, ໝາກມ່ວງຫິມະພານ… ຍັງມີບັນດາຜະລິດຕະພັນອື່ນໄດ້ຮັບການປຸງແຕ່ງ, ຫຸ້ມຫໍ່ດ້ວຍເຄື່ອງໝາຍການຄ້າຂອງຫວຽດນາມ.
ບັນດາຮ້ານຄ້າຂອງຫວຽດນາມດຶງດູດແຂກມາຊົມເປັນຈຳນວນຫລວງຫລາຍ ແລະ ໄດ້ຮັບການຕີລາຄາສູງ. ຜ່ານ ງານຕະຫລາດນັດຄັ້ງນີ້, ມີຫລາຍເຄື່ອງໝາຍການຄ້າຫວຽດນາມທີ່ມີຊື່ສຽງໄດ້ຮັບສັນຍານຕັ້ງຫນ້າຄື: Vinamilk, Hapro, Lotus Rice..
ທ່ານ ຫວໍຈູງຮຽວ, ຜູ້ອຳນວຍການດຳເນີນທຸລະກິດສາກົນ Vinamilk ໃຫ້ຮູ້ວ່າ: “ງານຕະຫລາດນັດປີ 2016, Vinamilk ໄດ້ລົງນາມໃນສັນຍາສົ່ງອອກຜະລິດຕະພັນນົມແປ້ງໃຫ້ເດັກນ້ອຍ ລວມມູນຄ່າ 12,5 ລ້ານ USD. ຫວັງວ່າປີນີ້ ຈຳນວນສັນຍາການຄ້າຈະເພີ່ມຂຶ້ນກວ່າເກົ່າ.
ງານຕະຫລາດນັດ Gulfood
|
ຮ້ານວາງສະແດງສິນຄ້າຂອງ ຕາເວັນອອກກາງ ແລະ ອາຟຼິກາໄດ້ຮັບການຕີລາຄາວ່າແມ່ນຫນຶ່ງໃນບັນດາຕະຫລາດມີຄວາມສາມາດບົ່ມຊ້ອນສຳລັບຜະລິດຕະພັນກະເສດ, ສະບຽງອາຫານຂອງຫວຽດນາມ. ເຂົ້າຮ່ວມງານຕະຫລາດນັດ Gulfood ກໍແມ່ນກາລະໂອກາດປະກອບສ່ວນຍົກລະດັບການໂຄສະນາຮູບພາບຂອງພື້ນຖານກະສິກຳຂຽວຂອງຫວຽດນາມ ແລະ ກໍແມ່ນກາລະໂອກາດເພື່ອໃຫ້ບັນດາຜະລິດຕະພັນມີທ່າແຮງກ່ຽວກັບກະສິກຳຂອງຫວຽດນາມ ນັບມື້ນັບມີຫນ້າຢູ່ຫລາຍປະເທດໃນໂລກ.
ບາງຮູບພາບທີ່ ງານຕະຫລາດນັດ Gulfood ປີ 2017 ຈັດຂຶ້ນຢູ່ ດູບາຍ
ຜະລິດຕະພັນເກດສະຫນາຂອງກຸ່ມບໍລິສັດ LP ດຶງດູດຄວາມສົນໃຈຈາກບັນດາວິສາຫະກິດ ຢູ່ ດູບາຍ
|
ທ່ານ ຫວໍຈູງຮຽວ, ຜູ້ອຳນວຍການທຸລະກິດສາກົນ Vinamilk ແນະນຳກ່ຽວກັບນ້ຳນົມຂອງບໍລິສັດໃຫ້ວິສາຫະກິດຕ່າງປະເທດ
|
ຍຸດທະສາດພັດທະນາຂອງບໍລິສັດ Lafooco ຜະລິດໝາກມ່ວງຫິມະພານໃນປີ 2017 ຈະໄດ້ຮັບການຍູ້ແຮງໃນການສົ່ງເສີມຮ່ວມມືຕະຫລາດ ຕາເວັນອອກກາງ
|
ອາຫານກະປ່ອງຂອງບໍລິສັດເຕີນຟາດກໍແມ່ນປະເພດສິນຄ້າຊື່ງມີວິສາຫະກິດສາກົນຫລາຍແຫ່ງຢາກຊອກຮູ້ |
ຮ້ານວາງສະແດງສິນຄ້າຂອງບັນດາວິສາຫະກິດຫວຽດນາມ ດຶງດູດວິສາຫະກິດ, ແຂກມາຊອກຮູ້ ແລະ ຕິດຕໍ່ຮ່ວມມືເປັນຈຳນວນຫລວງຫລາຍ
|
ເປັນຄັ້ງທຳອິດເຂົ້າຮ່ວມ ງານຕະຫລາດນັດ Gulfood, ຜະລິດຕະພັນຂອງ VinEco ໄດ້ຮັບຄວາມສົນໃຈຈາກວິສາຫະກິດສາກົນເປັນຈຳນວນຫລວງຫລາຍ
|
ນ້ຳໝາກໄມ້ສົດກໍແມ່ນຜະລິດຕະພັນໃຫມ່ມີທ່າແຮງຂອງບັນດາວິສາຫະກດຫວຽດນາມ
|
ເຂົ້າສານຂອງ Lotus Rice ໄດ້ນຳໄປຂາຍຢູ່ຕະຫລາດຕາເວັນອອກກາງໃນຫລາຍປີແລ້ວ
|
ສິນຄ້າຈຳນວນຫນຶ່ງຂອງວິສາຫະກິດຫວຽດນາມ ເຂົ້າຮ່ວມ ງານຕະຫລາດນັດ Gulfood
|
ຮ້ານວາງສະແດງສິນຄ້າຂອງບັນດາປະເທດ
|