ການເຄື່ອນໄຫວຢ້ຽມຢາມຈີນຂອງເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ

ວັນສຸກ ທີ 13 ມັງກອນ ຄ.ສ. 2017 | 19:30:02

ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແລະ ທ່ານນາຍົກລັດຖະມົນຕີຈີນ ຫຼີເຄີຊຽງ

(vovworld)- ໂດຍສືບຕໍ່ການຢ້ຽມຢາມ ສ.ປ.ຊ ຈີນຢ່າງເປັນທາງການ, ຕອນເຊົ້າ 13/1, ຢູ່ຫໍປະຊຸມໃຫຍ່ແຫ່ງຊາດຈີນທີ່ປັກກິງ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ພົບປະກັບທ່ານນາຍົກລັດຖະມົນຕີຈີນ ຫຼີເຄີຊຽງ. ທີ່ການພົບປະ, 2 ຝ່າຍໄດ້ເຫັນດີເພີ່ມທະວີການເຊື່ອມຕໍ່ຍຸດທະສາດພັດທະນາ, ຕັ້ງໜ້າຄົ້ນຄ້ວາ ແລະ ຊຸກຍູ້ບັນດາໂຄງການຮ່ວມມື ເຊື່ອມຕໍ່ໃນຂອບເຂດ “ 2 ແລວ, 1 ຂອບອ້ອມ” ແລະ “ 1 ຂອບອ້ອມ, ເສັ້ນທາງດຽວ” ; ຜັນຂະຫຍາຍປະຕິບັດ “ ບົດບັນທຶກຊ່ວຍຈຳກ່ຽວກັບຈຳນວນໂຄງການຮ່ວມມືຜະລິດລະຫວ່າງກະຊວງອຸດສາຫະກຳການຄ້າຫວຽດນາມ ກັບຄະນະກຳມະການພັດທະນາ ແລະ ປະຕິຮູບແຫ່ງລັດຈີນ; ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແລະ ທ່ານນາຍົກລັດຖະມົນຕີຈີນ ຫຼີເຄີຊຽງໄດ້ໄດ້ເຫັນດີເສີມຂະຫຍາຍບົດບາດຂອງບັນດາກົນໄກຮ່ວມມືການຄ້າ, ຜັນຂະຫຍາຍບັນດາຂໍ້ຕົກລົງລະຫວ່າງ 2 ປະເທດ, ສ້າງເງື່ອນໄຂສະດວກໃຫ້ແກ່ການຮ່ວມມືລົງທຶນຂອງບັນດາວິສາຫະກິດ, ສົ່ງເສີມບັນດາທ້ອງຖິ່ນເພີ່ມທະວີການແລກປ່ຽນຮ່ວມມືຕ່າງຝ່າຍຕ່າງມີຜົນປະໂຫຍດ. 2 ຝ່າຍຍັງເຫັນດີຊຸກຍູ້ການຮ່ວມມືໃນທຸກຂົງເຂດ, ຄຸ້ມຄອງ ແລະ ນຳໃຊ້ແຫຼ່ງນ້ຳໃນແມ່ນ້ຳຂອງຢ່າງມີປະສິດທິຜົນ ແລະ ໝັ້ນຄົງ. ສະໜັບສະໜູນເພີ່ມທະວີການຮ່ວມສຳພັນໃນອາຊຽນ, ເສີມຂະຫຍາຍບົດບາດເປັນແກ່ນກາງຂອງອາຊຽນຢູ່ອາຊີຕາເວັນອອກ ແລະ ເພີ່ມທະວີການຮ່ວມມືລະຫວ່າງຈີນ ແລະ ອາຊຽນ.

ຕອນບ່າຍວັນທີ 13/1, ທີ່ຫໍປະຊຸມໃຫຍ່ແຫ່ງຊາດຈີນ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ພົບປະກັບທ່ານ ຈາງເຕືອແຈງ, ປະທານສະພາຜູ້ແທນປະຊາຊົນແຫ່ງຊາດຈີນ. ນະທີ່ນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ ຢັ້ງຢືນວ່າ: ສະພາຜູ້ແທນປະຊາຊົນແຫ່ງຊາດ ຈີນ ແລະ ສະພາແຫ່ງຊາດ ຫວຽດນາມ ຕ້ອງຍູ້ແຮງການແລກປ່ຽນບົດຮຽນກ່ຽວກັບວຽກງານນິຕິບັນຍັດ, ເສີມຂະຫຍາຍບົດບາດຂອງວຽກງານຕິດຕາມກວດກາດີກ່ວາອີກ, ກະຕຸກຊຸກຍູ້ລັດຖະບານ 2 ປະເທດປະຕິບັດບັນດາຄວາມຮັບຮູ້ລວມ, ບັນດາຂໍ້ຕົກລົງລະຫວ່າງການນຳຂັ້ນສູງ 2 ປະເທດ, ຜັນຂະຫຍາຍບັນດາສັນຍາ ແລະ ຂໍ້ຕົກລົງທີ່ບັນລຸໄດ້, ເພີ່ມທະວີການສົມທົບກັນ, ສະໜັບສະໜູນເຊິ່ງກັນ ແລະ ກັນບົນເວທີລັດຖະສະພາພາກພື້ນ ແລະ ສາກົນ…

ສ່ວນທ່ານປະທານສະພາຜູ້ແທນປະຊາຊົນແຫ່ງຊາດ ຈີນ ຈາງເຕືອແຈງ ຢັ້ງຢືນວ່າ ສະພາຜູ້ແທນປະຊາຊົນແຫ່ງຊາດ ຈີນ ຮັບຮູ້ຢ່າງເລິກເຊິ່ງຄວາມຮັບຜິດຊອບຂອງຕົນໃນການປະກອບສ່ວນເຂົ້າທ່າອ່ຽງການພັດທະນາຢ່າງແຮງ, ຕັ້ງໜ້າຂອງການພົວພັນ 2 ປະເທດ, ເພີ່ມທະວີການສົມທົບກັບສະພາແຫ່ງຊາດ ຫວຽດນາມ, ມານະພະຍາຍາມກ່ວາອີກເພື່ອຊຸກຍູ້ການພົວພັນຮ່ວມມື 2 ຝ່າຍ, ສ້າງເງື່ອນໄຂສະດວກເພື່ອໃຫ້ວິສາຫະກິດ ແລະ ປະຊາຊົນເພີ່ມທະວີການພົວພັນແລກປ່ຽນ, ຮ່ວມມືເສດຖະກິດ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃນດ້ານການເມືອງ ແລະ ນ້ຳໃຈມິດຕະພາບລະຫວ່າງ ປະຊາຊົນ 2 ປະເທດໃນໄລຍະຈະມາເຖິງ.

ກໍ່ໃນຕອນບ່າຍວັນທີ 13/1, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ພົບປະກັບກຳມະການຜູ້ປະຈຳການກົມການເມືອງ, ເລຂາຄະນະກຳມະການກວດກາປະຕິບັດວິໄນສູນກາງພັກກອມມູນິດ ຈີນ ຫວາງຈີຊານ.

ໃນຕອນເຊົ້າຂອງວັນດຽວກັນ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ໃຫ້ການຕ້ອນຮັບທ່ານປະທານທະນາຄານລົງທຶນລົງທຶນພື້ນຖານໂຄງລ່າງອາຊີ ຈິນລີຈີ້ນ ແລະ ປະທານກຸ່ມບໍລິສັດ Sunwah ໂຢນາທານຈອຍ. ທີ່ການຕ້ອນຮັບ ທ່ານປະທານທະນາຄານລົງທຶນພື້ນຖານໂຄງລ່າງອາຊີ ຈິນລີຈີ້ນ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງສະແດງຄວາມຫວັງຢາກໃຫ້ທະນາຄານລົງທຶນພື້ນຖານໂຄງລ່າງອາຊີ ເອົາໃຈໃສ່ຮ່ວມມືຊ່ວຍເຫຼືອຫວຽດນາມ. ສ່ວນ ທ່ານປະທານທະນາຄານລົງທຶນລົງທຶນພື້ນຖານໂຄງລ່າງອາຊີ ຈິນລີຈີ້ນ ຢືນຢັນວ່າ ທາງທະນາຄານຈະຮ່ວມມືຢ່າງແໜ້ນແຟ້ນກັບຫວຽດນາມເພື່ອກຳນົດບັນດາໂຄງການລະອຽດ, ພ້ອມກັນນັ້ນ ກໍມານະພະຍາຍາມຊຸກຍູ້ບັນດາການເຄື່ອນໄຫວລົງທຶນໃນຂົງເຂດນີ້ຢູ່ຫວຽດນາມບັນລຸໝາກຜົນດີ.

ໃນຂອບເຂດການເຄື່ອນໄຫວຢ້ຽມຢາມຈີນຂອງຄະນະຜູ້ແທນຂັ້ນສູງຫວຽດນາມນຳໂດຍທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ, ວັນທີ 13/1, ຢູ່ປັກກິງ, ທ່ານພົນໂທ ໂຕເລີມ, ລັດຖະມົນຕີກະຊວງຕຳຫຼວດຫວຽດນາມໄດ້ມີການພົບປະກັບລັດຖະມົນຕີກະຊວງຕຳຫຼວດຈີນ ກົວຈີນຄຸນ ແລະ ທ່ານຮອງລັດຖະມົນຕີກະຊວງຕຳຫຼວດຈີນ, ປະທານອົງການ Interpol ເມິງຂຸງອວຍ .

