ທ່ານນາຍົກລັດຖະມົນຕີຫງວຽນຊວນຟຸກຕ້ອນຮັບລັດຖະມົນຕີກະຊວງປ້ອງກັນຄວາມສະຫງົບລາວ
ທ່ານ ພົນຕີ ສົມແກ້ວ ສີລາວົງ ແລະ ທ່ານນາຍົກລັດຖະມົນຕີ ຫງວຽນຊວນຟຸກ
|
(vovworld)- ຕອນບ່າຍວັນທີ 16/3, ທີ່ການຕ້ອນຮັບທ່ານ ພົນຕີ ສົມແກ້ວ ສີລາວົງ, ລັດຖະມົນຕີກະຊວງປ້ອງກັນຄວາມສະຫງົບລາວ, ທ່ານນາຍົກລັດຖະມົນຕີ ຫງວຽນຊວນຟຸກໄດ້ຢືນຢັນວ່າ:ລັດຖະບານຫວຽດນາມ ສະຫນັບສະຫນູນ ແລະ ສ້າງເງື່ອນໄຂເພື່ອໃຫ້ສອງຝ່າຍເພີ່ມທະວີການຮ່ວມມືໃນການບຳລຸງສ້າງພະນັກງານ. ບັນດາກຳລັງທີ່ກ່ຽວຂ້ອງຂອງສອງຝ່າຍ ຄວນກຳແຫນ້ນສະພາບການ, ສົມທົບກັນຕໍ່ສູ້ບັນດາການເຄື່ອນໄຫວມ້າງທຳລາຍຂອງອິດທິກຳລັງເປັນປໍລະປັກ, ການເຄື່ອນໄຫວຍຸແຍ່ຊາວຊົນເຜົ່າສ່ວນຫນ້ອຍໃຫ້ມີປະສິດທິຜົນ, ຮັບປະກັນຄວາມເປັນລະບຽບຮຽບຮ້ອຍ ແລະ ສ້າງເສັ້ນຊາຍແດນສອງປະເທດກາຍເປັນເສັ້ນຊາຍແດນສັນຕິພາບ, ສະຖຽນລະພາບ, ພັດທະນາ. ສອງຝ່າຍຄວນຊຸກຍູ້ການເຈລະຈາກ້າວໄປເຖິງການລົງນາມໃນເອກະສານນິຕິກຳໃນຂົງເຂດຕຸລາການ, ອາຍາ, ທາບທາມຄຳເຫັນ, ສະຫນັບສະຫນູນເຊິ່ງກັນ ແລະກັນທີ່ບັນດາເວທີປາໄສພາກພື້ນ ແລະ ໂລກກ່ຽວກັບການປ້ອງກັນ, ຕ້ານອາດຊະຍາກຳ.
ສ່ວນທ່ານ ສົມແກ້ວ ສີລາວົງ, ລັດຖະມົນຕີກະຊວງປ້ອງກັນຄວາມສະຫງົບລາວ ໃຫ້ຮູ້ວ່າ: ທີ່ການເຈລະຈາກັບກະຊວງຕຳຫລວດຫວຽດນາມ, ສອງຝ່າຍເປັນເອກະພາບຕໍ່ການຜັນຂະຫຍາຍຫນ້າທີ່ຮ່ວມມືໃນປີ 2017 ໂດຍອີງໃສ່ບົນພື້ນຖານບັນດາຂໍ້ຕົກລົງຊື່ງການນຳຂັ້ນສູງສອງພັກ,ສອງລັດ,ສອງລັດຖະບານໄດ້ເປັນເອກະພາບ. ທ່ານ ສົມແກ້ວ ສີລາວົງຖືວ່າ ປີນີ້ແມ່ນປີສະເຫລີມສະຫລອງ 40 ປີແຫ່ງວັນສອງປະເທດເຊັນສົນທິສັນຍາມິດຕະພາບແລະ ການຮ່ວມມື, 55 ປີແຫ່ງວັນສ້າງຕັ້ງການພົວພັນທາງການທູດ, ການຢ້ຽມຢາມຫວຽດນາມຄັ້ງນີ້ເປັນຂີດໝາຍແຫ່ງບາດກ້າວໃນການຮ່ວມມືໃຫມ່ລະຫວ່າງກຳລັງຕຳຫລວດສອງປະເທດ.