(vovworld) - 70 ປີທີ່ໄດ້ຮັບການສ້າງຕັ້ງນັບແຕ່ວັນທີ 6/1/1946, ສະພາແຫ່ງຊາດຫວຽດນາມ ໄດ້ມີການປະກອບສ່ວນອັນໃຫຍ່ຫລວງ ແລະ ສຳຄັນເຂົ້າໃນພາລະກິດແຫ່ງການຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບ, ສ້າງສາ ແລະ ປົກປັກຮັກສາປະເທດຊາດ. ບົດຂຽນຂອງນັກຂ່າວ ຮົ່ງເວີນ ທີ່ມີຫົວຂໍ້ວ່າ: ຂີດໝາຍ70 ປີແຫ່ງວັນເລືອກຕັ້ງສະພາແຫ່ງຊາດຫວຽດນາມ, ເຊີນທ່ານຕິດຕາມຮັບຟັງ.
ທ່ານປະທານ ໂຮ່ຈີມິນ ປ່ອນບັດເລືອກຕັ້ງໃນວັນທີ 6/1/1946
|
70 ປີແຫ່ງການສ້າງຕັ້ງ ແລະ ພັດທະນາ ຂອງສະພາແຫ່ງຊາດຫວຽດນາມ ແມ່ນໄລຍະທາງທີ່ເຕັມໄປດ້ວຍຄວາມເອກອ້າງທະນົງໃຈ. ຄວາມຈິງຂອງການເຕີບໃຫຍ່ຂອງສະພາແຫ່ງຊາດຫວຽດນາມ ໄດ້ສະແດງໃຫ້ເຫັນວ່າ ຍາມໃດສະພາແຫ່ງຊາດແມ່ນບ່ອນເຕົ້າໂຮມກຸ່ມກ້ອນມະຫາສາມັກຄີທົ່ວປວງຊົນທັງຊາດ, ມີການປ່ຽນແປງ ແລະ ບູລະນະຢ່າງບໍ່ຢຸດຢັ້ງ, ປະກອບສ່ວນຢ່າງຕັ້ງຫນ້າເຂົ້າໃນພາລະກິດພັດທະນາລວມຂອງປະເທດຊາດ.
ປະກອບສ່ວນສຳຄັນໃນການສ້າງລັດແຫ່ງອຳນາດນິຕິບັນຍັດ
70 ປີຜ່ານມາ, ສະພາແຫ່ງຊາດໄດ້ປະຕິບັດພາລະບົດບາດສ້າງລັດຖະທຳມະນູນ, ສ້າງກົດໝາຍຢ່າງດີເດັ່ນ. ນັບແຕ່ສະພາແຫ່ງຊາດຊຸດທີ 1 ມາຮອດປະຈຸບັນ, ສະພາແຫ່ງຊາດໄດ້ປະກາດໃຊ້ ລັດຖະທຳມະນູນ 5 ສະບັບຄື: ລັດຖະທຳມະນູນປີ 1946, ລັດຖະທຳມະນູນປີ 1959, ລັດຖະທຳມະນູນປີ 1980, ລັດຖະທຳມະນູນປີ 1992 ແລະ ລັດຖະທຳມະນູນປີ 2013, ຜ່ານນັ້ນ ສືບທອດ ແລະ ສ້າງສຳເລັດລັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ, ເໝາະສົມກັບຄວາມຮຽກຮ້ອງຕ້ອງການ, ຫນ້າທີ່ຂອງປະເທດຊາດໃນແຕ່ລະໄລຍະປະຫວັດສາດ. ພ້ອມກັບການພັດທະນາຢ່າງແຂງແຮງຂອງປະເທດຊາດ, ໃນ 7 ທົດສະວັດຜ່ານມາ, ມີກົດໝາຍສຳຄັນຫລາຍສະບັບໄດ້ຮັບການປະກາດໃຊ້ຈາກສະພາແຫ່ງຊາດ, ປະກອບສ່ວນຫັນສິດເປັນເຈົ້າຂອງປະຊາຊົນເປັນລະອຽດ ແລະ ປະຕິບັດການຄຸ້ມຄອງສັງຄົມຕາມ ລັດຖະທຳມະນູນ ແລະ ກົດໝາຍ.
ຕັດສິນບັນດາບັນຫາສຳຄັນ, ຕອບສະຫນອງຄວາມຮຽກຮ້ອງຕ້ອງການໃນການປ່ຽນແປງໃຫມ່ຂອງປະເທດຊາດ.
