ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງ ຫວຽດນາມ (VOV5) ໄດ້ຮັບຈົດໝາຍ, ອີເມວ 361 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 34 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 26 ສະບັບຈາກທ່ານຜູ້ຟັງລາວ.
ເພື່ອນ ແສງດາວົງ ຢູ່ແຂວງ ອັດຕະປື ໄດ້ສົ່ງຂໍ້ຄວາມມາຫາລາຍການສະແດງຄວາມສົນໃຈເຖິງສະພາບການພັດທະນາເສດຖະກິດຂອງ ຫວຽດນາມ. ເພື່ອນໄດ້ຂຽນວ່າ: “ຂ້າພະເຈົ້າມີຄວາມປະທັບໃຈຕໍ່ເລື່ອງ ຫວຽດນາມ ພວມຫັນປ່ຽນທິດນະໂຍບາຍດຶງດູດການລົງທຶນ, ໂດຍໄດ້ສຸມເຂົ້າໃນການດຶງດູດການລົງທຶນ FDI ທີ່ມີຄຸນນະພາບສູງ ແລະ ການລົງທຶນຈາກຕ່າງປະເທດ, ຜ່ານນັ້ນ, ກໍ່ເປີດຫຼາຍໂອກາດການຮ່ວມມືກັບ ລາວ ກວ່າອີກ. ໃນອະນາຄົດ, ຂ້າພະເຈົ້າຫວັງວ່າ ການຮ່ວມມືລະຫວ່າງ 2 ປະເທດຈະສືບຕໍ່ໄດ້ຮັບການເປີດກວ້າງໄປສູ່ຫຼາຍຂົງເຂດໃໝ່”.
+ ເພື່ອນ ວົງຄຳ, ມາຈາກນະຄອນຫຼວງ ວຽງຈັນ, ໄດ້ສົ່ງຈົດໝາຍມາຫາລາຍການໂດຍແບ່ງປັນວ່າ: "ພາຍຫຼັງໄປທ່ອງທ່ຽວຢູ່ແຂວງ ກວາງນິງ ກ່ອນນີ້ເປັນເວລາຫຼາຍປີ ແລະ ບໍ່ດົນມານີ້ຂ້າພະເຈົ້າໄດ້ໄປຢ້ຽມຢາມແຂວງ ກວາງນິງ ອີກເທື່ອໜຶ່ງ. ຂ້າພະເຈົ້າຮູ້ສຶກແປກປະຫຼາດໃຈເມື່ອເຫັນໂສມໜ້າໃໝ່ຂອງນະຄອນ ກວາງນິງ ທີ່ມີການປ່ຽນແປງຫຼາຍຢ່າງ. ເຊິ່ງເປັນນະຄອນທີ່ພວມບືນຕົວຂຶ້ນຢ່າງແຮງ ບົນພື້ນຖານທີ່ຕັ້ງບົດບາດໃໝ່ ແລະ ມີພື້ນທີ່ການພັດທະນາທີ່ກວ້າງຂວາງກວ່າ. ຂ້າພະເຈົ້າຫວັງວ່າ ການໄປຢ້ຽມຢາມແຂວງ ກວາງນິງ ໃນຄັ້ງຈະມາເຖິງນີ້, ນະຄອນຈະສືບຕໍ່ພັດທະນາໃຫ້ກາຍເປັນນະຄອນທີ່ຂະຫຍັນຂັນເຄື່ອນ ແລະ ແມ່ນສະຖານທີ່ທ່ອງທ່ຽວທີ່ດຶງດູດແຂກທ່ອງທ່ຽວຫຼາຍກວ່າເກົ່າ".
+ ເພື່ອນ ບຸນທັນ ໄດ້ສົ່ງອີເມວມາຫາລາຍການໂດຍແບ່ງປັນວ່າ: “ຂ້າພະເຈົ້າຂໍສົ່ງຄຳຊົມເຊີຍວິທະຍຸກະຈາຍສຽງ ຫວຽດນາມ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງຄົບຮອບ 81 ປີ. ໃນຕະຫຼອດ 81 ປີຜ່ານມາ, VOV5 ຍາມໃດກໍ່ເປັນຂົວເຊື່ອມຕໍ່ທີ່ສຳຄັນ ເຊື່ອມຕໍ່ນ້ຳໃຈມິດຕະພາບ ແລະ ຄວາມເຂົ້າໃຈເຊິ່ງກັນແລະກັນລະຫວ່າງ ຫວຽດນາມ ແລະ ປະຊາຄົມສາກົນ, ໂດຍສະເພາະແມ່ນລະຫວ່າງ ລາວ ແລະ ຫວຽດນາມ. ຜ່ານບັນດາລາຍການ, ພວກເພື່ອນໄດ້ ແລະ ພວມສືບຕໍ່ຊຸກຍູ້ການແລກປ່ຽນວັດທະນະທຳ, ຄວາມເຄົາລົບເຊິ່ງກັນແລະກັນ ແລະ ການທູດປະຊາຊົນ. ປະຈຸບັນ, ວິທະຍຸກະຈາຍສຽງ ຫວຽດນາມ ພວມນັບມື້ນັບພັດທະນາໃນຫຼາຍພື້ນຖານໂປຼແກຼມ ແລະ ພາຫະນະເພື່ອ ຖ່າຍທອດສິ່ງທີ່ພວມເກີດຂຶ້ນຢູ່ພາຍໃນປະເທດ ແລະ ຕ່າງປະເທດຢ່າງສັດຊື່”.
ລາຍການພາກພາສາລາວ ຂໍຂອບໃຈບັນດາທ່ານຜູ້ຟັງທີ່ໄດ້ໂທລະສັບ, ສົ່ງອີເມວ ແລະ ຈົດໝາຍມາຫາລາຍການໃນຕະຫຼອດໄລຍະຜ່ານມາ. ໃນໄລຍະຈະມາເຖິງ, ຫວັງວ່າ ພວກຂ້າພະເຈົ້າຈະສືບຕໍ່ໄດ້ຮັບຄຳເຫັນປະກອບ, ການແບ່ງປັນຂອງທ່ານຜູ້ຟັງຫຼາຍກວ່າອີກ ເພື່ອຊ່ວຍໃຫ້ທາງລາຍການນັບມື້ນັບອຸດົມສົມບູນຂຶ້ນຕື່ມ.
+ ເພື່ອນ ວົງຄຳ, ຢູ່ແຂວງ ອຸດົມໄຊ, ໄດ້ສົ່ງອີເມວມາຫາລາຍການຢາກຊອກຮູ້ກ່ຽວກັບບັນດາເຍື່ອງອາຫານເຂົ້າໜຽວຂອງ ຫວຽດນາມ. ເຂົ້າໜຽວມີວິທີປຸງແຕ່ງຫຼາຍວິທີບໍ? ເຂົ້າໜຽວປະເພດໃດແຊບທີ່ສຸດ?
ເພື່ອນ ວົງຄຳ ທີ່ຮັກແພງ! ສຳລັບປະເທດທີ່ມີພື້ນຖານວັດທະນະທຳປູກເຂົ້ານາທາມຄື ຫວຽດນາມ, ບັນດາເຍື່ອງທີ່ເຮັດຈາກເຂົ້າ ຍາມໃດກໍ່ມີບົດບາດສຳຄັນໃນພື້ນຖານອາຫານການກິນ. ເຂົ້າສານມີຢູ່ໃນເຍື່ອງອາຫານປະຈຳວັນເກືອບທຸກປະເພດ, ນັບຕັ້ງແຕ່ອາຫານຄອບຄົວທີ່ຖືເຂົ້າສານເປັນຈຸດຫຼັກ, ໄປເຖິງເຍື່ອງອາຫານເຊັ່ນ: ເຝີ, ເຂົ້າປຸ້ນ, ບັນກວັນ, ເຂົ້າຕົ້ມ, ບັນໄຢ່... ນອກຈາກນັ້ນ, ຍັງມີອາຫານທີ່ໄດ້ຮັບຄວາມນິຍົມທີ່ສຸດອີກຢ່າງໜຶ່ງນັ້ນຄື ເຂົ້າໜຽວ. ເຂົ້າໜຽວມີຢູ່ໃນຊີວິດຂອງຊາວ ຫວຽດນາມ ມາແຕ່ສະໄໝບູຮານ... ແຕ່ເຂົ້າໜຽວກໍ່ຍັງມີການປຸງແຕ່ງເປັນຫຼາຍເຍື່ອງຫຼາຍແບບທີ່ຕ່າງກັນ. ຕໍ່ໄປນີ້, ພວກຂ້າພະເຈົ້າຂໍແນະນຳເຍື່ອງອາຫານເຂົ້າໜຽວທີ່ເຮັດເປັນຫຼາຍເຍື່ອງຫຼາຍແບບເຊິ່ງຊາວ ຫວຽດນາມ ມັກກິນ ໄປເຖິງທ່ານຜູ້ຟັງ.
- ເຂົ້າໜຽວແຊ້ວ: ອາຫານທີ່ເປັນເອກະລັກສະເພາະຂອງພາກເໜືອ ຫວຽດນາມ ນີ້ ມີສີເຫຼືອງເຮັດດ້ວຍຂີ້ຫມິ້ນ, ກິນກັບຖົ່ວຂຽວບົດ ປັ້ນເປັນກ້ອນ, ຫົວຜັກບົ່ວຈຽວກອບ ແລະ ນ້ຳມັນຈຽວຜັກບົ່ວ.