2 ຝ່າຍໄດ້ເຫັນດີຍູ້ແຮງການພົວພັນຮ່ວມມືໃນຂົງເຂດຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍໃຫ້ເຂົ້າສູ່ຕົວຈິງ, ມີປະສິດທິຜົນ, ກາຍເປັນເສົາຄ້ຳສຳຄັນຂອງການພົວພັນລະຫວ່າງ 2 ປະເທດ. 2 ຝ່າຍເພີ່ມທະວີແລກປ່ຽນຄະນະຜູ້ແທນຂັ້ນຕ່າງໆ, ແບ່ງປັນຂໍ້ມູນຂ່າວສານ, ກໍ່ສ້າງພະນັກງານ, ຮັບປະກັນຜົນປະໂຫຍດອັນຊອບທຳຂອງປະຊາຊົນ 2 ປະເທດເມື່ອເຂົ້າມາດຳລົງຊີວິດ, ທຳມາຄ້າຂາຍ, ຮ່ຳຮຽນຢູ່ປະເທດຂອງກັນ. 2 ຝ່າຍຢືນຢັນ ຈະບໍ່ປະໃຫ້ສ່ວນບຸກຄົນ, ອົງການໃດສວຍໃຊ້ດິນແດນຂອງປະເທດນີ້ ເພື່ອທຳລາຍຄວາມສະຫງົບ, ຄວາມເປັນລະບຽບຮຽບຮ້ອຍຂອງກັນ.

ຕອນເຊົ້າວັນທີ 14/1, ທ່ານເລຂາທິການໃຫຍ່ ຫງວຽນຟູ໋ຈ້ອງໄດ້ໃຫ້ການຕ້ອນຮັບການນຳບາງກຸ່ມບໍລິສັດ, ວິສາຫະກິດທີ່ດີເດັ່ນຂອງຈີນ ເຊິ່ງພວມລົງທຶນ ດຳເນີນທຸລະກິດຢູ່ ຫວຽດນາມ. , ທ່ານເລຂາທິການໃຫຍ່ ຫງວຽນຟູ໋ຈ້ອງ ຊົມເຊີຍບັນດາກຸ່ມບໍລິສັດຂອງ ຈີນໄດ້ເຕີບໃຫຍ່ ພັດທະນາຢ່າງບໍ່ຢຸດຢັ້ງ ບໍ່ພຽງແຕ່ຢູ່ຕະຫຼາດ ຈີນ ເທົ່ານັ້ນ, ຫາກຍັງບືນຕົວອອກສູ່ຕ່າງປະເທດ; ປະຈຸບັນມີການເຄື່ອນໄຫວລົງທຶນດຳເນີນທຸລະກິດຫຼາຍຢ່າງຢູ່ ຫວຽດນາມ, ໄດ້ສຸມໃສ່ເຂົ້າບັນດາຂະແໜງອາຊີບ, ຂົງເຂດເຊິ່ງ ຫວຽດນາມ ມີຄວາມຕ້ອງການ. , ທ່ານເລຂາທິການໃຫຍ່ ຫງວຽນຟູ໋ຈ້ອງ ສະແດງຄວາມປາຖະໜາວ່າ, ບັນດາວິສາຫະກິດ ຈີນ ຈະເພີ່ມທະວີການລົງທຶນເຂົ້າ ຫວຽດນາມ ດ້ວຍເຕັກໂນໂລຢີທີ່ທັນສະໄໝ, ເພື່ອຈຸດໝາຍພັດທະນາຢ່າງໝັ້ນຄົງ, ສຸມໃສ່ເຂົ້າບັນດາຂົງເຂດທີ່ມີທ່າແຮງ ແລະ ຫວຽດນາມ ມີຄວາມຕ້ອງການ. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ: ຫວຽດນາມ ພ້ອມແລ້ວທີ່ຈະສ້າງທຸກເງື່ອນໄຂສະດວກໃຫ້ບັນດານັກລົງທຶນຕ່າງປະເທດລົງທຶນເຂົ້າ ຫວຽດນາມ, ໃນນັ້ນມີບັນດາວິສາຫະກິດ ຈີນ; ຫວັງວ່າບັນດາວິສາຫະກິດຈະເຄື່ອນໄຫວ ດຳເນີນທຸລະກິດຢ່າງມີປະສິດທິຜົນ, ປະກອບສ່ວນເພີ່ມທະວີການພົວພັນມິດຕະພາບ, ການຮ່ວມມືລະຫວ່າງສອງປະເທດ ຫວຽດນາມ - ຈີນ.