ແຜນກຳນົດແຂວງກວ໋າງນິງ ໄລຍະ 2021 – 2030, ວິໄສທັດຮອດປີ 2050 ໄດ້ຮັບການຮັບຮອງເອົາຢູ່ກອງປະຊຸມຄັ້ງທີ 4 ທີ່ດຳເນີນໃນວັນທີ 16 ມິຖຸນາ ຈະແມ່ນພື້ນຖານສຳຄັນຂອງທ້ອງຖິ່ນເມື່ອໄດ້ສຳເລັດການສັບຊ້ອນບັນດາຫົວໜ່ວຍບໍລິຫານ, ວິວັດການດຳເນີນຮູບແບບອຳນາດການປົກຄອງທ້ອງຖິ່ນສອງຂັ້ນເປັນປົກກະຕິເທື່ອລະກ້າວ. ຕາມທ່ານ ກວານມິງເກື່ອງ ເລຂາຄະນະພັກແຂວງແລ້ວ, ການປັບປຸງແຜນກຳນົດແຂວງໄລຍະ 2021 – 2030, ວິໄສທັດຮອດປີ 2050 ແມ່ນເພື່ອແນໃສ່ຮັບປະກັນຄວາມເປັນເອກະພາບ, ຄົບຊຸດດ້ວຍແຜນກຳນົດສັງລວມແຫ່ງຊາດ, ບັນດາແຜນກຳນົດເຂດ ແລະແຜນກຳນົດຂະແໜງ, ພ້ອມທັງຕອບສະໜອງຄວາມຕ້ອງການພັດທະນາເສດຖະກິດ - ສັງຄົມໃນໄລຍະໃໝ່, ເສີມຂະຫຍາຍຄວາມສາມາດບົ່ມຊ້ອນ, ທ່າໄດ້ປຽບ, ຖານະບົດບາດຂອງແຂວງກວາງນິງ ໃນເຂດທົ່ງພຽງແມ່ນ້ຳແດງ ແລະ ໃນທົ່ວປະເທດໃຫ້ຫຼາຍທີ່ສຸດ. ໃນນັ້ນມີແຜນນະໂຍບາຍຂອງກົມການເມືອງກ່ຽວກັບການສ້າງນະຄອນຂຶ້ນກັບສູນກາງ, ແຂວງກວ໋າງນິງໄດ້ສະເໜີປັບປຸງແຜນກຳນົດແຂວງ ໂດຍຕິດແທດບັນດາແຜນນະໂຍບາຍ, ທິດທາງໃຫຍ່ຂອງສູນກາງ.
ມະຕິຂອງສະພາປະຊາຊົນແຂວງກ໋ວາງນິງຢູ່ກອງປະຊຸມຄັ້ງທີ 4 ທີ່ດຳເນີນໃນວັນທີ 16 ມິຖຸນາ, ກໍ່ຊີ້ແຈ້ງວ່າ ກວ໋າງນິງຍົກຕົວເລກຄາດໝາຍລະດັບເຕີບໂຕລວມຍອດຜະລິດຕະພັນໃນທ້ອງຖິ່ນ (GRDP) ສະເລ່ຍ ໄລຍະ 2026 – 2030 ຈາກ 10% ຂຶ້ນເປັນ 12%/ປີ, GRDP ສະເລ່ຍຕໍ່ຫົວຄົນຮອດປີ 2030 ສູ້ຊົນໃຫ້ບັນລຸປະມານ 20.000 USD, ເສດຖະກິດດີຈີຕອນກາຍເປັນທິດທາງຕະຫຼອດ, ຕິດພັນກັບພື້ນຖານໂຄງລ່າງດີຈີຕອນ, ຂໍ້ມູນດີຈີຕອນ ແລະ ອຳນາດການປົກຄອງດີຈີຕອນ. ທ່ານ ຫວູວັນຢຽນ, ຮອງປະທານຜູ້ປະຈຳການຄະນະກຳມະການປະຊາຊົນແຂວງກ໋ວາງນິງເນັ້ນໜັກວ່າ ແຜນກຳນົດທີ່ໄດ້ຮັບການປັບປຸງຈະເປີດທ່າໄດ້ປຽບໃໝ່, ຄືເສັ້ນທາງແຄມທະເລທາງທິດຕາເວັນອອກຈະຫຼຸດໄລຍະທາງຈາກເວິນດົນ ໄປຍັງ ຂົວບັກລວນ III ໃຫ້ສັ້ນລົງ, ເສັ້ນທາງທິດຕາເວັນຕົກ ຕິດເຊື່ອມຕໍ່ສະໜາມບິນ ຢາບິ່ງ (ແຂວງບັກນິງ), ກັບດ່ານຊາຍແດນ ເຕິນແທັງ (ແຂວງລ້າງເຊີນ):
“ສ້າງເສັ້ນທາງຄວາມໄວສູງໃໝ່ບົນພື້ນຖານເສັ້ນທາງແຄມແມ່ນ້ຳ, ເຊື່ອມຕໍ່ກັບເສັ້ນທາງຄວາມໄວສູງ ຫ໋າຍຝ່ອງ - ຢາບິ່ງ, ສະຖານີລົດໄຟ ນິງຊ້າ ຊ່ວຍໃຫ້ເຂດມໍລະດົກວັດທະນະທຳອຽນຕື ໄດ້ຮັບການເຊື່ອມຕໍ່ຢ່າງຄົບຊຸດ. ເຂດສຸດທ້າຍ ບາແຈ້ ຕິດກັບລ້າງເຊີນ ເມື່ອຜັນຂະຫຍາຍຕາມແຜນກຳນົດເທື່ອລະກ້າວແລ້ວ ຈາກເຂດນີ້ໄປຫາສະຖານີລົດໄຟ ຮະລອງ ໃຊ້ເວລາບໍ່ເກີນ 30 ນາທີ, ສ້າງເປັນເຂດທີ່ມີຄວາມສາມາດບົ່ມຊ້ອນ ບົນເນື້ອທີ່ດິນຮາບພຽງກວ່າ 2.800 ເຮັກຕາທີ່ສາມາດຂຸດຄົ້ນໄດ້ໃນທັນທີ. ນັບແຕ່ປຶກສາຫາລືການວາງແຜນກຳນົດເທົ່ານັ້ນ, ທາງແຂວງກວ໋າງນິງໄດ້ຮັບຄວາມສົນໃຈຈາກນັກລົງທຶນຍຸດທະສາດຈຳນວນໜຶ່ງ”.
