ຊອກຈັງ ຊຸມໃສ່ວຽກງານ ຫຼຸດຜ່ອນຄວາມທຸກຍາກໃນເຂດຊົນເຜົ່າສ່ວນໜ້ອຍ
(ທ່ານນາຍົກລັດຖະມົນຕີ ຫງວຽນເຕີນຢຸງ
ເຮັດວຽກກັບການນຳແຂວງຊອກຈັງ)
(vovworld) – ຕອນບ່າຍວັນທີ 20/06, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເຮັດວຽກກັບການນຳແຂວງຊອກຈັງ ກ່ຽວກັບສະພາບປະຕິບັດບັນດາໜ້າທີ່ພັດທະນາເສດຖະກິດສັງຄົມຂອງທ້ອງຖິ່ນ. ສະຫຼຸບການເຮັດວຽກ, ທ່ານນາຍົກລັດຖະມົນຕີ ຫງວຽນເຕີນຢຸງ ຖືວ່າ, ຊອກຈັງ ແມ່ນແຂວງທີ່ມີຊາວຊົນເຜົ່າ ຂະແມ ຫຼາຍກວ່າໝູ່ຢູ່ເຂດທົ່ງພຽງແມ່ນນ້ຳຂອງ, ມີເນື້ອທີກວ້າງສົມຄວນ. ໃນໄລຍະຜ່ານມາ, ອົງຄະນະພັກ, ອຳນາດການປົກຄອງ ແລະ ປະຊາຊົນໃນແຂວງ ໄດ້ມີຄວາມມານະພະຍາຍາມຫຼາຍຢ່າງ ເພື່ອພັດທະນາຢ່າງຮອບດ້ານ ກ່ຽວກັບໂຄງປະກອບເສດຖະກິດ, ລາຍຮັບສະເລ່ຍໄສ່ຫົວຄົນ, ປັບປຸງລະບົບຄົມນະນາຄົມທາງບົກ… ແຕ່ອັດຕາສ່ວນຄອບຄົວທຸກຍາກຍັງສູງ, ຜະລິດຕະພັນກະເສດບາງປະເພດທີ່ມີທ່າແຮງຄື: ເຂົ້າ, ກຸ້ງພັດທະນາບໍ່ທັນໝັ້ນຄົງເທື່ອ. ເພື່ອແກ້ໄຂສິ່ງຈຳກັດດັ່ງກ່າວ, ທ່ານນາຍົກລັດຖະມົນຕີ ຫງວຽນເຕີນຢຸງ ສະເໜີໃຫ້ແຂວງຊອກຈັງ ສຸມໃສ່ຊີ້ນຳການສ້າງໂຄງປະກອບກະສິກຳ ຕິດພັນກັບການກໍ່ສ້າງຊົນນະບົດໃໝ່ ເພື່ອມີສະມັດຕະພາບສູງກວ່າ, ມີປະສິດທິຜົນສູງກວ່າ. ໃນນັ້ນເອົາໃຈໃສ່ເປັນພິເສດເຖິງການນຳເອົາວິທະຍາສາດ, ເຕັກໂນໂລຊີເຂົ້າໃນການຜະລິດກະສິກຳ, ລ້ຽງສັດ. ທ່ານນາຍົກລັດຖະມົນຕີ ຫງວຽນເຕີນຢຸງ ໃສ່ໃຈແຂວງຄວນມີນະໂຍບາຍເໝາະສົມເພື່ອດຶງດູດວິສາຫະກິດເຂົ້າລົງທຶນ, ເຄື່ອນໄຫວຢູ່ເຂດຊົນນະບົດເພື່ອປະກອບສ່ວນຫັນປ່ຽນໂຄງປະກອບເສດຖະກິດຢູ່ເຂດນີ້, ແກ້ໄຂວຽກເຮັດງານທຳໃຫ້ຊາວກະສິກອນ. ສືບຕໍ່ພັດທະນາອຸດສາຫະກຳ, ຜະລິດປຸ້ງແຕ່ງສຳລັບບັນດາຜະລິດຕະພັນກະເສດ ແລະ ສິນໃນນ້ຳ.