ທີ່ການພົບປະເຈລະຈາ, ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນການພົວພັນກັບ ສ.ເຊັກໂກ ແລະ ຕີລາຄາສູງການປະກອບສ່ວນຂອງສະພາຕ່ຳ ເຊັກໂກ ໃຫ້ແກ່ການພັດທະນາການພົວພັນລະຫວ່າງ 2 ປະເທດ. ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີສະພາຕ່ຳ ເຊັກໂກ ສືບຕໍ່ຊຸກຍູ້ ອີຢູ ລົງນາມ ແລະ ໃຫ້ສັດຕະຍາບັນສັນຍາການຄ້າເສລີ ຫວຽດນາມ - ອີຢູ (EVFTA) ແລະ ສັນຍາອາລັກຂາການລົງທຶນ (EVIPA) ໂດຍໄວ.

ທ່ານນາຍົກລັດຖະມົນຕີ ຫງວຽນຊວນຟຸກພົບປະເຈລະຈາກັບທ່ານປະທານສະພາຕ່ຳ ສ.ເຊັກໂກ Radek Vondracek (ພາບ: VGP)

  ສ່ວນທ່ານປະທານສະພາຕ່ຳ ສ. ເຊັກໂກ Radek Vondracek ໃຫ້ຮູ້ວ່າ: ເຊັກໂກ ຖືເປັນສຳຄັນການພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ - ສ.ເຊັກໂກ ແລະ ຢືນຢັນວ່າ: ສະພາຕ່ຳ ເຊັກໂກ ສະໜັບສະໜູນການລົງນາມໃນສັນຍາ EVFTA ແລະ EVIPA ຢ່າງເປັນທາງການໂດຍໄວ ແລະ ຈະຊຸກຍູ້ເລື່ອງໃຫ້ສັດຕະຍາບັນບັນດາສັນຍາດັ່ງກ່າວ ພາຍຫລັງໄດ້ຮັບການລົງນາມຢ່າງວ່ອງໄວ ເພື່ອຫັນຜົນປະໂຫຍດເຊິ່ງສັນຍາ 2 ສະບັບດັ່ງກ່າວ ອາດຈະນຳມາໃຫ້ ອີຢູ, ຫວຽດນາມ ແລະ ສ.ເຊັກໂກ ໃຫ້ປະກົດຜົນເປັນຈິງ.

        ແລະກໍ່ໃນຂອບເຂດການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ໃຫ້ການຕ້ອນຮັບທ່ານປະທານພັກກອມມູນິດ ເຊັກໂກ Morava Vojtech Filip, ທັງເປັນຮອງປະທານສະພາຕ່ຳ ສ.ເຊັກໂກ.

ທີ່ການເຮັດວຽກກັບທ່ານປະທານພັກກອມມູນິດ ເຊັກໂກ Morava Vojtech Filip (ພາບ: TTXVN)

        ກ່ອນໜ້ານັ້ນ, ຕອນບ່າຍວັນທີ 17 ເມສາ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ພົບປະກັບທ່ານປະທານາທິບໍດີ ສ.ເຊັກໂກ Miloz Zeman. ທີ່ການພົບປະ, ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ: ຫວຽດນາມ ຍາມໃດກໍ່ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນມິດຕະພາບ ແລະ ການຮ່ວມມືຫລາຍດ້ານກັບບັນດາປະເທດເພື່ອນມິດທີ່ເປັນມູນເຊື້ອຢູ່ພາກພື້ນ ເອີຣົບກາງ ແລະ ເອີຣົບຕາເວັນອອກ, ໃນນັ້ນມີ ເຊັກໂກ ແມ່ນບຸລິມະສິດໜຶ່ງ. ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ສະແດງຄວາມເພິ່ງພໍໃຈກ່ຽວກັບບັນດາບາດກ້າວຕັ້ງໜ້າໃນການພົວພັນ 2 ປະເທດຢູ່ຫລາຍຂົງເຂດໃນໄລຍະຜ່ານມາ.

ທ່ານນາຍົກລັດຖະມົນຕີ ຫງວຽນຊວນຟຸກ  ແລະ ທ່ານປະທານາທິບໍດີ ສ.ເຊັກໂກ Miloz Zeman

ສ່ວນທ່ານປະທານາທິບໍດີ Miloz Zeman ໄດ້ຕີລາຄາສູງຄວາມໝາຍການຢ້ຽມຢາມ ສ.ເຊັກໂກ ໃນຄັ້ງນີ້ຂອງທ່ານນາຍົກລັດຖະມົນຕີ ຫງວຽນຊວນຟຸກ ແລະ ຢືນຢັນວ່າ ການພົວພັນ ຫວຽດນາມ - ສ.ເຊັກໂກ ມີບັນດາຄວາມສາມາດບົ່ມຊ້ອນພັດທະນາຢ່າງແຮງກ່ວາໃນໄລຍະຈະມາເຖິງ.

ແລະກໍ່ໃນຕອນບ່າຍວັນທີ 17 ເມສາ, ທີ່ສູນການຄ້າ ຊາປາ ຢູ່ນະຄອນຫລວງ Praha, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ມີການພົບປະກັບປະຊາຄົມຊາວ ຫວຽດນາມ ທີ່ພວມດຳລົງຊີວິດ, ອອກແຮງງານ ແລະ ຮ່ຳຮຽນຢູ່ ສ.ເຊັກໂກ. ການພົບປະກັບພໍ່ແມ່ປະຊາຊົນຊາວ ຫວຽດນາມ ອາໄສຢູ່ ເຊັກໂກ ແມ່ນການເຄື່ອນໄຫວສຸດທ້າຍຂອງທ່ານນາຍົກລັດຖະມົນຕີ ຫງວຽນຊວນຟຸກ ໃນຂອບເຂດການຢ້ຽມຢາມ ສ.ເຊັກໂກ ຢ່າງເປັນທາງການຂອງຄະນະຜູ້ແທນຂັ້ນສູງລັດຖະບານ ຫວຽດນາມ.

ສິ້ນສຸດການຢ້ຽມຢາມ ສ.ເຊັກໂກ ອັນດີງາມ (ພາບ: VGP)

ຕອນຄ່ຳວັນທີ 17 ເມສາ, ຕາມເວລາທ້ອງຖິ່ນ, ກົງກັບຮຸ່ງເຊົ້າວັນທີ 18 ເມສາ ຕາມເວລາ ຫວຽດນາມ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ຄະນະຜູ້ແທນໄດ້ອອກຈາກ Praha ກັບເມືອປະເທດ, ສິ້ນສຸດການຢ້ຽມຢາມ ສ.ເຊັກໂກ ອັນດີງາມ.