ພິທີຕ້ອນຮັບທ່ານປະທານປະເທດ ຫວຽດນາມ ເຈີ່ນດ້າຍກວາງ
(vovworld) – ໃນຂອບເຂດການຢ້ຽມຢາມທາງລັດຖະກິດ ສປປ. ລາວ ວັນທີ 12/06 ທ່ານປະທານປະເທດ ຫວຽດນາມ ເຈີ່ນດ້າຍກວາງ ມີບັນດາການພົບປະເຈລະຈາກັບທ່ານເລຂາທິການໃຫຍ່ ປະທານປະເທດ ລາວ ບຸນຍັງ ວໍລະຈິດ ທີ່ການພົບປະ 2 ຝ່າຍເຫັນດີເປັນເອກະພາບສືບຕໍ່ປະຕິບັດບັນດາຂໍ້ຕົກລົງຂັ້ນສູງລະຫວ່າງ 2 ປະເທດ ແລະ ບັນດາໝາກຜົນທີ່ບັນລຸໄດ້ຢູ່ກອງປະຊຸມຄັ້ງທີ 38 ຄະນະກຳມະການລະຫວ່າງລັດຖະບານກ່ຽວກັບການຮ່ວມມື 2 ຝ່າຍ ຫວຽດນາມ - ລາວ ເປັນຢ່າງດີ; ປະຕິບັດແຜນການຮ່ວມມືລະຫວ່າງລັດຖະບານ 2 ປະເທດປີ 2016, ສັນຍາຮ່ວມມື ຫວຽດນາມ - ລາວ ໄລຍະ 2016 – 2020 ແລະ ຖະແຫຼງການຮ່ວມໃນການຢ້ຽມຢາມ ຫວຽດນາມ ຜ່ານມາຂອງທ່ານເລຂາທິການໃຫຍ່ ປະທານປະເທດ ລາວ ບຸນຍັງ ວໍລະຈິດ, ກໍ່ຄືບັນດາໝາກຜົນ ທີ່ບັນລຸໄດ້ໃນການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ ລາວ ທອງລຸນ ສີສຸລິດ ແລະ ບັນດາຂໍ້ຕົກລົງບັນລຸໄດ້ໃນການຢ້ຽມຢາມ ລາວ ຄັ້ງນີ້ຂອງທ່ານປະທານປະເທດ ເຈີ່ນດ້າຍກວາງ ຢ່າງມີໄຊ.
2 ຝ່າຍກໍ່ເຫັນດີເປັນເອກະພາບສືບຕໍ່ເພີ່ມທະວີແລກປ່ຽນຄະນະຜູ້ແທນ, ພົບປະຂັ້ນສູງ, ຜັນຂະຫຍາຍບັນດາກົນໄກຮ່ວມມື 2 ຝ່າຍຢ່າງມີປະສິດທິຜົນ; ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ; ຍົກສູງປະສິດທິຜົນການຮ່ວມມືໃນທຸກຂົງເຂດຄື: ການເມືອງການທູດ, ການປ້ອງກັນຊາດປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນ… 2 ຝ່າຍຢືນຢັນຕັດສິນໃຈຜັນຂະຫຍາຍບັນດາອະນຸສັນຍາກ່ຽວກັບການຮ່ວມມືດ້ານປ້ອງກັນຊາດປ້ອງກັນຄວາມສະຫງົບໄລຍະ 2016 – 2020 ຢ່າງມີປະສິດທິຜົນ, ອະນຸສັນຍາກ່ຽວກັບເສັ້ນຊາຍແດນ ແລະ ຫຼັກໝາຍຊາຍແດນແຫ່ງຊາດ ຫວຽດນາມ - ລາວ ແລະ ສັນຍາກ່ຽວກັບຂໍ້ກຳນົດຄຸ້ມຄອງຊາຍແດນ ແລະ ດ່ານຊາຍແດນ 2 ປະເທດ (ລົງນາມໃນຕົ້ນປີ 2016); ສັນຍາການຄ້າໃໝ່ ແລະ ສັນຍາການຄ້າຊາຍແດນ ຫວຽດນາມ - ລາວ (ລົງນາມໃນປີ 2015), ເພີ່ມທະວີ ແລະ ຍົກສູງລັກສະນະເຊື່ອມຈອດ, ໜູນຊ່ວຍຕໍ່ກັນລະຫວ່າງ 2 ພື້ນຖານເສດຖະກິດ, ກໍ່ສ້າງລະບົບທາງຄົມມະນາຄົມເຊື່ອມຕໍ່ບັນດາເຂດເສດຖະກິດຈຸດສຸມຂອງ 2 ປະເທດຢ່າງບໍ່ຢຸດຢັ້ງ; ຊຸກຍູ້ການແລກປ່ຽນວັດທະນະທຳ, ພົບປະແລກປ່ຽນປະຊາຊົນ; ສົມທົບກັນຈັດຕັ້ງການເຄື່ອນໄຫວຕ່າງໆ ສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ແລະ 40 ປີແຫ່ງວັນລົງນາມໃນສົນທິສັນຍາມິດຕະພາບ ແລະ ຮ່ວມມື ຫວຽດນາມ - ລາວ ໃນປີ 2017. 2 ຝ່າຍເຫັນດີເປັນເອກະສັນຈະສົມທົບກັນກໍ່ສ້າງບັນດາກິດຈະກຳທີ່ລະນຶກປະຫວັດສາດ 2 ປະເທດ ເພື່ອແນໃສ່ສຶກສາມູນເຊື້ອຄວາມສາມັກຄີ, ມິດຕະພາບໃຫ້ບັນດາລຸ້ນໜຸ່ມ ຫວຽດນາມ ແລະ ລາວ
ທ່ານປະທານປະເທດ ເຈີ່ນດ້າຍກວາງ ຢືນຢັນວ່າ: ຫວຽດນາມ ສະໜັບສະໜູນຢ່າງຕັ້ງໜ້າ ແລະ ຮອບດ້ານສຳລັບບົດບາດເປັນປະທານ ອາຊຽນ ຂອງ ລາວ; ຢືນຢັນ ຈະສົມທົບກັນ ແລະ ສະໜັບສະໜູນ ລາວ ຈັດຕັ້ງກອງປະຊຸມຂັ້ນສູງ ອາຊຽນ ແລະ ບັນດາກອງປະຊຸມທີ່ກ່ຽວຂ້ອງຢ່າງສຳເລັດຜົນ.
2 ຝ່າຍຢືນຢັນວ່າ: ສົມທົບກັນຢ່າງແໜ້ນແຟ້ນ ເພື່ອແນໃສ່ປັບປຸງຄວາມສາມັກຄີ ອາຊຽນ, ຍົກສູງບົດບາດເປັນໃຈກາງຂອງ ອາຊຽນ ໃນໂຄງປະກອບຄວາມໝັ້ນຄົງພາກພື້ນ; ເນັ້ນໜັກເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງປອດໄພຢູ່ທະເລຕາເວັນອອກ; ເຫັນດີເປັນເອກະສັນ ພ້ອມກັບບັນດາປະເທດ ອາຊຽນ ຊຸກຍູ້ແກ້ໄຂບັນດາການຂັດແຍ້ງກັນຢູ່ທະເລຕາເວັນອອກດ້ວຍມາດຕະການໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ; ພ້ອມກັບບັນດາຝ່າຍປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ບັນລຸປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ໂດຍໄວ ເພື່ອແນໃສ່ຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.
ທ່ານປະທານປະເທດ ຫວຽດນາມ ເຈີ່ນດ້າຍກວາງ
ພົບປະເຈລະຈາກັບທ່ານນາຍົກລັດຖະມົນຕີ ລາວ ທອງລຸນ ສີສຸລິດ
ໃນຕອນບ່າຍຂອງວັນດຽວກັນ ທີ່ບັນດາການພົບປະເຈລະຈາກັບທ່ານນາຍົກລັດຖະມົນຕີ ລາວ ທອງລຸນ ສີສຸລິດ ແລະ ທ່ານນາງປະທານສະພາແຫ່ງຊາດ ລາວ ປານີ ຢາທໍ່ຕູ້, ຜູ້ນຳ ລາວ ທັງ 2 ທ່ານໄດ້ເນັ້ນໜັກຄວາມໝາຍຂອງການຢ້ຽມຢາມທາງລັດຖະກິດຄັ້ງທຳອິດຂອງທ່ານປະທານປະເທດ ຫວຽດນາມ ເຈີ່ນດ້າຍກວາງ ໃນຖານະຕຳແໜ່ງໃໝ່. ສິ່ງດັ່ງກ່າວ ສະແດງຄວາມຖືເປັນສຳຄັນຂອງພັກ, ລັດ ແລະ ລັດຖະບານ ຫວຽດນາມ ກໍ່ຄືຂອງທ່ານປະທານປະເທດ ເຈີ່ນດ້າຍກວາງ ໃນນາມສ່ວນຕົວສຳລັບສາຍພົວພັນແບບພິເສດ ຫວຽດນາມ - ລາວ. ທ່ານນາຍົກລັດຖະມົນຕີ ລາວ ແລະ ທ່ານນາງປະທານສະພາແຫ່ງຊາດ ລາວ ເຊື່ອໝັ້ນວ່າ: ການຢ້ຽມຢາມ ຈະປະກອບສ່ວນສຳຄັນເຂົ້າໃນການປັບປຸງ ແລະ ພັດທະນາສາຍພົວພັນທີ່ເປັນມູນເຊື້ອ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ປະເທດຢ່າງບໍ່ຢຸດຢັ້ງ. 2 ຝ່າຍກໍ່ຕີລາຄາສູງການພົວພັນຮ່ວມມືອັນດີງາມລະຫວ່າງ 2 ປະເທດເວົ້າລວມ ແລະ ລະຫວ່າງສະພາແຫ່ງຊາດ, ລັດຖະບານ 2 ປະເທດເວົ້າສະເພາະ; ປະກອບສ່ວນສຳຄັນຊ່ວຍ 2 ປະເທດບັນລຸໄດ້ຜົນງານຫລາຍຢ່າງໃນຍຸດທະສາດການຮ່ວມມືເສດຖະກິດ, ວັດທະນະທຳ, ວິທະຍາສາດ - ເຕັກນິກ ຫວຽດນາມ - ລາວ ໄລຍະ 2011 – 2020 ແລະ ສັນຍາຮ່ວມມື ຫວຽດນາມ - ລາວ ໄລຍະ 2011 – 2015. 2 ຝ່າຍແລກປ່ຽນກ່ຽວກັບບັນດາມາດຕະການຢ່າງເລິກເຊິ່ງກ້ວາງຂວາງ ເພື່ອແນໃສ່ປະຕິບັດບັນດາຂໍ້ຕົກລົງຂັ້ນສູງລະຫວ່າງ 2 ປະເທດຢ່າງເຂັ້ມງວດ ແລະ ມີປະສິດທິຜົນ, ສູ້ຊົນປະຕິບັດສຳເລັດສັນຍາຮ່ວມມື 2 ຝ່າຍລະຫວ່າງລັດຖະບານ 2 ປະເທດໄລຍະ 2016 – 2020 ຢ່າງມີໄຊ ກໍ່ຄືຍູ້ແຮງການພົວພັນຮ່ວມມືລະຫວ່າງ ລັດຖະບານ ແລະ ສະພາແຫ່ງຊາດ 2 ປະເທດຢ່າງບໍ່ຢຸດຢັ້ງ.
ທ່ານນາງປະທານສະພາແຫ່ງຊາດ ລາວ ປານີ ຢາທໍ່ຕູ້
ເຈລະຈາກັບທ່ານປະທານປະເທດ ເຈີ່ນດ້າຍກວາງ
ແລະກໍ່ໃນຕອນແລງຂອງວັນດຽວກັນ, ທ່ານປະທານປະເທດ ເຈີ່ນດ້າຍກວາງ ໄດ້ລົງຢ້ຽມຢາມ ແລະ ໂອ້ລົມກັບພະນັກງານ, ພາລະກອນສະຖານທູດ ຫວຽດນາມ ປະຈຳ ລາວ, ຜູ້ຕາງໜ້າບັນດາອົງການຈັດຕັ້ງ ຫວຽດນາມ ປະຈຳ ລາວ, ພໍ່ແມ່ປະຊາຊົນຊາວ ຫວຽດນາມ ອາໄສຢູ່ ລາວ. ທ່ານປະທານປະເທດ ເຈີ່ນດ້າຍກວາງ ຕີລາຄາສູງບັນດາການປະກອບສ່ວນສຳຄັນຂອງພໍ່ແມ່ປະຊາຊົນຊາວ ຫວຽດນາມ ອາໄສຢູ່ ລາວ ສຳລັບພາລະກິດກໍ່ສ້າງ ແລະ ປົກປັກຮັກສາປະເທດຊາດ. ທ່ານປະທານປະເທດ ເຈີ່ນດ້າຍກວາງ ເນັ້ນໜັກວ່າ: ເລື່ອງຮັກສາ, ປັບປຸງ ແລະ ເສີມຂະຫຍາຍການພົວພັນແບບພິເສດ ຫວຽດນາມ - ລາວ ມີຄວາມໝາຍສຳຄັນທີ່ສຸດ ສຳລັບຜົນສຳເລັດຂອງພາລະກິດປະຕິວັດຂອງ ຫວຽດນາມ. ບົນຈິດໃຈນັ້ນ ທ່ານປະທານປະເທດ ເຈີ່ນດ້າຍກວາງ ສະເໜີປະຊາຄົມຊາວ ຫວຽດນາມ ອາໄສຢູ່ ລາວ ສືບຕໍ່ເສີມຂະຫຍາຍມູນເຊື້ອອັນດີງາມຂອງປະຊາຄົມຊາວ ຫວຽດນາມ ອາໄສຢູ່່ ລາວ, ມານະພະຍາຍາມຈົນສຸດຄວາມສາມາດຂອງຕົນ ປະກອບສ່ວນເຂົ້າໃນພາລະກິດພັດທະນາເສດຖະກິດ - ສັງຄົມຂອງປະເທດປະຈຳຖິ່ນ, ກໍ່ຄືອວ່າຍໜ້າເມືອຫາກົກເຄົ້າເຫງົ້າກໍບ້ານເກີດເມືອງນອນ ແລະ ສະໜັບສະໜູນໃຫ້ການພົວພັນທີ່ສັດຊື່ບໍລິສຸດລະຫວ່າງ ຫວຽດນາມ - ລາວ.