ເພື່ອນມິດ ຝຣັ່ງ ເຂົ້າຮ່ວມການໂອ້ລົມສົນທະນາເປັນຈຳ
ນວນຫຼວງຫຼາຍ
(ພາບ: Bích Hà/Vietnam+)
|
(vovworld) – ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ ແລະ 125 ປີແຫ່ງວັນຄ້າຍວັນເກີດປະທານ ໂຮ່ຈີມິນ, ວັນທີ 11/4, ສະມາຄົມ “ບັນດາເພື່ອນມິດຂອງ Léo Figuères” (ALF) ສົມທົບກັບສະຖານທູດ ຫວຽດນາມ ປະຈຳ ຝຣັ່ງ ໄດ້ຈັດຕັ້ງການໂອ້ລົມສົນທະນາດ້ວຍຫົວຂໍ້ວ່າ: “ຫວຽດນາມ ຈາກການຕໍ່ສູ້ປົດປ່ອຍຊາດມາຮອດປະຈຸບັນ”. ການໂອ້ລົມສົນທະນາຖືກດຳເນີນໄປຢູ່ນະຄອນ Malakoff, ຊານນະຄອນຫຼວງ ປາຣີ. ກ່າວຄຳເຫັນທີ່ການໂອ້ລົມສົນທະນາ, ທ່ານເອກອັກຄະລັດຖະທູດ ຫວຽດນາມ ປະຈຳ ຝຣັ່ງ ຫງວຽນງອກເຊີນ, ໃຫ້ຮູ້ວ່າ: ໃນ 30 ປີແຫ່ງການປົກປັກຮັກສາພື້ນຖານເອກະລາດ, ເສລີພາບຢ່າງລຽນຕິດ, ປະຊາຊົນ ຫວຽດນາມ ຕ້ອງຜ່ານຜ່າການຕໍ່ສູ້ທີ່ດຸເດືອດທີ່ສຸດໃນປະຫວັດສາດທັນສະໄໝຂອງໂລກ 2 ຄັ້ງ. ນັ້ນແມ່ນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ເປັນເວລາ 9 ປີ (1946 – 1954) ແລະ ການຕໍ່ສູ້ຕ້ານ ອາເມລິກາ ກູ້ຊາດ (1954 – 1975) ເຊິ່ງສິ້ນສຸດລົງດ້ວຍບັ້ນຮົບ ໂຮ່ຈີມິນ ປະຫວັດສາດ. ທ່ານເອກອັກຄະລັດຖະທູດ ຫງວຽນງອກເຊີນ, ກໍ່ເນັ້ນໜັກເຖິງບັນດາຜົນງານອັນໃຫຍ່ຫຼວງ ແລະ ຮອບດ້ານເຊິ່ງ ຫວຽດນາມ ບັນລຸໄດ້ນັບແຕ່ເມື່ອດຳເນີນການປ່ຽນໃໝ່ປີ 1986 ມາຮອດປະຈຸບັນ. ຕາມທ່ານເອກອັກຄະລັດຖະທູດແລ້ວ, ໃນພາລະກິດຕໍ່ສູ້ປົດປ່ອຍຊາດ ແລະ ສ້າງສາປະເທດຊາດ, ຍ້ອນມີແນວທາງການປະຕິວັດທີ່ຖືກຕ້ອງ, ພັກກອມມູນິດ ຫວຽດນາມ ຈຶ່ງລະດົມກຳລັງແຮງສາມັກຄີທົ່ວປວງຊົນໄດ້, ທັງເສີມຂະຫຍາຍການຊ່ວຍເຫຼືອຈາກບັນດາເພື່ອນມິດສາກົນ.