(vovworld) – ວັນທີ 29/08, ຄະນະຊີ້ນຳການປະຕິຮູບດ້ານຕຸລາການສູນກາງ ເຮັດວຽກກັບຄະນະພະນັກງານພັກລັດຖະບານ ກ່ຽວກັບໝາກຜົນແຫ່ງການຜັນຂະຫຍາຍຂໍ້ສະຫຼຸບຂອງກົມການເມືອງ ກ່ຽວກັບການສືບຕໍ່ປະຕິບັດຍຸດທະສາດປະຕິຮູບດ້ານຕຸລາການຮອດປີ 2020. ທ່ານປະທານປະເທດ ເຈືອງເຕີນຊາງ, ຫົວໜ້າຄະນະຊີ້ນຳການປະຕິຮູບດ້ານຕຸລາການສູນກາງ ແລະ ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເປັນເຈົ້າພາບການເຮັດວຽກ.
ກ່າວຄຳເຫັນທີ່ການເຮັດວຽກ, ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ ຍາມໃດຄະນະພະນັກງານພັກລັດຖະບານ ກໍ່ຖືເປັນສຳຄັນ ແລະ ກຳນົດທິດການຊີ້ນຳ ນຳພາ, ກະຕຸກຊຸກຍູ້ການຕິດຕາມກວດກາວຽກງານຜັນຂະຫຍາຍການປະຕິຮູບດ້ານຕຸລາການເປັນປະຈຳໃຫ້ຖືກຕາມໜ້າທີ່, ບົດບາດຂອງລັດຖະບານ. ຄຽງຂ້າງການເສີມຂະຫຍາຍຜົນງານທີ່ບັນລຸໄດ້, ໃນໄລຍະຈະມາເຖິງ, ຄະນະພະນັກງານພັກລັດຖະບານກໍ່ຈະແກ້ໄຂບັນດາຂໍ້ຈຳກັດ, ຂໍ້ຄົງຂ້າງຢ່າງເຂັ້ມງວດ, ຍົກສູງປະສິດທິຜົນການປະຕິບັດໜ້າທີ່ດັ່ງກ່າວຢ່າງບໍ່ຢຸດຢັ້ງ. ທ່ານນາຍົກລັດຖະມົນຕີ ຫງວຽນເຕີນຢຸງ ສະເໜີໃຫ້ຄະນະຊີ້ນຳການປະຕິຮູບດ້ານຕຸລາການສູນກາງ ເສີມຂະຫຍາຍບົດບາດຂອງ ສານບໍລິຫານ ແລະ ຖັນແຖວທະນາຍຄວາມຂອງລັດ, ບັນດາອົງການໃຫ້ຄຳປຶກສາດ້ານນິຕິກຳໂດຍບໍ່ເສຍຄ່າ, ຕັ້ງໜ້າເຂົ້າຮ່ວມການໜູນຊ່ວຍປະຊາຊົນ ແລະ ບັນດາອົງການ, ອົງການຈັດຕັ້ງ ໃນວຽກງານຮັບ, ແກ້ໄຂໃບຮ້ອງຟ້ອງ.
ທ່ານປະທານປະເທດເຈືອງເຕີນຊາງ ສະເໜີໃຫ້ລັດຖະບານ ເພີ່ມທະວີວຽກງານໂຄສະນາ, ເຜີຍແຜ່ກົດໝາຍເພື່ອແນໃສ່ຍົກສູງຄວາມຮູ້ ແລະ ສະຕິປະຕິບັດກົດໝາຍໃນໝູ່ປະຊາຊົນກວ່າອີກ . ທ່ານປະທານປະເທດເຈືອງເຕີນຊາງ ກໍ່ປາດຖະໜາວ່າ ລັດຖະບານຕ້ອງເອົາໃຈໃສ່ກວ່າອີກເຖິງການປະຕິຮູບດ້ານຕຸລາການໃນບັນດາການເຄື່ອນໄຫວດ້ານຕຸລາການ; ສືບຕໍ່ຍົກສູງປະສິດທິຜົນໃນການສືບສວນ, ແກ້ໄຂ, ຕໍ່ສູ້, ປ້ອງກັນຕ້ານບັນດາອາດຊະຍາກຳ, ໂດຍສະເພາະແມ່ນອາດຊະຍາກຳມີການຈັດຕັ້ງ…. ເພື່ອຕອບສະໜອງໜ້າທີ່ການປະຕິຮູບດ້ານຕຸລາການໃນສະພາບການໃໝ່.