(vovworld) - ໃນໄລຍະປີ 2 ປີ (2015 – 2016), ຫວຽດນາມ ໄດ້ສຸມໃສ່ປະຕິບັດຍຸດທະສາດຢ່າງມີປະສິດທິຜົນ ເພື່ອແນໃສ່ສ້າງພື້ນຖານເສດຖະກິດພັດທະນາແບບຍືນຍົງ, ໃນນັ້ນເອົາໃຈໃສ່ເປັນພິເສດເຖິງການຍົກສູງກຳລັງແກ່ງແຍ້ງ, ປັບປຸງສະພາບແວດລ້ອມແຫ່ງການດຳເນີນທຸລະກິດ. ພ້ອມກັບລັດຖະບານ, ບັນດາກະຊວງ, ຂະແໜງການ, ທ້ອງຖິ່ນຕ່າງໆ ກໍພວມປະຕິບັດບັນດາມາດຕະການແກ້ໄຂ ເພື່ອສ້າງເງື່ອນໄຂສະດວກຢ່າງສຸດສຸດໃຈໃຫ້ວິສາຫະກິດ, ນັກລົງທຶນຢູ່ພາຍໃນ ແລະ ຕ່າງປະເທດ. ບົດຂຽນ “ຫວຽດນາມ ມານະພະຍາຍາມສ້າງສະພາບແວດລ້ອມແຫ່ງການລົງທຶນ, ດຳເນີນທຸລະກິດຢ່າງສະດວກສະບາຍ” ຂອງ ເກີມຕູ໋, ນັກຂ່າວ VOV.
ໄລ່ຮອດເດືອນ 10/2016, ຫວຽດນາມ ມີວິສາຫະກິດ 10.000 ກວ່າແຫ່ງໄດ້ຮັບການສ້າງຕັ້ງໃໝ່, ດ້ວຍນອດຈຳນວນທຶນຈົດທະບຽນແມ່ນກວ່າ 81.000 ຕື້ດົງ. ຈຳນວນວິສາຫະກິດກັບຄືນສູ່ການເຄື່ອນໄຫວໃນເດືອນ 10 ແມ່ນເກືອບ 2000 ແຫ່ງ. ນີ້ແມ່ນໝາກຜົນທີ່ລັດຖະບານຫວຽດນາມ ບັນລຸໄດ້ໃນບັນດາຄວາມມານະພະຍາຍາມເພື່ອປັບປຸງສະພາບແວດລ້ອມແຫ່ງການດຳເນີນທຸລະກິດຢ່າງບໍ່ຢຸດຢັ້ງໃນໄລຍະຜ່ານມາ. ຫຼັກຖານອັນໃຫຍ່ຫຼວງທີ່ສຸດທີ່ພິສຸດໃຫ້ຄວາມມານະພະຍາຍາມຂອງຫວຽດນາມ ແມ່ນບົດລາຍງານປະຈຳປີກ່ຽວກັບດັດຊະນີຄວາມສະດວກໃນການດຳເນີນທຸລະກິດ (Doing Business) ປີ 2017 ຂອງທະນາຄານໂລກ ທີ່ປະກາດໃນວັນທີ 26/10 ຜ່ານມາ, ໄດ້ຈັດຫວຽດນາມ ຢືນອັນດັບທີ 82 ໃນຈຳນວນ 190 ພື້ນຖານເສດຖະກິດ, ເລື່ອນ 9 ຂັ້ນເມື່ອທຽບໃສ່ປີ 2016.
ໃນບົດລາຍງານປະກາດຫວ່າງມໍ່ໆມານີ້, ທະນາຄານ HSBC ໃຫ້ຂໍ້ສັງເກດວ່າ: ຫວຽດນາມ ມີຄວາມສາມາດຮັກສາທີ່ຕັ້ງນຳໜ້າຢູ່ອາຊີ ກ່ຽວກັບການເຕີບໂຕ GDP, ດ້ວຍ 2 ຈຸດພົ້ນເດັ່ນແມ່ນການຜະລິດ ແລະ ການສົ່ງອອກ. ບົດລາຍງານກ່ຽວກັບສະພາບການຜະລິດໃນພາກພື້ນອາຊີຕາເວັນອອກສ່ຽງໃຕ້, ສຳນັກຂ່າວສານ Nikkei ຂອງ ຍີ່ປຸ່ນ ກໍໃຫ້ຂໍ້ສັງເກດວ່າ, ບັນດາເງື່ອນໄຂດຳເນີນທຸລະກິດໃນຂົງເຂດຜະລິດຂອງຫວຽດນາມ ສືບຕໍ່ໄດ້ຮັບການປັບປຸງໃຫ້ດີຂຶ້ນ. ໃນຂະນະນັ້ນ, ອົງການຈັດອັນດັບຄວາມໄວ້ເນື້ອເຊື່ອໃຈ Moody’s ກໍໄດ້ຕີລາຄາຢ່າງຕັ້ງໜ້າກ່ຽວກັບແງ່ຫວັງເສດຖະກິດຂອງຫວຽດນາມ, ດ້ວຍການຈັດອັນດັບ B1, ແງ່ຫວັງສະຖຽນລະພາບ.
ທ່ານໝາກກ໋ວກແອງ, ຮອງປະທານສະຫະສະມາຄົມວິສາຫະກິດຂະໜາດນ້ອຍ ແລະ ກາງ ນະຄອນຮ່າໂນ້ຍ ຖືວ່າ: ນັບແຕ່ປີ 2015, ລັດຖະບານໄດ້ປະກາດໃຊ້ “ກົດໝາຍປັບປຸງ, ເພີ່ມເຕີມບັນດາກົດໝາຍວ່າດ້ວຍການລົງທຶນ, ດຳເນີນທຸລະກິດ”, ລົບລ້າງບັນດາຮົ້ວກີດຂວາງໃນການລົງທຶນ, ດຳເນີນທຸລະກິດທີ່ບໍ່ເໝາະສົມກັບທຳນຽມເສດຖະກິດການຕະຫຼາດ ແລະ ຄຳໝັ້ນສັນຍາເຊື່ອມໂຍງຂອງຫວຽດນາມ, ສ້າງພື້ນຖານນິຕິກຳໃຫ້ການປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດ ຕາມທິດນັບມື້ນັບມີຄວາມສະດວກສະບາຍກວ່າ, ກະຈາງແຈ້ງ ແລະ ສະເໝີພາບລະຫວ່າງບັນດາວິສາຫະກິດ ແລະ ນັກລົງທຶນ.
“ປະຈຸບັນ, ສະຫະສະມາຄົມວິສາຫະກິດຮ່າໂນ້ຍ ພ້ອມກັບພະແນກອຸດສາຫະກຳການຄ້າ, ພະແນກແຜນການ ແລະ ການລົງທຶນ ພ້ອມກັບອົງການ, ຄະນະ, ຂະແໜງການ ຍາມໃດກໍຈັດຕັ້ງບັນດາເວທີປາໄສ, ພົບປະກັບບັນດາອົງການວິສາຫະກິດ. ນອກນັ້ນ, ກໍ່ສົ່ງໃບທາບທາມຄຳເຫັນເພື່ອໃຫ້ບັນດາວິສາຫະກິດ ສຸມໃສ່ແຈ້ງຂໍ້ມູນຂ່າວສານ ເພື່ອແນໃສ່ແກ້ໄຂຄວາມຫຍຸ້ງຍາກທີ່ກ່ຽວຂ້ອງເຖິງລະບຽບການບໍລິຫານ, ກ່ຽວຂ້ອງເຖິງທີ່ດິນ, ພາສີ, ອາກອນ… ຈາກນັ້ນກໍ່ຫຼຸດຜ່ອນໜັງສືອະນຸຍາດເພີ່ມເຕີມ ເພື່ອສ້າງສະພາບແກ່ງແຍ້ງທີ່ສະດວກສະບາຍໃຫ້ວິສາຫະກິດ”.
