(vovworld) – ໂດຍໄດ້ຮັບຄຳເຊື້ອເຊີນຂອງທ່ານນາຍົກລັດຖະມົນຕີ ສິງກາໂປ ຫຼີຊຽນຫຼົງ ແລະ ຄະນະຈັດຕັ້ງການໂອ້ລົມສົນທະນາ Shangri La, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ຈະເຂົ້າຮ່ວມ ແລະ ກ່າວຄຳເຫັນຢູ່ພິທີໄຂການໂອ້ລົມສົນທະນາ Shangri – La 12 ຢູ່ ສິງກາໂປແຕ່ວັນທີ 31/5 ຮອດ ວັນທີ 1/6/2013. ການໂອ້ລົມສົນທະນາ Shangri – La 12 ລວມມີ 27 ປະເທດຢູ່ພາກພື້ນ ອາຊີ - ປາຊີຟີກ, ໃນນັ້ນມີ 10 ປະເທດອາຊຽນ ແລະ ບັນດາປະເທດຄື: ຈີນ, ຍີ່ປຸ່ນ, ສ ເກົາຫຼີ, ອິນເດຍ, ອາເມລິກາ, ລັດເຊຍ, ການາດາ, ອັງກິດ, ຝຣັ່ງ... ການໂອ້ລົມສົນທະນາ Shangri – La 12 ສຸມໃສ່ເຂົ້າໃນບາງຫົວຂໍ້ຄື: ການສຳຜັດຂອງ ອາເມລິກາ ດ້ວຍຄວາມໝັ້ນຄົງຂອງພາກພື້ນ, ປົກປ້ອງຜົນປະໂຫຍດແຫ່ງຊາດ, ປ້ອງກັນ, ສະກັດກັ້ນການປະທະກັນ... ທີ່ກອງປະຊຸມພິເສດຈະປຶກສາຫາລືບາງບັນຫາມີລັກສະນະວິຊາສະເພາະຄື: ປ້ອງກັນ, ສະກັດກັ້ນການປະທະກັນບົນທະເລ, ບັນດາເຕັກໂນໂລຢີ ແລະ ທິດສະດີການທະຫານໃໝ່, ການພົວພັນດ້ານປ້ອງກັນຊາດ ແລະ ສະກັດກັ້ນການປະທະກັນ, ຂອບຂະໜາດເຄືອຂ່າຍຂໍ້ມູນຂ່າວສານ ແລະ ຄວາມໝັ້ນຄົງ ອາຊີ.
ພ້ອມກັບບັນດາການຜົນສຳເລັດໃນພາລະກິດປ່ຽນແປງໃໝ່ ແລະ ນະໂຍບາຍພົວພັນຕ່າງປະເທດ, ຫວຽດນາມ ນັບມື້ນັບຢັ້ງຢືນບົດບາດ ແລະ ອິດທິພົນຊື່ສຽງຂອງຕົນໃນພາກພື້ນ ແລະ ສາກົນ, ເປັນຕົ້ນແມ່ນໃນ ອາຊຽນ ແລະ ພາກພື້ນ ອາຊີ ຕາເວັນອອກ. ເລື່ອງຄະນະຈັດຕັ້ງການໂອ້ລົມສົນທະນາ Shangri – La 12 ເຊື້ອເຊີນທ່ານນາຍົກລັດຖະມົນຕີ ຫງວຽນເຕີນຢູງ ເຂົ້າຮ່ວມ ແລະ ກ່າວຄຳເຫັນທີ່ພິທີໄຂ ໄດ້ພິສູດໃຫ້ເຫັນຄວາມຖືເປັນສຳຄັນ ແລະ ຕີລາຄາສູງບົດບາດ ແລະ ທີ່ຕັ້ງຂອງ ຫວຽດນາມ. ທ່ານນາຍົກລັດຖະມົນຕີ ຫງວຽນເຕີນຢູງ ເຂົ້າຮ່ວມ ແລະ ກ່າວຄຳເຫັນທີ່ການໂອ້ລົມສົນທະນາ Shangri – La ຄັ້ງນີ້ ເປັນການຢັ້ງຢືນແນວທາງການພົວພັນຕ່າງປະເທດສັນຕິພາບ, ເອກະລາດ, ເປັນເຈົ້າຕົນເອງ, ມີການພົວພັນສາກົນຫຼາຍຮູບຫຼາຍແບບ, ສະແດງໃຫ້ເຫັນນະໂຍບາຍປ້ອງກັນຊາດ, ປ້ອງກັນຄວາມສະຫງົບເພື່ອສັນຕິພາບ, ສະຖຽນລະພາບ ແລະ ການຮ່ວມມືພັດທະນາຢູ່ພາກພື້ນ, ພ້ອມທັງປະກອບສຽງເວົ້າຂອງ ຫວຽດນາມ ໃນບັນດາບັນຫາສຳຄັນຂອງພາກພື້ນ, ໃນນັ້ນມີບັນຫາສັນຕິພາບ, ສະຖຽນລະພາບ, ຄວາມໝັ້ນຄົງໃນການເດີນເຮືອຢູ່ທະເລຕາເວັນອອກ.