(vovworld) – ວັນທີ 07/10, ຢູ່ນະຄອນຫຼວງ ກົວລາລຳເປີ ໄດ້ໄຂກອງປະຊຸມລັດຖະມົນຕີພະລັງງານອາຊຽນ ຄັ້ງທີ 33 (AMEM 33) ແລະ ບັນດາກອງປະຊຸມທີ່ກ່ຽວຂ້ອງ. ເຂົ້າຮ່ວມກອງປະຊຸມມີບັນດາລັດຖະມົນຕີ, ຫົວໜ້າຄະນະຜູ້ແທນທີ່ມາຈາກ 10 ປະເທດສະມາຊິກອາຊຽນ, ບັນດາປະເທດຄູ່ຮ່ວມມື, ຜູ້ຕາງໜ້າຄະນະເລຂາອາຊຽນ, ເອກອັກຄະລັດຖະທູດ, ຫົວໜ້າຄະນະທູຕານຸທູດປະຈຳມາເລເຊຍ. ກ່າວຄຳເຫັນໄຂກອງປະຊຸມ, ທ່ານລັດຖະມົນຕີວ່າການກະຊວງພະລັງງານ, ເຕັກໂນໂລຊີຂຽວ ແລະ ແຫຼ່ງນ້ຳມາເລເຊຍ Maximus Johnity Ongkili ເນັ້ນໜັກເຖິງຄວາມຈຳເປັນຕ້ອງເພີ່ມທະວີຄຳໝັ້ນສັນຍາຮ່ວມມືດ້ານພະລັງງານໃນອາຊຽນ ແລະ ສາກົນ ເພື່ອບັນລຸໄດ້ຄວາມປອດໄພດ້ານພະລັງງານ, ການເຕີບໂຕດ້ານເສດຖະກິດ ແລະ ປົກປັກຮັກສາສິ່ງແວດລ້ອມ. ທີ່ກອງປະຊຸມ AMEM 33, ລັດຖະມົນຕີ, ຫົວໜ້າຄະນະເຈລະຈາບັນດາປະເທດເຂົ້າຮ່ວມໄດ້ພິຈາລະນາບົດລາຍງານໝາກຜົນການປະຕິບັດແຜນການດຳເນີນງານອາຊຽນ ກ່ຽວກັບພະລັງງານ (APAEC) 2011 – 2015, ຮັບຮອງເອົາຮ່າງມະຕິໃຫ້ APAEC 2016 – 2020 ແລະ ສະຫຼຸບການເຄື່ອນໄຫວຂອງເຄືອຂ່າຍອາຊຽນ ກ່ຽວກັບພະລັງງານຕາມແຕ່ລະວິຊາສະເພາະ.