ເລື່ອງປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ ໄດ້ຮັບຄວາມເອົາໃຈໃສ່ເປັນພິເສດທີ່ສຸດຈາກລັດຖະບານ. ໃນທ້າຍເດືອນ 04, ລັດຖະບານໄດ້ປະກາດໃຊ້ມະຕິເລກທີ 19 ປີ 2016 ກ່ຽວກັບໜ້າທີ່, ມາດຕະການແກ້ໄຂຕົ້ນຕໍເພື່ອປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດໄລຍະ 2 ປີ 2016 – 2017, ກຳນົດທິດຮອດປີ 2020. ນີ້ແມ່ນປີທີ 3 ຢ່າງລຽນຕິດ, ທີ່ລັດຖະບານໄດ້ປະກາດມະຕິກ່ຽວກັບບັນດາໜ້າທີ່, ມາດຕະການປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ. ຍ້ອນເຫດນັ້ນ, ສະພາບແວດລ້ອມແຫ່ງການລົງທຶນ, ດຳເນີນທຸລະກິດໄດ້ມີບາດກ້າວປັບປຸງ, ກຳລັງແກ່ງແຍ້ງໄດ້ຮັບການຍົກສູງຂຶ້ນ ໄດ້ຮັບການຮັບຮູ້ຈາກບັນດາອົງການຈັດຕັ້ງສາກົນທີ່ມີອິດທິພົນຊື່ສຽງ, ປະຊາຄົມວິສາຫະກິດຕີລາຄາສູງ. ທ່ານຮອງນາຍົກລັດຖະມົນຕີ ເວືອງດິ່ງເຫ້ວ ຢືນຢັນວ່າ: ຍາມໃດຫວຽດນາມ ກໍຖືຖັນແຖວວິສາຫະກິດ ແລະ ນັກທຸລະກິດເປັນສຳຄັນ. ທ່ານຮອງນາຍົກລັດຖະມົນຕີສະເໜີໃຫ້ບັນດາແຂວງ, ນະຄອນສຸມໃສ່ໜູນຊ່ວຍວິສາຫະກິດຂະໜາດກາງ ແລະ ນ້ອຍພັດທະນາຢ່າງແຮງ; ເອົາໃຈໃສ່ເປັນພິເສດເຖິງຂະບວນການດຳເນີນອາຊີບ, ດຶງດູດເງິນລົງທຶນໂດຍກົງຈາກຕ່າງປະເທດ.
“ລັດຖະບານພວມມານະພະຍາຍາມຈົນສຸດຄວາມສາມາດຂອງຕົນ ເພື່ອຫັນລະບົບກົດໝາຍ ແລະ ແຜນນະໂຍບາຍຂອງພັກ ແລະ ລັດໃຫ້ລະອຽດ. ຕົ້ນປີ 2016, ລັດຖະບານໄດ້ປະກາດໃຊ້ມະຕິເລກທີ 844 ກ່ຽວກັບລະບົບຊີວະພາບດຳເນີນອາຊີບແຫ່ງຊາດ. ສະນັ້ນ, ສະເໜີໃຫ້ການນຳບັນດາແຂວງທີ່ຮັບຜິດຊອບຂົງເຂດນີ້ອ່ານກ່ຽວກັບລະບົບຊີວະພາບດຳເນີນທຸລະກິດ. ລັດຖະບານກໍພວມກະກຽມຢ່າງຕັ້ງໜ້າເພື່ອຍື່ນສະເໜີຕໍ່ສະພາແຫ່ງຊາດກົດໝາຍປັບປຸງກົດໝາຍຫຼາຍສະບັບທີ່ກ່ຽວຂ້ອງເຖິງສະພາບແວດລ້ອມແຫ່ງການລົງທຶນ ແລະ ດຳເນີນທຸລະກິດ, ເພື່ອແກ້ໄຂຂໍ້ຕິດຂັດໃຫ້ວິສາຫະກິດເພື່ອພັດທະນາ”.
ທີ່ວາລະປະຊຸມປະຈຳເດືອນຂອງລັດຖະບານຫວ່າງມໍ່ໆມານີ້, ລັດຖະບານຫວຽດນາມ ໄດ້ສຸມໃສ່ປຶກສາຫາລືກ່ຽວກັບວຽກງານສ້າງລະບອບລະບຽບການ, ໃນນັ້ນຈຸດສຸມແມ່ນ ກວດກາຄືນເລື່ອງປະກາດໃຊ້ບັນດາເອກະສານແນະນຳ ເພື່ອນຳບັນດາເນື້ອໃນປະຕິຮູບຂອງກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການລົງທຶນ ເຂົ້າຊີວິດຕົວຈິງ. ວຽກງານດັ່ງກ່າວແມ່ນສະແດງໃຫ້ເຫັນຄວາມຕັດສິນໃຈຂອງລັດຖະບານ, ນາຍົກລັດຖະມົນຕີ ເພື່ອແນໃສ່ສືບຕໍ່ຍູ້ແຮງການປະຕິຮູບກ່ຽວກັບກົນໄກ, ນະໂຍບາຍ, ປັບປຸງສະພາບແວດລ້ອມແຫ່ງການລົງທຶນ ດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ.