ການແຂງຂັນແຕ່ງກິນໃຫ້ຄອບຄົວ
(vovworld) – ປີ 2015, ແມ່ນປີທີ 15 ທີ່ຈັດຕັ້ງວັນຄອບຄົວ ຫວຽດນາມ 28/6, ຫົວຂໍ້ຂອງວັນຄອບຄົວ ຫວຽດນາມ ປີນີ້ແມ່ນ: “ຄາບເຂົ້າຂອງຄອບຄົວເຕັ້ມໄປດ້ວຍຄວາມຮັກແພງ”. ຄວາມໝາຍຂອງຫົວຂໍ້ນີ້ແມ່ນເພື່ອແນໃສ່ເຄົາລົບບັນດາຈຸດເວລາເຕົ້າໂຮມຂອງທຸກໆຄອບຄົວ ຫວຽດນາມ ໃນພາເຂົ້າທີ່ເຕັ້ມໄປດ້ວຍຄວາມຜາສຸກ, ອົບອຸ່ນ ແລະ ຕິດພັນກັບການໂຄສະນາກ່ຽວກັບວຽກງານຄອບຄົວປີ 2016 ແມ່ນ “ສ້າງຖານະເປັນມະນຸດຂອງຊາວ ຫວຽດນາມ ຈາກການສຶກສາຄຸນສົມບັດ, ແບບແຜນການດຳລົງຊີວິດໃນຄອບຄົວ”, ຜ່ານນັ້ນ ເຊີດຊູບັນດາຄຸນຄ່າມະນຸດສະທຳຢ່າງເລິກເຊິ່ງຂອງຄອບຄົວ ຫວຽດນາມ.
ເນື່ອງໃນໂອກາດນີ້, ຢູ່ທ້ອງຖິ່ນຕ່າງໆໃນທົ່ວປະເທດກໍ່ໄດ້ດຳເນີນບັນດາການເຄື່ອນໄຫວເພື່ອແນໃສ່ໂຄສະນາເຜີຍແຜ່, ຂົນຂວາຍປະຊາຊົນທຸກຊັ້ນວັນນະປະຕິບັດແບບແຜນການດຳລົງຊີວິດສີວິໄລ, ວັດທະນະທຳການປະພຶດໃນຄອບຄົວ, ວົງຄະນະຍາດ ແລະ ສັງຄົມ. ຢູ່ບັນດາທ້ອງຖິ່ນຄື: ນະຄອນ ໂຮ່ຈີມິນ, ແຂວງ ຮ່ວາບີ່ງ ໄດ້ຈັດຕັ້ງພິທີສະເຫຼີມສະຫຼອງ 15 ປີແຫ່ງວັນຄອບຄົວ ຫວຽດນາມ (28/6/2001 – 28/6/2016) ແລະ ກອງປະຊຸມຕີລາຄາການປະຕິບັດຄາດໝາຍຂອງຍຸດທະສາດພັດທະນາຄອບຄົວ ຫວຽດນາມ ໃນບໍລິເວນແຂວງ ດ້ວຍຈຸດໝາຍສ້າງຄອບຄົວວັດທະນະທຳ, ປ້ອງກັນ, ຕ້ານການໃຊ້ຄວາມຮຸນແຮງໃນຄອບຄົວ ແລະ ຄວາມສະເໝີພາບລະຫວ່າງຍິງຊາຍ.
ວັນທີ 27/6, ແຂວງ ບັກຢາງ ກໍ່ໄດ້ຈັດຕັ້ງ “ກອງປະຊຸມຍ້ອງຍໍຊົມເຊີຍຄອບຄົວກຳມະກອນ, ລັດຖະກອນ, ຄົນງານດີເດັ່ນ”, ໄດ້ຍ້ອງຍໍຊົມເຊີຍ 51 ຄອບຄົວ ກຳມະກອນ, ລັດຖະກອນ, ຄົນງານທີ່ໄດ້ບື່ນຕົວຂຶ້ນສ້າງເສດຖະກິດເກັ່ງ, ຄອບຄົວມັກຮຽນ, ຄອບຄົວມີຫຼາຍລຸ້ນຄົນຢູ່ຮ່ວມກັນ, ເອົາໃຈໃສ່ເບິ່ງແຍງດູແລຜູ້ອາຍຸສູງ…
ແລະກໍ່ໃນວັນດຽວກັນ, ແຂວງ ຢາລາຍ ໄດ້ຈັດຕັ້ງການເສັງແຕ້ມດ້ວຍຫົວຂໍ້ວ່າ “ຄອບຄົວແຫ່ງຄວາມຮັກແພງ”. ການເສັງໄດ້ປະກອບສ່ວນເຊີດຊູຄຸນຄ່າທີ່ເປັນມູນເຊື້ອ, ສ້າງການຕິດພັນລະຫວ່າງບັນດາສະມາຊິກໃນຄອບຄົວ, ມຸ່ງໄປເຖິງການສ້າງຄອບຄົວມີຊີວິດທາງດ້ານເສດຖະກິດພັດທະນາ ແລະ ຊີວິດວັດທະນະທຳປອດໃສ, ອຸດົມສົມບູນ.