ເປົ້າໝາຍຂອງແຜກກຳນົດແມ່ນສ້າງແຂວງນິງໃຫ້ກາຍເປັນປະຕູເຊື່ອມຕໍ່ກັບສາກົນ, ສູນການບໍລິການ ແລະການທ່ອງທ່ຽວສາກົນ, ສູນເສດຖະກິດທະເລແຫ່ງຊາດ, ພັດທະນາຕົວເມືອງທະເລສີວິໄລ, ທັນສະໄໝ, ສີຂຽວ, ຍືນຍົງ, ມີຄຸນນະພາບຊີວິດສູງບັນລຸມາດຕະຖານສາກົນ ແລະ ນຳໜ້າໃນການນະວັດຕະກຳ. ນີ້ແມ່ນແຜນກຳນົດທີ່ມີຄວາມໝາຍສຳຄັນພິເສດ, ສ້າງພື້ນຖານໃຫ້ແກ່ການພັດທະນາໄລຍະຍາວຂອງແຂວງໃນຊຸມທົດສະວັດຈະມາເຖິງ. ເພາະສະນັ້ນ, ບັນດາໜ້າທີ່, ວິທີການແກ້ໄຂເພື່ອຫັນແຜນກຳນົດໃຫ້ປະກົດຜົນເປັນຈິງ ຕ້ອງໄດ້ຮັບການຜັນຂະຫຍາຍນັບແຕ່ປັດຈຸບັນດ້ວຍຄວາມຕັດສິນໃຈດ້ານການເມືອງສູງ ແລະ ການເຂົ້າຮ່ວມຢ່າງຄົບຊຸດຂອງທັງລະບົບການເມືອງ.
ຢູ່ກອງປະຊຸມຄັ້ງທີ 4 ສະພາປະຊາຊົນແຂວງກວ໋າງນິງ, ບັນດາຜູ້ແທນໄດ້ສະເໜີຍູ້ແຮງການປະຕິບັດບັນດາໂຄງການ, ເປົ້າໝາຍຂອງແຜນກຳນົດ… ທ່ານ ຮວ່າງບານາມ, ປະທານສະພາປະຊາຊົນຕາແສງຮະລອງ, ສະເໜີພ້ອມກັບເປົ້າໝາຍເຕີບໂຕເສດຖະກິດ, ການຜັນຂະຫຍາຍແຜນກຳນົດຕ້ອງຕິດພັນກັບການອະນຸລັກຮັກສາ ແລະ ເສີມຂະຫຍາຍບັນດາຄຸນຄ່າວັດທະນະທຳທີ່ເປັນມູນເຊື້ອ, ປົກປັກຮັກສາສິ່ງແວດລ້ອມ, ການພັດທະນາສີຂຽວ ແລະ ຍືນຍົງ. ແຂວງກວ໋າງນິງກໍ່ຕ້ອງໃຫ້ບຸລິມະສິດລົງທຶນພັດທະນາບັນດາຂົງເຂດຄື: ການແພດ, ການສຶກສາ, ຍົກສູງຄຸນນະພາບການດຳລົງຊີວິດ, ຮັບປະກັນໃຫ້ປະຊາຊົນໄດ້ຊົມໃຊ້ບັນດາຜົນງານຂອງການພັດທະນາຢ່າງແທ້ຈິງ.
