ການຄ້າໂລກພວມຢືນຢູ່ຕໍ່ໜ້າສິ່ງທ້າທາຍຫຼາຍຢ່າງ. ການບືນຕົວຂຶ້ນຂອງລັດທິອາລັກຂາດ້ານການຄ້າ, ສົງຄາມການຄ້າ, ອັນໄດ້ນາບຂູ່ທັງລະບອບນະໂຍບາຍການຄ້າຫຼາຍຝ່າຍ ແລະ ສອງຝ່າຍ. ເຖິງຢ່າງໃດກໍຕາມ ຫວຽດນາມ ຍາມໃດກໍມີທັດສະນະຖືການຄ້າເສລີເປັນສໍາຄັນຢ່າງສະເໝີຕົ້ນສະເໝີປາຍ ແລະ ຮັບຮູ້ບັນດາກາລະໂອກາດຮ່ວມມືທີ່ເປີດກວ້າງຢ່າງຈະແຈ້ງ. ທັງລັດຖະບານ ແລະ ວິສາຫະກິດຫວຽດນາມ ລ້ວນແຕ່ພວມມານະພະຍາຍາມກຳແໜ້ນກາລະໂອກາດການເຊື່ອມໂຍງ, ເປີດປະຕູ, ວາງເປົ້າໝາຍເຂົ້າຮ່ວມລະບົບຮ່ວມສຳພັນ, ສະໜອງຜະລິດຕະພັນທົ່ວໂລກ ສູງກວ່າອີກ.

        ໃນໄລຍະ 30 ປີ ຫວຽດນາມ ປະຕິບັດນະໂຍບາຍປ່ຽນແປງໃໝ່ ກໍແມ່ນເວລາຫວຽດນາມ ປະຕິບັດນະໂຍບາຍເປີດປະຕູ ແລະ ເຊື່ອມໂຍງ. ບັນດາຜົນງານຂອງຫວຽດນາມ ລ້ວນແຕ່ຕິດພັນກັບການປະຕິຮູບຕາມທິດຫັນເປັນເສລີ ແລະ ເປີດປະຕູ. ເຖິງຢ່າງໃດກໍຕາມ ບາງໄລຍະຍັງປະສົບກັບສິ່ງທ້າທາຍ ກໍຕາມ, ແຕ່ເບິ່ງລວມແລ້ວ ການເປີດເປີດປະຕູໄດ້ນຳມາເຊິ່ງຜົນປະໂຫຍດດ້ານການຄ້າອັນໃຫຍ່ຫຼວງໃຫ້ແກ່ຫວຽດນາມ.

        ມາຮອດປັດຈຸບັນ, ຫວຽດນາມ ໄດ້ເຂົ້າຮ່ວມເຂົ້ານຫຼາຍລະບົບມູນຄ່າທົ່ວໂລກ ຕາມວົງກວ້າງພໍສົມຄວນ ແຕ່ຍັງມີຫຼາຍວຽກຕ້ອງເຮັດ. ຕາມການສະຖິຕິແລ້ວ, ມີພຽງ 21% ຈໍານວນວິສາຫະກິດຂະໜາດນ້ອຍ ແລະ ຂະໜາດກາງຂອງຫວຽດນາມ ເຂົ້າຮ່ວມມືລະບົບມູນຄ່າທົ່ວໂລກ, ຕ່ຳກວ່າຫຼາຍ ເມື່ອທຽບໃສ່ອັດຕາສ່ວນ 46% ຂອງບັນດາປະເທດໃນພາກພື້ນ ອາຊຽນ. ອັດຕາມູນຄ່າເພີ່ມຂອງຫວຽດນາມໃນລະບົບສະໜອງຂອງໂລກ ຍັງບໍ່ທັນສົມກັບຄວາມສາມາດບົ່ມຊ້ອນ ແລະ ຄາດໝາຍທີ່ຫວຽດນາມ ວາງອອກ.

ກອງປະຊຸມ WEF ASEAN 2018 (ພາບ: baoquocte.vn)

        ທີ່ກອງປະຊຸມສຸດຍອດ ດຳເນີນທຸລະກິດຫວຽດນາມ ເມື່ອເດືອນກັນຍາ 2018 ຜ່ານມາ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ກໍ່ໄດ້ຊີ້ບັນດາສິ່ງທ້າທາຍດັ່ງກ່າວ. ທ່ານນາຍົກລັດຖະມົນຕີຖືວ່າ ເຖິງວ່າຫວຽດນາມ ຈະບັນລຸໄດ້ບັນດາຜົນງານເບື້ອງຕົ້ນ ໃນລະບົບສະໜອງທົ່ວໂລກກໍຕາມ, ແຕ່ຍັງມີວິສາຫະກິດຫວຽດນາມຫຼາຍແຫ່ງ ທີ່ເຂົ້າຮ່ວມລະບົບມູນຄ່າທົ່ວໂລກໃໝ່ ພຽງແຕ່ຢູ່ໃນຂັ້ນຕອນງ່າຍດາຍ ຄືຕິດຕັ້ງປະກອບ, ຫຸ້ມຫໍ່ຜະລິດຕະພັນ. ນີ້ແມ່ນບັນດາຂັ້ນຕອນຂອງລະບົບສະໜອງຜະລິດຕະພັນ ມີມູນຄ່າເພີ່ມຂຶ້ນບໍ່ສູງ:

        “ໃນສະພາບການຕົວຈິງນັ້ນ, ຫວຽດນາມ ພວມວາງເປົ້າໝາຍຍົກລະດັບ ແລະ ມີການຫັນປ່ຽນຫຼາຍກວ່າໃນລະບົບມູນຄ່າທົ່ວໂລກ, ເພີ່ມທະວີການຮ່ວມສຳພັນລະຫວ່າງບັນດາວິສາຫະກິດຫວຽດນາມ ແລະ ວິສາຫະກິດທີ່ມີເງິນລົງທຶນຈາກຕ່າງປະເທດ (FDI). ແຜນນະໂຍບາຍຮ່ວມສຳພັນລະຫວ່າງວິສາຫະກິດພາຍໃນ ແລະ ຕ່າງປະເທດ ແມ່ນແຜນນະໂຍບາຍສຳຄັນ ເຊິ່ງຫວຽດນາມພວມຜັນຂະຫຍາຍ”.

ທ່ານນາຍົກລັດຖະມົນຕີ ຫງວຽນຊວນຟຸກ ກ່າວຄໍາເຫັນທີ່ກອງປະຊຸມWEF ASEAN 2018 (ພາບ: baoquocte.vn)

        ເພື່ອປະຕິບັດແຜນນະໂຍບາຍດັ່ງກ່າວ, ລັດຖະບານໃຫ້ຄໍາໝັ້ນສັນຍາວ່າ ຈະສວມບົດບາດຫຼັກແຫຼ່ງໃນການກໍ່ສ້າງພັດທະນາ, ຮ່ວມເດີນທາງພ້ອມກັບວິສາຫະກິດ, ຫຼຸດຜ່ອນເງື່ອນໄຂດຳເນີນທຸລະກິດ, ຫຼຸດຜ່ອນຄ່າໃຊ້ຈ່າຍພະລາການ.... ເຖິງຢ່າງໃດກໍຕາມ, ທາງຝ່າຍວິສາຫະກິດ, ບັນດາວິສາຫະກິດຫວຽດນາມ ກໍພວມຍົກລະດັບດ້ວຍຕົນເອງ, ປັບປຸງກຳລັງຄວາມສາມາດໃນການຄຸ້ມຄອງບໍລິຫານ ແລະ ຄວາມໄຫວພິບໃນການເຄື່ອນໄຫວ, ເດີນຕາມລະບົບບັນດາມູນຄ່າ ກ່ຽວກັບວິໄສທັດຍາວໄກ. ໂດຍຢາກບືນຕົວຂຶ້ນໃນລະບົບສະໜອງຜະລິດຕະພັນ, ບັນດາວິສາຫະກິດຫວຽດນາມ ພວມສຸມໃສ່ຍູ້ແຮງຄຸນນະພາບຂອງຜະລິດຕະພັນ, ສ້າງຜະລິດຕະພັນຄົບຊຸດ ກ່ຽວກັບຄຸນນະພາບ, ຫັນປ່ຽນກຳລັງຄວາມສາມາດໃນການຜະລິດບັນດາຜະລິດຕະພັນມີຄຸນນະພາບຕ່ຳ ມາເປັນຜະລິດຕະພັນມີຄຸນນະພາບສູງ. ພິເສດແມ່ນຍົກສູງການໝູນໃຊ້ເຕັກໂນໂລຢີຂໍ້ມູນຂ່າວ, ເຊື່ອມຕໍ່ບັນດາເຄືອຂ່າຍທໍາການຜະລິດ ແລະ ລະບົບສະໜອງຜະລິດຕະພັນ ເພື່ອແນໃສ່ເພີ່ມລັກສະນະແກ້ງແຍ້ງຂອງບັນດາວິສາຫະກິດ. ເມື່ອສັງເກດກ່ຽວກັບການຫັນປ່ຽນຂອງວິສາຫະກິດ, ທ່ານ ຫວໍຈີ໊ແທັ່ງ, ຫົວໜ້າສະຖາບັນຄົ້ນຄວ້າຍຸດທະສາດກ່ຽວກັບເຄື່ອງໝາຍການຄ້າ ແລະ ການແກ້ງແຍ້ງ ຖືວ່າ:

