(VOVWORLD) - ວັນທີ 21 ພຶດສະພາ, ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ສົ່ງຈົດໝາຍອວຍພອນພໍ່ແມ່ປະຊາຊົນ ແລະ ນັກຮົບໃນທົ່ວປະເທດ ເນື່ອງໃນໂອກາດວັນມູນເຊື້ອແຫ່ງການປ້ອງກັນ, ຕ້ານໄພທຳມະຊາດ ຫວຽດນາມ ຄົບຮອບ 75 ປີ (22/05/1946 – 22/05/2021).
 ທ່ານປະທານປະເທດ ຫວຽດນາມ ຫງວຽນຊວັນຟຸກ (ພາບ: TTXVN) |
ໃນຈົດໝາຍ, ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ສົ່ງຄຳອວຍພອນອັນດີງາມມາຍັງພໍ່ແມ່ປະຊາຊົນ, ສະຫາຍ ແລະ ນັກຮົບໃນທົ່ວປະເທດ ພ້ອມດ້ວຍພະນັກງານ, ລັດຖະກອນ, ພາລະກອນ, ຊາວຜູ້ອອກແຮງງານທີ່ເຮັດວຽກງານປ້ອງກັນ, ຕ້ານໄພທຳມະຊາດລຸ້ນຕ່າງໆ. ທ່ານກໍເນັ້ນໜັກວ່າ, ໃນຊຸມປີຜ່ານມາ, ຫວຽດນາມ ນັບມື້ນັບເປັນເຈົ້າການໃນການປະຕິບັດວຽກງານປ້ອງກັນ, ຮັບມື ແລະ ແກ້ໄຂຜົນຮ້າຍຢ້ອນຫຼັງໂດຍໄພທຳມະຊາດກໍ່ຂຶ້ນ, ປະກອບສ່ວນປົກປ້ອງການດຳລົງຊີວິດຂອງປະຊາຊົນ ແລະ ບັນດາຜົນງານໃນການພັດທະນາເສດຖະກິດ - ສັງຄົມຂອງປະເທດຊາດ.
ຕໍ່ໜ້າສະພາບການປ່ຽນແປງຂອງດິນຟ້າອາກາດ, ໄພທຳມະຊາດນັບມື້ນັບມີການຜັນແປຢ່າງສັບສົນ ແລະ ຍາກທີ່ຈະຄາດຄະເນລ່ວງໜ້າໄດ້, ທ່ານປະທານປະເທດສະໜີໃຫ້ຄະນະຊີ້ນຳສູນກາງກ່ຽວກັບການປ້ອງກັນ, ຕ້ານໄພທຳມະຊາດ ຄະນະພັກ, ອຳນາດການປົກຄອງທຸກຂັ້ນ, ໝູ່ຄະນະ, ອົງການຈັດຕັ້ງມະຫາຊົນ ແລະ ປະຊາຊົນໃນທົ່ວປະເທດ ຈົ່ງສືບຕໍ່ເປັນເຈົ້າການປະຕິບັດບັນດາມາດຕະການປ້ອງກັນ, ຕ້ານໄພທຳມະຊາດ ແລະ ການກູ້ໄພກູ້ຊີບຢ່າງຄົບຊຸດ, ປະກອບສ່ວນປົກປ້ອງການດຳລົງຊີວິດຂອງປະຊາຊົນ ແລະ ການພັດທະນາແບບຍືນຍົງຂອງປະເທດຊາດ, ສະແດງໃຫ້ເຫັນພາດພົດຂອງປະເທດຫວຽດນາມ - ສະມາຊິກທີ່ຕັ້ງໜ້າ, ມີຄວາມຮັບຜິດຊອບຕໍ່ປະຊາຄົມສາກົນ ໃນບັນດາຄວາມມານະພະຍາຍາມປ້ອງກັນ, ຕ້ານໄພທຳມະຊາດ, ການປ່ຽນແປງຂອງດິນຟ້າອາກາດ.