“ການປັບປຸງຕ້ອງຮັບປະກັນລັກສະນະສືບທອດ, ບໍ່ກໍ່ຄວາມສັບສົນປົນເປ, ສ້າງຄວາມອຸ່ນອ່ຽນໃຈໃຫ້ແກ່ບັນດານັກລົງທຶນ. ຕ້ອງໃຫ້ບຸລິມະສິດສະຫງວນແຫຼ່ງກຳລັງເພື່ອສຸມໃສ່ໜ້າທີ່ຈຳນວນໜຶ່ງ, ສະຫງວນທີ່ດິນເພື່ອພັດທະນາເຮືອນຢູ່ສັງຄົມ, ເຮືອນໃຫ້ເຊົ່າ, ລົງທຶນໃຫ້ແກ່ການກຳຈັດນ້ຳເສຍຢູ່ບັນດາເຂດຕົວເມືອງ ຕິດພັນກັບການປົກປັກຮັກສາອ່າວຮະລອງ, ເຊິ່ງແມ່ນມໍລະດົກທຳມະຊາດໂລກ”.
ຕາມທ່ານນາງ ຈິ້ງທິມິງແທັງ, ປະທານສະພາປະຊາຊົນແຂວງກວ໋າງນິງແລ້ວ, ທາງແຂວງກວ໋າງນິງສືບຕໍ່ບູລະນະກົງຈັກການຈັດຕັ້ງໃຫ້ສົມບູນ, ສ້າງຖັນແຖວພະນັກງານຕອບສະໜອງຄວາມຮຽກຮ້ອງຕ້ອງການພັດທະນາໃນໄລຍະໃໝ່. ພ້ອມທັງສຸມໃສ່ຂຸດຄົ້ນບັນດາຄວາມສາມາດບົ່ມຊ້ອນໃນຂົງເຂດອຸດສາຫະກຳວັດທະນະທຳ, ອຸດສາຫະກຳການທ່ອງທ່ຽວຢ່າງມີປະສິດທິຜົນ, ຍູ້ແຮງການພັດທະນາກະສິກຳ, ເສດຖະກິດທະເລ ແລະ ປູກລ້ຽງສິນທະເລ, ໝູນໃຊ້ທ່າໄດ້ປຽບກ່ຽວກັບທີ່ຕັ້ງພູມີສາດ ແລະ ລະບົບພື້ນຖານໂຄງລ່າງເພື່ອພັດທະນາບໍລິການ logistics, ການເຄື່ອນໄຫວນຳເຂົ້າສົ່ງອອກ ແລະ ບັນດາຂະແໜງອຸດສາຫະກຳ. ຈາກນັ້ນ, ສ້າງພື້ນຖານນິຕິກຳ ແລະ ກຳລັງໜູນໃໝ່ໃຫ້ແກ່ວິວັດການພັດທະນາຂອງແຂວງໃນໄລຍະຈະມາເຖິງ.
“ຮີບດ່ວນຫັນແຜນກຳນົດແຂວງເປັນບັນດາໂຄງການ, ແຜນຮ່າງ ແລະ ໂຄງການຈຸດສຸມໃຫ້ລະອຽດ. ພ້ອມທັງປ່ຽນແປງໃໝ່ຈິນຕະນາການ, ລະດົມ ແລະ ນຳໃຊ້ແຫຼ່ງກຳລັງຕາມທິດທີ່ມີປະສິດທິຜົນ, ຍືນຍົງ, ເສີມຂະຫຍາຍບົດບາດນຳພາຂອງການລົງທຶນສາທາລະນະ, ແກ້ໄຂຮົ້ວກີດຂວາງແຫຼ່ງກຳລັງສັງຄົມ, ສ້າງກຳລັງໜູນເຕີບໂຕໃໝ່ ແລະ ຫັນການປະຕິບັດບັນດາເປົ້າໝາຍພັດທະນາທີ່ໄດ້ລະບຸໃນແຜນກຳນົດສະບັບປັບປຸງໃຫ້ປະກົດຜົນເປັນຈິງ”.
ການກຳນົດທິດພັດທະນາຕາມຮູບແບບລະບົບຕົວເມືອງຫຼາຍຂົ້ວ, ຫຼາຍສູນກາງ, ກວ໋າງນິງມີບາດກ້າວຫັນປ່ຽນຈາກການພັດທະນາຕາມເຂດແດນບໍລິຫານມາຍັງການພັດທະນາຕາມບົດບາດໜ້າທີ່. ການປັບປຸງແຜນກຳນົດແຂວງຂອງກວ໋າງນິງບໍ່ພຽງແຕ່ສ້າງກຳລັງໜູນໃໝ່ໃຫ້ແກ່ການເຕີບໂຕເທົ່ານັ້ນ ຫາກຍັງແມ່ນພື້ນຖານນິຕິກຳທີ່ສຳຄັນເພື່ອປະຕິບັດເປົ້າໝາຍສ້າງນະຄອນກວ໋າງນິງກາຍເປັນນະຄອນຂຶ້ນກັບສູນກາງໃຫ້ປະກົດຜົນເປັນຈິງ, ພ້ອມທັງມຸ່ງໄປເຖິງວິໄສທັດກາຍເປັນນະຄອນທະເລ - ມໍລະດົກທີ່ມີເຄື່ອງໝາຍການຄ້າທົ່ວໂລກ, ມີການພັດທະນາສີຂຽວ, ອັດສະລິຍະ ແລະ ຍືນຍົງ.