ໃນວິວັດແຫ່ງການພັດທະນາ, ສະພາແຫ່ງຊາດຫວຽດນາມ ໄດ້ມີຫລາຍລັດຖະນະໂຍບາຍສຳຄັນຄື: ຕັດສິນໂຄງປະກອບການຈັດຕັ້ງ ແລະ ບຸກຄະລາກອນຂັ້ນສູງຂອງລັດ, ພິຈາລະນາ ແລະ ຮັບຮອງເອົາບັນດາມະຕິກ່ຽວກັບຫນ້າທີ່, ບັນດາແຜນການເສດຖະກິດ ສັງຄົມປະຈຳປີ ແລະ ໄລຍະ 5 ປີ, ຍຸດທະສາດພັດທະນາເສດຖະກິດສັງຄົມໄລຍະ 10 ປີ, ໃຫ້ສັດຕະຍາບັນບັນດາສົນທິສັນຍາສາກົນ ຊື່ງຫວຽດນາມໄດ້ລົງນາມ ຫລືເຂົ້າຮ່ວມ. ສະພາແຫ່ງຊາດກໍໄດ້ຕັດສິນແຜນນະໂຍບາຍລົງທຶນກໍ່ສ້າງບັນດາກິດຈະກຳສຳຄັນຂອງຊາດຄື: ເສັ້ນທາງໂຮ່ຈິມີນ, ສາຍສົ່ງໄຟຟ້າ 500 kV ເຫນືອ - ໃຕ້, ໂຮງງານອາຍແກສໄຟຟ້າ ບ່າເຣ້ຍ ຫວູງເຕົາ, ໂຮງງານໄຟຟ້ານ້ຳຕົກ ເຊີນລາ, ໂຮງງານກັ່ນນ້ຳມັນ ຢູງກວດ, ໂຮງງານໄຟຟ້ານິວເຄຼຍ ນີງທ້ວນ.. ສ້າງປະຖົມປັດໄຈໃຫ້ແກ່ການຍູ້ແຮງຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ທ່ານ ອວງຈູລືວ, ຮອງປະທານສະພາແຫ່ງຊາດຫວຽດນາມ ສັງເກດວ່າ:
“ 70 ປີຜ່ານມາ ກໍແມ່ນ 70 ປີທີ່ສະພາແຫ່ງຊາດຮ່ວມເດີນທາງພ້ອມກັບພັກ ແລະ ບັນດາອົງການອື່ນຂອງລະບົບການເມືອງໃນການຕັດສິນບັນດາບັນຫາສຳຄັນຂອງປະເທດຊາດໃຫ້ນັບມື້ນັບມີປະສິດທິຜົນ ແລະ ແທດຈິງກວ່າ, ຕອບສະຫນອງຄວາມຮຽກຮ້ອງຕ້ອງການຂອງພຶດຕິກຳປ່ຽນໃຫມ່ ແລະ ພັດທະນາຂອງປະເທດຊາດ. ບັນດາມະຕິຂອງສະພາແຫ່ງຊາດໄດ້ປະກາດໃຊ້ໃນໄລຍະສຳຄັນຂອງປະເທດຊາດຄື: ມະຕິກ່ຽວກັບການພັດທະນາເສດຖະກິດສັງຄົມໄລຍະ 5 ປີ ຄືແຕ່ປີ 1986-1990 ໄດ້ເປີດຊ່ອງທາງໃຫ້ແກ່ການພັດທະນາພື້ນຖານເສດຖະກິດການຕະຫລາດຕາມການກຳນົດທິດສັງຄົມນິຍົມໃນໄລຍະປ່ຽນໃຫມ່, ມະຕິກ່ຽວກັບການພັດທະນາເສດຖະກິດສັງຄົມປີ 1991 ເຮັດໃຫ້ປະຊາຊົນມີຄວາມອຸ່ນອ່ຽນໃຈໃນຂະນະທີ່ສະພາບການສາກົນ ແລະ ພາຍໃນປະເທດມີການຜັນແປຢ່າງສັບສົນ, ຮັກສາແນວທາງປ່ຽນແປງໃຫມ່ຫັນໄປສູ່ກົນໄກການຕະຫລາດ, ເສີມຂະຫຍາຍກຳລັງແຮງຂອງບັນດາພາກສ່ວນເສດຖະກິດ.”