- ເຂົ້າໜຽວໝາກເຂົ້າ: ສີແດງທຳມະຊາດຂອງມັນມາຈາກເນື້ອໝາກເຂົ້າ, ເຊິ່ງເປັນສັນຍະລັກຂອງຄວາມໂຊກດີ, ມັກຈະເຫັນໃນບັນດາໂອກາດວັນບຸນ, ບຸນເຕັດ, ງານແຕ່ງດອງ.
- ເຂົ້າໜຽວວໍ່: ເມັດເຂົ້າໜຽວຕຳແຫຼກ, ໂອບຫໍ່ດ້ວຍຖົ່ວຂຽວ, ມີກິ່ນຫອມ, ລົດຊາດຂອງມັນໄກ່ ຫຼື ນ້ຳມັນ.
- ເຂົ້າໜຽວໄກ່/ເຂົ້າໜຽວເຄັມ: ແມ່ນການປະສົມເຂົ້າໜຽວກັບໄກ່ຈີກຝອຍ, ຢໍ່, ໄສ້ກອກ, ປາເຕ້, ຫຼື ໄຂ່ລວກ.
- ເຂົ້າໜຽວຫ້າສີ: ເຊິ່ງເປັນເຍື່ອງອາຫານເຂົ້າໜຽວພື້ນເມືອງຂອງພໍ່ແມ່ປະຊາຊົນຢູ່ເຂດພູສູງ, ລະບາຍສີໂດຍໃຊ້ໃບພືດທຳມະຊາດ.
ດັ່ງກ່າວມາຂ້າງເທິງນີ້ແມ່ນເຂົ້າໜຽວບາງຊະນິດທີ່ໄດ້ຂາຍຢູ່ຮ້ານອາຫານ, ຕະຫຼາດ ແລະ ຮ້ານຂາຍເຄື່ອງຕາມຖະໜົນ... ແລະເຖິງວ່າໄດ້ຂາຍດ້ວຍຮູບແບບໃດກໍ່ຕາມ, ໃນຈິດໃຈຂອງຊາວ ຫວຽດນາມ, ເຂົ້າໜຽວຍັງຕິດພັນກັບຮູບພາບອາຫານເຍື່ອງໜຶ່ງທີ່ແຊບໆ. ຢູ່ ຫວຽດນາມ, ເຂົ້າໜຽວຍັງປະກົດຢູ່ໃນນິທານພື້ນເມືອງເຊັ່ນ: ເລື່ອງເສດຖີ ແລະ ບັກ ເບີ່ມ ມີຊື່ສຽງ, ເມື່ອ ເບີ່ມ ບໍ່ຢາກໄດ້ຫຍັງຫຼາຍກວ່າເຂົ້າໜຽວໜຶ່ງກຳມື: "ເສດຖີຂໍແລກເຂົ້າໜຽວໜຶ່ງກຳມື ເພື່ອເອົາວີ, ເບີ່ມ ຫົວຂວັນ". ເລື່ອງນີ້ເວົ້າເຖິງຄວາມແຕກຕ່າງໃນທັດສະນະຄຸນຄ່າ ລະຫວ່າງ ເດັກນ້ອຍ ແລະ ຜູ້ໃຫຍ່, ໃນຂະນະທີ່ຜູ້ໃຫຍ່ຄິດວ່າສິ່ງອື່ນໆມີຄຸນຄ່າຫຼາຍກວ່າ, ສຳລັບເດັກນ້ອຍ, ພຽງແຕ່ເຂົ້າໜຽວທີ່ແຊບໆໜຶ່ງກຳມື ກໍພຽງພໍທີ່ຈະເຮັດໃຫ້ມີຄວາມສຸກ ໄດ້ໝົດມື້.
ທ່ານຜູ້ຟັງ, ຜູ້ອ່ານທີ່ເຄົາລົບ, ເພື່ອສ້າງຄວາມສະດວກໃຫ້ແກ່ການຕິດຕາມບັນດາຄຳເຫັນປະກອບ, ຄຳຖາມເຊິ່ງທ່ານຜູ້ຟັງໄດ້ສົ່ງມາຫາລາຍການ, ເລີ່ມແຕ່ເດືອນ ກັນຍາ ນີ້, ເພື່ອນສາມາດຮັບຟັງລາຍການ ໂອ້ລົມກັບເພື່ອນລາວ ໃນແອັບ spotyfy ດ້ວຍຊື່ວ່າ VOV LAO. ພວກຂ້າພະເຈົ້າຫວັງວ່າ ຈະໄດ້ຮັບຫຼາຍຄຳເຫັນປະກອບຈາກທ່ານຜູ້ຟັງ ສົ່ງມາຫາລາຍການຕື່ມອີກ, ເພື່ອປະກອບສ່ວນໃຫ້ລາຍການນັບມື້ນັບດີກວ່າເກົ່າ, ເຂົ້າເຖິງຜູ້ຟັງໄດ້ຫຼາຍຂຶ້ນ.
