(vovworld) - ຕອນເຊົ້າວັນທີ 23/2 ຢູ່ ຮ່າໂນ້ຍ, ຄະນະພົວພັນຕ່າງປະເທດ ສູນກາງພັກກອມມູນິດຫວຽດນາມ ໄດ້ຈັດຕັ້ງກອງປະຊຸມສະຫລຸບວຽກງານການຕ່າງປະເທດ ປຊຊ ປີ 2011 ແລະ ຜັນຂະຫຍາຍຫນ້າທີ່ ປີ 2012. ເຂົ້າຮ່ວມກອງປະຊຸມ ມີທ່ານ ເລຮົ່ງແອນ ກຳມະການກົມການເມືອງ, ຜູ້ປະຈຳຄະນະເລຂາ, ທ່ານ ຮ່ວາງບີ່ນກວນ ຫົວຫນ້າຄະນະພົວພັນຕ່າງປະເທດສູນກາງພັກ ແລະ ຜູ້ຕາງຫນ້າບັນດາກະຊວງ, ຂະແຫນງການ ເຮັດວຽກງານການຕ່າງປະເທດ ປຊຊ.
ໃນ ປີ 2011, ວຽກງານການຕ່າງປະເທດ ປຊຊ ບັນລຸໄດ້ໝາກຜົນສຳຄັນຫລາຍຢ່າງ, ປະກອບສ່ວນຢ່າງແທດຈິງເຂົ້າໃນການປັບປຸງຄວາມສາມັກຄີ, ມິດຕະພາບກັບ ປຊຊ ບັນດາປະເທດບ້ານໃກ້ເຮືອນຄຽງ, ເພີ່ມທະວີການພົວພັນກັບ ປຊຊ, ກຳລັງທີ່ກ້າວຫນ້າຢູ່ບັນດາປະຊາຊາໃນໂລກ, ບັນດາເພື່ອນມິດທີ່ເປັນມູນເຊື້ອ, ຂົນຂວາຍ ແລະ ຍາດແຍ່ງກຳລັງແຮງທາງດ້ານວັດຖຸ, ການສະຫນັບສະຫນູນທາງດ້ານຈິດໃຈຈາກເພື່ອນມິດ ແລະ ຄູ່ຮ່ວມມືສາກົນ, ປະກອບສ່ວນຮັກສາຄວາມສະຖຽນລະພາບດ້ານການເມືອງ ແລະ ປົກປ້ອງສິດຜົນ ປະໂຫຍດຂອງປະເທດຊາດ.
ກ່າວຄຳເຫັນທີ່ກອງປະຊຸມ, ທ່ານເລຮ່ົງແອນ ກຳມະການກົມການເມືອງ ປະຈຳຄະນະເລຂາໄດ້ເນັ້ນຫນັກວ່າ:
“ໃນໄລຍະຈະມາເຖິງ, ຂ້າພະເຈົ້າສະເຫນີ ຄວນມີຄວາມຮັບຮູ້ຢ່າງຄົບຖ້ວນກ່ຽວກັບທີ່ຕັ້ງ, ບົດບາດສຳຄັນຂອງວຽກງານການຕ່າງປະເທດ ປຊຊ ໃນສະພາບການໃຫມ່. ບັນດາການຜັນແປສະພາບການຂອງໂລກ ແລະ ພາຍໃນປະເທດໃນໄລຍະຜ່ານມາ ຍິ່ງຢືນຢັນລັກສະນະຖືກຕ້ອງກ່ຽວກັບທັດສະນະ, ຄວາມຮັບຮູ້ຂອງພັກກ່ຽວກັບບົດບາດອັນໃຫຍ່ຫລວງຂອງໝູ່ມະຫາຊົນໃນຊີວິດທາງດ້ານການເມືອງຂອງປະເທດຕ່າງໆ ແລະ ສາກົນ. ຄວນສຶກສາຂົນຂວາຍ ແລະ ຈັດຕັ້ງເພື່ອໃຫ້ປະຊາຊົນ ເຂົ້າຮ່ວມວິວັດການເຊື່ອມໂຍງກັບສາກົນຢ່າງມີປະສິດທິຜົນ, ກໍ່ສ້າງ ແລະ ພັດທະນາກຳລັງການຕ່າງປະເທດ ປຊຊ, ຜັນຂະຫຍາຍບັນດາການພົວພັນ ແລະ ເຄື່ອນໄຫວການຕ່າງປະເທດ ປຊຊ ເປັນຢ່າງດີ ນັ້ນແມ່ນຫນ້າທີ່ມີຄວາມໝາຍຍຸດທະສາດເພື່ອສ້າງສາ ແລະ ປົກປັກຮັກສາປະເທດຊາດໃນສະພາບການໃຫມ່.”