ພາບປະກອບ
|
ຕິດຕາມກວດກາສູງສຸດກາຍເປັນເຄື່ອງມືທີ່ມີປະສິດທິຜົນເພື່ອກວດກາສິດອຳນາດແຫ່ງລັດ
ໃນກອງປະຊຸມແຕ່ລະຄັ້ງ, ສະພາແຫ່ງຊາດໄດ້ສະຫງວນເວລາສ່ວນຫລາຍເພື່ອພິຈາລະນາ, ປຶກສາຫາລືກ່ຽວກັບບັນດາບົດລາຍງານຂອງລັດຖະບານ, ສານປະຊາຊົນສູງສຸດອົງການໄອຍະກສຍປະຊາຊົນສູງສຸດໃນການປະຕິບັດພາລະບົດບາດ, ຫນ້າທີ່ຕາມການກຳນົດຂອງກົດໝາຍ, ເພີ່ມທະວີການຕິດຕາມກວດກາຫົວເລື່ອງສະເພາະ, ສຸມໃສ່ເຂົ້າໃນບັນດາບັນຫາຮ້ອນເຮັ່ງຂອງຊີວິດຊື່ງຜູ້ມີສິດເລືອກຕັ້ງສົນໃຈ, ຍົກສູງປະສິດທິຜົນການຊັກຖາມ ແລະ ຕອບຄຳຊັກຖາມ, ສ້າງບັນຍາກາດເປີດອົກເປີດໃຈ, ມີປະຊາທິປະໄຕໃນການເຄື່ອນໄຫວຂອງສະພາແຫ່ງຊາດ. ການຈັດຕັ້ງລົງຄະແນນສຽງໄວ້ວາງໃຈສຳລັບບັນດາຜູ້ດຳລົງຕຳແຫນ່ງໂດຍສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນ ກໍໄດ້ສ້າງກຳລັງຫນູນເພື່ອໃຫ້ບັນດາລັດຖະມົນຕີ, ຫົວຫນ້າຂະແຫນງການ ປ່ຽນໃຫມ່ຢ່າງແຮງໃນວຽກງານຊີ້ນຳ, ບໍລິຫານ. ສາດສະດາຈານ, ດຣ ເຈີນງອກເດື່ອງ, ອະດີດຮອງຫົວຫນ້າຫ້ອງວ່າການສະພາແຫ່ງຊາດຖືວ່າ:
“ການເຄື່ອນໄຫວຕິດຕາມກວດກາສູງສຸດຂອງສະພາແຫ່ງຊາດ ຈາກການອີງໃສ່ພຽງແຕ່ດ້ານຈິດໃຈ ແລະ ເນື້ອໃນຂອງ ລັດຖະທຳມະນູນ ແລະ ກົດໝາຍອົງການສະພາແຫ່ງຊາດ ດ້ວຍບັນດາຂໍ້ກຳນົດລວມ, ຍັງບໍ່ທັນຫັນເປັນລະອຽດເທື່ອ ຮອດການອີງໃສ່ກົດໝາຍສະບັບຫນຶ່ງດ້ວຍບັນດາຂໍ້ກຳນົດລະອຽດ, ແຫນ້ນແຟ້ນ ຈາກການສ້າງໂຄງການແຜນການຕິດຕາມກວດກາໄລຍະ 6 ເດືອນ, ປະຈຳປີ ຕະຫລອດຮອດບັນດາຂໍ້ກຳນົດກ່ຽວກັບພາກສ່ວນ, ເປົ້າໝາຍ, ເນື້ອໃນ, ຮູບການ ແລະ ວິທີການຕິດຕາມກວດກາ. ຍ້ອນເຫດນັ້ນ ການເຄື່ອນໄຫວຕິດຕາມກວດກາຈຶ່ງໄດ້ຮັບການປະຕິບັດເປັນປະຈຳ, ມີຈຸດສຸມ, ສ່ອງແສງບັນດາບັນຫາຮ້ອນເຮັ່ງພວມໄດ້ຮັບຄວາມສົນໃຈຈາກປະຊາຊົນ. ທີສອງແມ່ນ ການເຄື່ອນໄຫວຕິດຕາມກວດກາສູງສຸດຂອງສະພາແຫ່ງຊາດໄດ້ຮັບການປະຕິບັດໃນບັນຍາກາດທີ່ນັບມື້ນັບມີປະຊາທິປະໄຕ, ເປີດອົກເປີດໃຈ ແລະ ມີຄວາມຮັບຜິດຊອບ ແມ່ນເຄື່ອງມືຢ່າງມີປະສິດທິຜົນເພື່ອໃຫ້ປະຊາຊົນຕິດຕາມກວດກາສິດອຳນາດແຫ່ງລັດ.”
