(ພາບ: TTXVN)
(vovworld) - ຕອນເຊົ້າວັນທີ 25/3, ທ່ານນາຍົກລັດຖະມົນຕີຫງວຽນເຕີນຢຸງ ໄດ້ໄປຢ້ຽມຢາມ ແລະ ເຮັດວຽກຢູ່ແຂວງທາຍງວຽນ. ໃນການເຮັດວຽກກັບການນຳແຂວງທາຍງວຽນ ກ່ຽວກັບສະພາບການປະຕິບັດໜ້າທີ່ພັດທະນາເສດຖະກິດສັງຄົມຂອງທ້ອງຖິ່ນ, ທ່ານນາຍົກລັດຖະມົນຕີຫງວຽນເຕີນຢຸງ ເນັ້ນໜັກວ່າ: ແຜນນະໂຍບາຍຂອງລັດຖະບານແມ່ນສ້າງທຸກເງື່ອນໄຂເພື່ອໃຫ້ທາຍງວຽນ ພັດທະນາກາຍເປັນສູນເສດຖະກິດ, ວັດທະນະທຳ, ການສຶກສາຂອງເຂດພູດອຍທາງພາກເໜືອ. ທ່ານນາຍົກລັດຖະມົນຕີຫງວຽນເຕີນຢຸງ ຮຽກຮ້ອງໃຫ້ແຂວງທາຍງວຽນ ແລະ ບັນດາກະຊວງຂະແໜງການທີ່ກ່ຽວຂ້ອງ ຕ້ອງຕັດສິນໃຈສ້າງເສັ້ນທາງດ່ວນຮ່າໂນ້ຍ-ທາຍງວຽນ ສຳເລັດໃນປີ 2013 ເພື່ອຍູ້ແຮງການດຶງດູດເງິນລົງທຶນຂອງຕ່າງປະເທດ, ພ້ອມທັງເພີ່ມທະວີການບຳລຸງສ້າງແຫຼ່ງຊັບພະຍາກອນມະນຸດມີຄຸນນະພາບສູງ. ທ່ານຍັງຮຽກຮອ້ງໃຫ້ແຂວງທາຍງວຽນ ຕ້ອງມີຄວາມເອົາໃຈໃສ່ເປັນພິເສດຕໍ່ການກໍ່ສ້າງຊົນນະບົດໃໝ່, ການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ.
ແລະ ກໍ່ໃນຕອນເຊົ້າວັນທີ 25/3, ທ່ານນາຍົກລັດຖະມົນຕີຫງວຽນເຕີນຢຸງ ໄດ້ເຂົ້າຮ່ວມພິທີເລີ່ມລົງມືກໍ່ສ້າງໂຄງການໜ່ວຍປະສົມເຕັກໂນໂລຊີສູງຊາມຊູງທາຍງວຽນ ດ້ວຍຈຳນວນເງິນລົງທຶນ 3,2 ຕື້ໂດລາສະຫະລັດ ແລະ ທ່ານໄດ້ໄປທະຫວາຍທູບທຽນບັນດານັກວິລະຊົນ, ນັກຮົບເສຍສະຫຼະຊີວິດເພື່ອຊາດຢູ່ອະນຸສາວະລີບັນດາຊາວໜຸ່ມຕະລຸມບອນກອງຮ້ອຍ 915 ຊື່ງໄດ້ເສຍສະຫຼະຊີວິດຢູ່ທາຍງວຽນ.