(vovworld) – ເນື່ອງໃນໂອກາດສະເຫຼີມສະຫຼອງ 70 ປິແຫ່ງວັນການປະຕິວັດເດືອນສິງຫາ (19/08/1945 – 19/08/2015) ແລະ ວັນຊາດຫວຽດນາມ ທີ 2 ກັນຍາ. ຕອນເຊົ້າວັນທີ 01/09, ຄະນະຜູ້ແທນຄະນະບໍລິຫານງານສູນກາງພັກກອມມູນິດຫວຽດນາມ, ປະທານປະເທດ, ສະພາແຫ່ງຊາດ, ລັດຖະບານ, ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ເຂົ້າສຸສານໄວ້ອາໄລປະທານໂຮ່ຈິມິນ ແລະ ອາໄລຫາບັນດານັກຮົບເສຍສະຫຼະຊີວິດເພື່ອຊາດ. ເຂົ້າຮ່ວມພິທີ ມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ, ທ່ານປະທານປະເທດ ເຈືອງເຕີນຊາງ, ອະດີດປະທານປະເທດ ເຈີນດຶກເລືອງ ແລະ ຫວຽນມິງຈ໋ຽດ, ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ການນຳ, ອະດີດການນຳພັກ, ລັດ, ບັນດາກະຊວງ, ຂະແໜງການສູນກາງເຂົ້າຮ່ວມ. ໜ້າທີ່ນີ້, ການນຳພັກ, ລັດ, ແນວໂຮມປະເທດຊາດຫວຽດນາມ ໄດ້ສະແດງຄວາມເຄົາລົບ, ຈົດຈຳບຸນຄຸນອັນໃຫຍ່ຫຼວງຂອງປະທານໂຮ່ຈິມິນ ສຳລັບພາລະກິດປະຕິວັດຂອງພັກ ແລະ ຊາດ.
ຕໍ່ຈາກນັ້ນ, ຄະນະຜູ້ແທນຄະນະບໍລິຫານງານສູນກາງພັກ, ປະທານປະເທດ, ສະພາແຫ່ງຊາດ, ລັດຖະບານ, ຄະນະກຳມະການສູນກາງແນວໂຮມປະເທດຊາດຫວຽດນາມ, ໄດ້ພ້ອມກັນວາງພວງມາລາຢູ່ອະນຸສາວະລີອາໄລຫານັກຮົບທີ່ເສຍສະຫຼະຊີວິດເພື່ອຊາດ ທີ່ໄດ້ຕໍ່ສູ້ຢ່າງພິລະອາດຫານ, ເສຍສະຫຼະຊີວິດເພື່ອພາລະກິດປົດປ່ອຍຊາດ, ເພື່ອພື້ນຖານເອກະລາດ, ເສລີພາບຂອງປະເທດຊາດ ແລະ ເພື່ອຄວາມຜາສຸກຂອງປະຊາຊົນ.