ບັນດາຜູ້ແທນເຂົ້າຊົມງານວາງສະແດງ
|
(vovworld)- ຕອນເຊົ້າວັນທີ 11/7, ກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ໄດ້ຈັດຕັ້ງງານວາງສະແດງພາບໂຄສະນາ ພາຍໃຕ້ຫົວຂໍ້ວ່າ: “ເດັດດ່ຽວປົກປັກຮັກສາອະທິປະໄຕເຂດຊາຍແດນ, ທະເລ ແລະ ໝູ່ເກາະຫວຽດນາມ” ໄດ້ດຶງດູດຜູ້ເຂົ້າຊົມເປັນຈຳນວນຫລວງຫລາຍ. ງານວາງສະແດງໄດ້ແນະນຳ ແຜນທີ່ 11 ສະບັບ ແລະ ເຈົາບ໋ານ(ເອກະສານປົກຄອງໃນສະໄຫມລາຊະວົງຫງວຽນ) ແລະ ພາບໂຄສະນາ 60 ແຜ່ນ ໂດຍໄດ້ຮັບການຄັດເລືອກຈາກການເສັງແຕ້ມພາບໂຄສະນາມຸ້ງໄປສູ່ເຂດທະເລໝູ່ເກາະ. ເພື່ອນ ເລີມຢູງດາດ, ຊາວນະຄອນໂຮ່ຈີມີນ ແບ່ງປັນວ່າ:
“ຜ່ານງານວາງສະແດງ, ຂ້າພະເຈົ້າຮູ້ສຶກເອກອ້າງທະນົງໃຈກ່ຽວກັບອະທິປະໄຕເຂດທະເລໝູ່ເກາະຂອງຫວຽດນາມ. ຜ່ານນັ້ນ ໄດ້ສຶກສາໃຫ້ຊາວຫນຸ່ມຮັບຮູ້ກ່ຽວກັບອະທີປະໄຕຂອງປະເທດຊາດ ພ້ອມທັງມີຄວາມເຊື່ອໝັ້ນຢ່າງເລິກເຊິ່ງຕໍ່ການຊີ້ນຳນຳພາຂອງພັກ ແລະ ລັດ ກໍຄືອະທິປະໄຕເຂດທະເລໝູ່ເກາະຂອງຫວຽດນາມ. ”
ແລະກໍໃນວັນດຽວກັນ, ສະພາກາແດງຫວຽດນາມ ໄດ້ຮັບຈຳນວນເງິນ 500 ລ້ານດົງ ໂດຍບໍລິສັດການຄ້າຫຸ້ນສ່ວນເບຍຮ່າໂນ້ຍ ແລະ ລູກຄ້າບໍລິຈາກເພື່ອສະຫນັບສະຫນູນລາຍການ“ຮ່ວມແຮງຮ່ວມໃຈເພື່ອເຂດທະເລໝູ່ເກາະຂອງປະເທດຊາດ”. ສະພາກາແດງຫວຽດນາມຈະນຳໃຊ້ຈຳນວນເງິນດັ່ງກ່າວເພື່ອຊື້ພາຫະນະອຸປະກອນທີ່ຈຳເປັນ, ຈັດຕັ້ງການກວດພະຍາດ ແລະ ຊື້ໂທລະທັດສົ່ງເຖິງບັນດາຊາວປະມົງ.
ນະຄອນຮ່າໂນ້ຍຄັດຄ້ານການກະທຳຢ່າງຜິດກົດໝາຍຂອງຈີນຢູ່ທະເລຕາເວັນອອກ
ແລະກໍໃນວັນທີ 11/7, ກອງປະຊຸມສະໄຫມທີ 10 ສະພາປະຊາຊົນນະຄອນ ຮ່າໂນ້ຍ ໄດ້ດຳເນີນວາລະອັດກອງປະຊຸມ ແລະ ອອກຖະແຫລງການຄັດຄ້ານຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ. ຖະແຫລງການຊົມເຊີຍບັນດາແຜນນະໂຍບາຍຂອງພັກ, ລັດ, ເດັດດ່ຽວຕໍ່ສູ້ປົກປັກຮັກສາອະທິປະໄຕເຂດນ້ຳແດນດິນບົນພື້ນຖານກົດໝາຍສາກົນ. ຖະແຫລງການຮຽກຮ້ອງຈີນ ຖອນຮ້ານເຈາະນ້ຳມັນໄຮຢາງ 981 ອອກຈາກເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ.