ທ່ານນາຍົກລັດຖມະນຕີ ຟ້າມມິງຈິງ ໂອ້ລົມທາງໂທລະສັບກັບທ່ານ ປະທານາທິບໍດີ ຟີລິບປິນ Philippines Rodrigo Duterte (ພາບ: VGP)

ທ່ານນາຍົກລັດຖະມົນຕີ ຟ້າມມິງຈິງ ຢັ້ງຢືນວ່າ ຫວຽດນາມ ພ້ອມແລ້ວທີ່ຈະສືບຕໍ່ສະໜອງເຂົ້າສານຢ່າງເປັນປົກກະຕິ, ຍາວນານໃຫ້ແກ່ ຟີລິບປິນ ແລະ ສະເໜີໃຫ້ ຟີລິບປິນ ສະຫງວນບຸລິມະສິດໃຫ້ແກ່ ຫວຽດນາມ ເມື່ອມີຄວາມຕ້ອງການນຳເຂົ້າເຂົ້າສານກໍ່ຄືເປີດປະຕູກ່ວາອີກ ໃຫ້ແກ່ຜະລິດກະເສດຂອງ ຫວຽດນາມ.

ການນຳສອງຝ່າຍໄດ້ເຫັນດີເປັນເອກະພາບສົມທົບກັນຢ່າງແໜ້ນແຟ້ນຊຸກຍູ້ການພົວພັນລະຫວ່າງ ຫວຽດນາມ - ຟີລິບປິນ ໃນທຸກຂົງເຂດ, ສືບຕໍ່ຜັນຂະຫຍາຍບັນດາການເຄື່ອນໄຫວສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ, ຊຸກຍູ້ ແລະ ເຮັດໃຫ້ການຮ່ວມມືດ້ານປ້ອງກັນຊາດ ປ້ອງກັນຄວາມສະຫງົບ, ການຄ້າ - ການລົງທຶນ ໃຫ້ເລິກເຊິ່ງກ່ວາອີກ. ການນຳສອງຝ່າຍເຫັນດີເປັນເອກະພາບວ່າວັກຊິນກັນໂຄວິດ - 19 ແມ່ນຍຸດທະສາດສຳຄັນເພື່ອຮັບມືກັບໂລກລະບາດໂຄວິດ - 19 ແລະ ມຸ່ງໄປເຖິງການຟື້ນຟູເສດຖະກິດສັງຄົມແບບຍືນຍົງ.

ກ່ຽວກັບບັນຫາພາກພື້ນ ແລະ ສາກົນ, ການນຳສອງທ່ານໄດ້ເຫັນດີເປັນເອກະພາບ ຈະເພີ່ມທະວີການຮ່ວມມືຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນ ຢູ່ບັນດາກົນໄກຫຼາຍຝ່າຍຄື: ສປຊ, ອາຊຽນ. ການນຳສອງທ່ານໄດ້ແບ່ງປັນຄວາມສຳຄັນຂອງການສືບຕໍ່ຮັກສາຄວາມສາມັກຄີ ແລະ ບັນດາຫຼັກການໄດ້ຮັບການເຫັນດີເປັນເອກະພາບຂອງ ອາຊຽນໃນບັນຫາທະເລຕາເວັນອອກ.