        “ປັດຈຸບັນ ວິສາຫະກິດກໍຮັບຮູ້ດີກວ່າ, ບັນດານັກວາງແຜນກຳນົດນະໂຍບາຍ ກໍມີການຮັບຮູ້ດີກວ່າ, ວິສາຫະກິດກໍເຂົ້າໃນວ່າ ລະບົບສະໜອງຜະລິດຕະພັນ ບໍ່ພຽງແຕ່ຫຼຸດຜ່ອນຄ່າໃຊ້ຈ່າຍຝ່າຍດຽວເທົ່ານັ້ນ ຫາກມັນແມ່ນສະມັດຕະພາບ, ແມ່ນກຳລັງຄວາມສາມາດຂອງການແກ້ງແຍ້ງ. ສິ່ງສຳຄັນໃນປັດຈຸບັນ ແມ່ນໝູນໃຊ້ການຫັນປ່ຽນເປັນດີຈີຕອນ”.

        ເພື່ອໜູນຊ່ວຍບັນດາວິສາຫະກິດຍົກສູງກຳລັງຄວາມສາມາດໃນການແກ້ງແຍ້ງ, ໝູນໃຊ້ບັນດາເຕັກໂນໂລຢີຢ່າງທັນການ ເຊິ່ງການປະຕິວັດອຸດສາຫະກຳ ຄັ້ງທີ 4 ນໍາມາໃຫ້, ທ່ານ ຫວູຕ໊ຽນໂລກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ ໃຫ້ຮູ້ວ່າ:

        “ຫ້ອງການການຄ້າ ແລະ ອຸດສາຫະກຳຫວຽດນາມ ຮ່ວມແຮງຮ່ວມໃຈກັບລັດຖະບານ ເພື່ອປະຕິບັດບັນດາເປົ້າໝາຍຮ່ວມຍົກສູງ ແລະ ມີການຫັນປ່ຽນຫຼາຍກວ່າໃນລະບົບຮ່ວມສຳພັນທົ່ວໂລກ. ປັດຈຸບັນ, ຫ້ອງການການຄ້າ ແລະ ອຸດສາຫະກຳຫວຽດນາມ ມີສູນຄອມພິວເຕີສໍາລັບວິສາຫະກິດ ແລະພວກເຮົາກໍພວມຜັນຂະຫຍາຍການຄົ້ນຄວ້າຫຼາຍຢ່າງ ກໍຄື ສ້າງຕັ້ງບັນດາໂຄງການເພື່ອໜູນຊ່ວຍບັນດາວິສາຫະກິດປະຕິບັດການຫັນບັນດາວິສາຫະກິດເປັນດີຈີຕອນ, ບໍ່ພຽງແຕ່ບັນດາວິສາຫະກິດຂະໜາດໃຫຍ່ເທົ່ານັ້ນ ຫາກນັບທັງບັນດາວິສາຫະກິດຂະໜາດນ້ອຍ ແລະ ກາງອີກດ້ວຍ ເພື່ອຊ່ວຍວິສາຫະກິດສາມາດປະຕິບັດຫັນການຄຸ້ມຄອງ, ການດໍາເນີນທຸລະກິດເປັນດີຈີຕອນໃນ. ນັ້ນແມ່ນທິດທາງໜຶ່ງ ເຊິ່ງພວກຂ້າພະເຈົ້າພວມຜັນຂະຫຍາຍ.”

          ສະພາບການການເມືອງຢູ່ພາຍໃນພາກພື້ນ ແລະໃນໂລກມີຄວາມສະຖຽນລະພາບ, ບັນດາປັດໄຈກ່ຽວກັບເສດຖະກິດຂອງຫວຽດນາມ ກໍ່ໄດ້ຮັບການຮັກສາເປັນປົກກະຕິ, ແຫຼ່ງແຮງງານມີຈໍານວນຫຼວງຫຼາຍ, ອົງປະກອບແຮງງານໜຸ່ມກວ່າໝູ່ໃນ ອາຊຽນ ແລະ ໄດ້ຮັບການບຳລຸງສ້າງ, ມີຄວາມສາມາດຮັບເອົາ ແລະ ກຳແໜ້ນເຕັກໂນໂລຢີໄດ້ຢ່າງວອງໄວ... ສິ່ງດັ່ງກ່າວ ພວມຊ່ວຍໃຫ້ຫວຽດນາມ ສາມາດຮັກສາທ່າໄດ້ປຽບ ເພື່ອເຂົ້າຮ່ວມຕະຫຼາດໂລກໄດ້ເລິກເຊິ່ງກວ່າ. ເລື່ອງຫວຽດນາມ ເຂົ້າຮ່ວມບັນດາສັນຍາການຄ້າ ກໍປະກອບສ່ວນເປີດປະຕູເຊື່ອມຕໍ່, ເຂົ້າຮ່ວມບັນດາລະບົບມູນຄ່າ ແລະ ການຜະລິດທົ່ວໂລກເລິກເຊິ່ງກວ່າ.