ຍົກສູງທີ່ຕັ້ງບົດບາດໃນເວທີສາກົນ
ໃນຂົງເຂດການຕ່າງປະເທດ, ການເຄື່ອນໄຫວການທູດ, ລັດຖະສະພາ ສືບຕໍ່ໄດ້ຮັບການຍູ້ແຮງ. ບັນດາການເຄື່ອນໄຫວການຕ່າງປະເທດສອງຝ່າຍຂອງສະພາແຫ່ງຊາດໄດ້ຮັບການປັບປຸງ, ມີການພັດທະນາການພົວພັນກັບລັດຖະສະພາຫລາຍປະເທດ, ສ້າງສະພາບແວດລ້ອມສາກົນຢ່າງສະດວກໃຫ້ກິດຈະການສ້າງສາ ແລະ ປົກປັກຮັກສາປະເທດຊາດ. ໃນການພົວພັນຫລາຍຝ່າຍ, ໂດຍແມ່ນສະມາຊິກຂອງຫລາຍອົງການລະຫວ່າງລັດຖະສະພາ, ສະພາແຫ່ງຊາດຫວຽດນາມ ບໍ່ພຽງແຕ່ປະກອບສ່ວນຢ່າງຕັ້ງຫນ້າເຂົ້າໃນການເຄື່ອນໄຫວຂອງບັນດາເວທີປາໄສນີ້ເທົ່ານັ້ນ ຫາກຍັງເປັນເຈົ້າການສະເຫນີບັນດາຂໍ້ລິເລີ່ມທີ່ມີລັກສະນະສ້າງສັນ ເພື່ອຊຸກຍູ້ການຮ່ວມມືລັດຖະສະພາຢ່າງມີປະສິດທິຜົນ. ສະພາແຫ່ງຊາດຫວຽດນາມ ກໍໄດ້ຈັດຕັ້ງກອງປະຊຸມສຳຄັນຫລາຍຄັ້ງຢູ່ຫວຽດນາມສຳເລັດຜົນ, ໃນນັ້ນ ກອງປະຊຸມສະມັດຊາໃຫຍ່ສະຫະພັນ ລັດຖະສະພາສາກົນຄັ້ງທີ 132 (IPU) ດ້ວຍຖະແຫລງການຮ່າໂນ້ຍເປັນການພິສູດໃຫ້ເຫັນສິ່ງນັ້ນ. ທ່ານ ຫງວຽນແຫ້ງຟຸກ, ຫົວຫນ້າຫ້ອງວ່າການສະພາແຫ່ງຊາດ, ເລຂາທິການໃຫຍ່ສະພາແຫ່ງຊາດ ຕີລາຄາວ່າ:
“ບົດພື້ນຖານແນວຄິດຂອງປະທານໂຮ່ຈິມີນ ກ່ຽວກັບແນວທາງການຕ່າງປະເທດເປີດກວ້າງໄດ້ປະກົດອອກໃນໄລຍະຕົ້ນແຫ່ງເອກະລາດ, ໃນໄລຍະ 70 ປີຜ່ານມາ, ການເຄື່ອນໄຫວການຕ່າງປະເທດຂອງສະພາແຫ່ງຊາດຫວຽດນາມ ໄດ້ປະກອບສ່ວນເຂົ້າໃນຜົນສຳເລັດຂອງການເຄື່ອນໄຫວທາງການທູດຂອງປະເທດຊາດ. ພິເສດກອງປະຊຸມ IPU 132 ຂອງສະຫະພັນລັດຖະສະພາສາກົນຢູ່ ຮ່າໂນ້ຍ ເມື່ອເດືອນ 3/2015ໄດ້ສະແດງໃຫ້ເຫັນຈິດໃຈເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງຂອງສະພາແຫ່ງຊາດຫວຽດນາມ, ປະກອບສ່ວນຍົກສູງທີ່ຕັ້ງບົດບາດຂອງຫວຽດນາມໃນເວທີສາກົນ.”
ຜ່ານ 70 ປີແຫ່ງການສ້າງຕັ້ງ ແລະ ພັດທະນາ, ສະພາແຫ່ງຊາດຫວຽດນາມ ໄດ້ປະກອບສ່ວນອັນໃຫຍ່ຫລວງເຂົ້າໃນພາລະກິດແຫ່ງການຕໍ່ສູ້ປົດປ່ອຍຊາດ, ທ້ອນໂຮມປະເທດເປັນເອກະພາບ, ສ້າງສາ ແລະ ປົກປັກຮັກສາປະເທດຊາດ. ບັນດາໝາກຜົນນີ້ໄດ້ສືບຕໍ່ສ້າງປະຖົມປັດໄຈສະດວກໃຫ້ແກ່ການພັດທະນາຂອງສະພາແຫ່ງຊາດໃນໄລຍະຈະມາເຖິງ, ແມ່ນພື້ນຖານສຳຄັນເພື່ອຮັບປະກັນໃຫ້ແກ່ການພັດທະນາຂອງປະເທດຊາດສຳເລັດຜົນ.