ທ່ານນາງຫງວຽນທິກີມເງິນປະທານສະພາແຫ່ງຊາດຫວຽດນາມຕ້ອນຮັບ ທ່ານສະເຫຼີມໄຊກົມມະສິດລັດຖະມົນຕີກະຊວງການຕ່າງປະເທດແຫ່ງ ສປປ.ລາວ (ພາບ: TTXVN)

   ທ່ານນາງປະທານສະພາແຫ່ງຊາດຫວຽດນາມໄດ້ຕີລາຄາສູງຕໍ່ການມາຢ້ຽມຢາມ ຫວຽດນາມຂອງ ທ່ານ ສະເຫຼີມໄຊ ກົມມະສິດ ພ້ອມດ້ວຍຄະນະຜູ້ແທນກະຊວງການຕ່າງປະເທດລາວ ແລະ ການເຂົ້າຮ່ວມກອງປະຊຸມປຶກສາຫາລືດ້ານການເມືອງປະຈຳປີ ຂັ້ນລັດຖະມົນຕີ ກະຊວງການຕ່າງປະເທດ ຫວຽດນາມ-ລາວ ຄັ້ງທີ 6, ຜ່ານນັ້ນ, ເພີ່ມທະວີການແລກປ່ຽນຂໍ້ມູນຂ່າວສານ, ສົມທົບກັນຮ່ວມມືຢ່າງມີປະສິດທິຜົນກວ່າອີກ, ປະກອບສ່ວນປະຕິບັດໜ້າທີ່ສຳເລັດເປັນຢ່າງດີ ເຊິ່ງພັກ ແລະ ລັດຖະບານສອງປະເທດມີຄວາມເຊື່ອໝັ້ນມອບໝາຍໃຫ້ ໃນວຽກງານຊຸກຍູ້ສາຍພົວພັນແບບພິເສດລະຫວ່າງ ຫວຽດນາມ-ລາວ. ທ່ານ ນາງ ປະທານສະພາແຫ່ງຊາດຫວຽດນາມ ສະເໜີໃຫ້ກະຊວງການຕ່າງປະເທດຫວຽດນາມ ສືບຕໍ່ຮ່ວມມືກັນ ເພື່ອບຳລຸງສ້າງພະນັກງານການຕ່າງປະເທດໃຫ້ແກ່ລາວ; ດ້ານການທູດເສດຖະກິດ, ສອງຝ່າຍຄວນຈັດຕັ້ງບັນດາການສຳມະນາ ໂດຍແນໃສ່ການແບ່ງປັນບັນດາບົດຮຽນທີ່ປະສົບຜົນສຳເລັດ, ກໍ່ຄືບັນດາບົດຮຽນທີ່ລົ້ມເຫຼວ ເພື່ອພ້ອມກັນຖອດຖອນບົດຮຽນ.

ສ່ວນທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວ ໄດ້ສະແດງຄວາມຍິນດີຕໍ່ກັບຫວຽດນາມ ໄດ້ຮັບຕຳແໜ່ງເປັນປະທານອາຊຽນປີ 2020, ປະທານ AIPA 41, ທ່ານລັດຖະມົນຕີກະຊວງການຕ່າງປະເທດລາວຢັ້ງຢືນວ່າ: ລາວຈະເຮັດສຸດຄວາມສາມາດຂອງຕົນໃນການສົມທົບກັນ, ໜູນຊ່ວຍຫວຽດນາມປະຕິບັດໃຫ້ສຳເລັດໜ້າທີ່ວຽກງານຂອງຕົນ.