ທ່ານນາຍົກລັດຖະມົນຕີສີລັງກາ Ranil Wichremesinghe
ແລະ ທ່ານນາຍົກລັດຖະມົນຕີ ຫງວຽນຊວນຟຸກ
|
(vovworld)- ຕອນຄ່ຳວັນທີ 18/4, ທ່ານນາຍົກລັດຖະມົນຕີ ສີລັງກາ Ranil Wichremesinghe ແລະ ພັນລະຍາໄດ້ສິ້ນສຸດການຢ້ຽມຢາມຫວຽດນາມ ຢ່າງເປັນທາງການຢ່າງຈົບງາມ ຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແຕ່ວັນທີ 16-18/4/2017. ໃນການຢ້ຽມຢາມ, ທ່ານນາຍົກລັດຖະມົນຕີ ສີລັງກາ Ranil Wichremesinghe ໄດ້ມີການເຈລະຈາກັບທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ, ເຂົ້າຢ້ຽມຂ່ຳນັບທ່ານເລຂາທິການໃຫຍ່ ຫງວຽນຟູຈ້ອງ, ພົບປະກັບປະທານປະເທດ ເຈີນດ້າຍກວາງ, ທ່ານນາງປະທານສະພາແຫ່ງຊາດ ຫງວຽນທິກີມເງີນ ແລະ ເຂົ້າຮ່ວມເວທີປາໄສການລົງທຶນ ຫວຽດນາມ - ສີລັງກາ. ທີ່ການພົບປະຄັ້ງຕ່າງໆນັ້ນ, ສອງຝ່າຍມີຄວາມເພິ່ງພໍໃຈກ່ຽວກັບການພັດທະນາອັນດີງາມຂອງການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານລະຫວ່າງສອງປະເທດໃນ 47 ປີຜ່ານມາ ນັບແຕ່ເມື່ອສອງປະເທດສ້າງການພົວພັນທາງການທູດ (21/7/1970). ສອງຝ່າຍໄດ້ເປັນເອກະພາບບັນດາທິດທາງໃຫຍ່ ເພື່ອແນໃສ່ນຳການພົວພັນສອງຝ່າຍໃຫ້ພັດທະນາຂຶ້ນສູ່ລະດັບສູງໃຫມ່. ສອງຝ່າຍເນັ້ນຫນັກເຖິງຄວາມສຳຄັນຂອງການຮັກສາສັນຕິພາບ ແລະ ຄວາມໝັ້ນຄົງ ຢູ່ ທະເລຕາເວັນອອກ, ຄວາມເສລີໃນການເດີນເຮືອ, ການບິນ ແລະ ການຄ້າບໍ່ຖືກກີດຂວາງ, ແກ້ໄຂບັນດາການຂັດແຍ້ງໂດຍສັນຕິວິທີ, ສອດຄ່ອງກັບກົດໝາຍສາກົນ.