ກອງປະຊຸມທາບທາມດ້ານການເມືອງຫວຽດນາມ-ໄທຄັ້ງທີ 5
(ພາບປະກອບ)
(vovworld) - ວັນທີ 29/6, ຢູ່ຮ່າໂນ້ຍ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ເລຮ່ວາຍຈູງ ແລະ ທ່ານເລຂາປະຈຳການກະຊວງການຕ່າງປະເທດໄທ ນໍຣະຈິດ ສິງຫາເສນີ ໄດ້ເປັນປະທານຮ່ວມ ກອງປະຊຸມທາບທາມດ້ານການເມືອງຫວຽດນາມ - ໄທ ຄັ້ງທີ 5 ລະຫວ່າງກະຊວງການຕ່າງປະເທດຫວຽດນາມ ແລະ ກະຊວງການຕ່າງປະເທດໄທ. ທີ່ການປະຊຸມສອງຝ່າຍເຫັນດີຕີລາຄາການພົວພັນມິດຕະພາບ ແລະ ຄູ່ຮ່ວມມືຍຸດທະສາດລະຫວ່າງສອງປະເທດພວມພັດທະນາຢ່າງຈົບງາມໃນທຸກຂົງເຂດ. ສອງຝ່າຍເຫັນດີເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນໃນໄລຍະຈະມາເຖິງ; ສົມທົບກັນກະກຽມກອງປະຊຸມຄະນະລັດຖະບານລວມຄັ້ງທີ 3 ໂດຍນາຍົກລັດຖະມົນຕີສອງປະເທດເປັນປະທານຮ່ວມໃຫ້ດີ; ຍູ້ແຮງການຮ່ວມມືລະຫວ່າງສອງປະເທດໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນ. ຄົມມະນາຄົມ, ການທ່ອງທ່ຽວ, ການອອກແຮງງານ… ໃນນັ້ນມີການຊຸກຍູ້ການເຊັນບົດບັນທຶກຊ່ວຍຈຳກ່ຽວກັບການຮ່ວມມືແຮງງານ ແລະ ຂໍ້ຕົກລົງກ່ຽວກັບການຮັບສະໝັກແຮງງານ. ສອງຝ່າຍກໍ່ເຫັນດີສືບຕໍ່ເພີ່ມທະວີການພົວພັນຮ່ວມມືອັນດີງາມລະຫວ່າງ ກະຊວງການຕ່າງປະເທດຫວຽດນາມ - ໄທ. ສົມທົບກັນຜັນຂະຫຍາຍຂໍ້ຕົກລົງຮ່ວມມືລະຫວ່າງ ກະຊວງການຕ່າງປະເທດຫວຽດນາມ - ໄທ. ສອງຝ່າຍເຫັນດີຈະຈັດຕັ້ງ ກອງປະຊຸມທາບທາມດ້ານການເມືອງຫວຽດນາມ - ໄທ ຄັ້ງທີ 6 ລະຫວ່າງ ກະຊວງການຕ່າງປະເທດຫວຽດນາມ - ໄທ ຢູ່ໄທ ໃນປີ 2016.