ການເຈລະຈາຂັ້ນສູງຫວຽດນາມ - ເຢັຍລະມັນ
ທ່ານປະທານປະເທດຫວຽດນາມເຈືອງເຕີ້ນຊາງ ຢ້ຽມຢາມເຢຍລະມັນຢ່າງເປັນທາງການ |
(vovworld)- ຕອນບ່າຍວັນທີ 25/11 ຕາມເວລາຫວຽດນາມ, ຢູ່ສຳນັກງານປະທານາທິບໍດີເຢຍລະມັນ, ພິທີຕ້ອນຮັບທ່ານປະທານປະເທດຫວຽດນາມເຈືອງເຕີ້ນຊາງ ມາຢ້ຽມຢາມເຢຍລະມັນຢ່າງເປັນທາງການໄດ້ຖືກຈັດຂຶ້ນຢ່າງສົມກຽດ. ພາຍຫຼັງພິທີຕ້ອນຮັບ, ທ່ານປະທານປະເທດເຈືອງເຕີ້ນຊາງ ແລະ ປະທານາທິບໍດີເຢຍລະມັນ Joachim Gauck ໄດ້ດໍາເນີນການເຈລະຈາ.
ໃນການເຈລະຈາ, ປະທານປະເທດເຈືອງເຕີ້ນຊາງ ແລະ ປະທານາທິບໍດີເຢຍລະມັນ Joachim Gauck ສະແດງຄວາມເພິ່ງພໍໃຈກ່ຽວກັບການພັດທະນາຢ່າງໄວວາແລະມີປະສິດທິຜົນຂອງການຮ່ວມມືຍຸດທະສາດຫວຽດນາມ - ເຢຍລະມັນໃນທຸກຂົງເຂດ . ຜູ້ນໍາທັງສອງໄດ້ຕີລາຄາສູງເລື່ອງຫວຽດນາມແລະເຢຍລະມັນມີການພົວພັນທີ່ໃກ້ຊິດສະໜິດສະໜົມມາແຕ່ດົນນານ , ປະຈຸບັນ, ສອງປະເທດບໍ່ພຽງແຕ່ເປັນຄູ່ຮ່ວມມືຍຸດທະສາດຢ່າງເລິກເຊິ່ງກ້ວາງເທົ່ານັ້ນ, ຫາກຍັງເປັນຫມູ່ເພື່ອນທີ່ຈິງໃຈຂອງກັນ, ມີຄວາມເຂົ້າໃຈ ແລະ ເຄົາລົບນັບຖືເຊິ່ງກັນແລະກັນ. ທ່ານປະທານປະເທດເຈືອງເຕີ້ນຊາງ ແລະ ປະທານາທິບໍດີເຢຍລະມັນ Joachim Gauck ໄດ້ຕົກລົງກັນວ່າທັງສອງຝ່າຍສືບຕໍ່ແລກປ່ຽນຄະນະຜູ້ແທນຂັ້ນຕ່າງໆ, ໂດຍສະເພາະແມ່ນຂັ້ນສູງ; ສົມທົບກັນຜັນຂະຫຍາຍກົນໄກການຮ່ວມມືສອງຝ່າຍຢ່າງມີປະສິດທິຜົນ ແນໃສ່ສ້າງກຳລັງຊຸກຍູ້ຢ່າງແຂງແຮງ ແລະ ເປີດກ້ວາງການພົວພັນຮ່ວມມືຍຸດທະສາດລະຫວ່າງສອງປະເທດ.
ທ່ານປະທານປະເທດເຈືອງເຕີ້ນຊາງ ແລະ ປະທານາທິບໍດີເຢຍລະມັນ Joachim Gauck ມີຄວາມເພິ່ງພໍໃຈເມື່ອເຫັນວ່າການຮ່ວມມືໃນຂົງເຂດການຄ້າແລະການລົງທຶນລະຫວ່າງສອງປະເທດສືບຕໍ່ມີບາດກ້າວຂະຫຍາຍຕົວຢ່າງຕັ້ງໜ້າ . ຜູ້ນໍາທັງສອງຖືວ່າຫວຽດນາມ ແລະ ເຢຍລະມັນພວມມີສະພາບແວດລ້ອມ ແລະ ເງື່ອນໄຂທີ່ເອື້ອອໍານວຍຄວາມສະດວກເພື່ອຍູ້ແຮງການຮ່ວມມືດ່ານການຄ້າ - ການລົງທຶນ ແລະ ສູ້ຊົນຍົກວົງເງິນການຄ້າສອງສົ້ນໃຫ້ບັນລຸ 15-20 ຕື້ USD ໃນປີ 2020 ແລະ ການລົງທຶນຂອງເຢຍລະມັນຢູ່ຫວຽດນາມຈະບັນລຸ 5 ຕື້ USD ໃນໄວໆນີ້. ທັງສອງຝ່າຍໄດ້ຕົກລົງທີ່ຈະສ້າງເງື່ອນໄຂສະດວກເພື່ອໃຫ້ບັນດາວິສາຫະກິດ ແລະ ນັກລົງທຶນສອງປະເທດເຄື່ອນໄຫວ ດຳເນີນທຸລະກິດຢ່າງສະດວກຢູ່ຕະຫຼາດຂອງກັນ .
ຜູ້ນໍາທັງສອງຍັງໄດ້ຕີລາຄາສູງການສົມທົບລະຫວ່າງສອງປະເທດໃນເວທີຫຼາຍຝ່າຍໄດ້. ກ່ຽວກັບບັນຫາສາກົນ ແລະ ພາກພື້ນທີ່ຕ່າງຝ່າຍມີຄວາມສົນໃຈ. ປະທານປະເທດເຈືອງເຕີ້ນຊາງ ແລະ ປະທານາທິບໍດີເຢຍລະມັນ Joachim Gauck ໄດ້ແລກປ່ຽນກ່ຽວກັບສະພາບເພີ່ມທະວີການເຄື່ອນໄຫວຖົມດິນເປັນເກາະ ກໍ່ຄວາມຂາດສະຖຽນລະພາບໃຫ້ແກ່ສັນຕິພາບ, ຄວາມໝັ້ນຄົງ ປອດໄພໃນການເດີນທະເລ, ການບິນຢູ່ທະເລຕາເວັນອອກ. ປະທານາທິບໍດີເຢຍລະມັນ Joachim Gauck ໄດ້ເຫັນດີຖືວ່າ ການຂັດແຍ່ງກັນຢູ່ທະເລຕາເວັນອອກ ຄວນໄດ້ຮັບການແກ້ໄຂໂດຍສັນຕິວິທີ, ສອດຄ່ອງກັບກົດຫມາຍສາກົນ, ຕ້ອງຮັກສາສິດເສລີພາບໃນການເດີນທະເລ, ການບິນ, ແລະ ຮັບປະກັນຄວາມສະຫງົບປອດໄພໃນພາກພື້ນ.