ທ່ານປະທານາທິບໍດີມ້ຽນມາ Thein Sein ໃຫ້ການຕ້ອນຮັບ
ທ່ານປະທານປະເທດຫວຽດນາມ ເຈືອງເຕີ້ນຊາງ (ພາບ: TTXVN)
|
Vovworld-ວັນທີ 30/11, ໃນຂອບເຂດການຢ້ຽມຢາມທາງລັດຖະກິດເຖິງປະເທດ ມ້ຽນມາ, ທ່ານປະທານປະເທດ ຫວຽດນາມ ເຈືອງເຕີ້ນຊາງ ໄດ້ຕ້ອນຮັບປະທານສະພາສູງ ມ້ຽນມາ Khin Aung Myint ແລະ ປະທານສະພາຕຳ່ Thura Swe Mann ຢູ່ ນະຄອນຫລວງ Nay Pi Taw. ຕອນບ່າຍວັນດຽວກັນ, ທ່ານປະທານປະເທດ ເຈືອງເຕີ້ນຊາງ ໄດ້ໄປຢ້ຽມຢາມກຸງເກົ່າ Yangon, ເຂົ້າຮ່ວມ ແລະ ກ່າວຄຳເຫັນທີ່ເວທີປາໄສນັກທຸລະກິດ ຫວຽດນາມ ແລະ ມ້ຽນມາ, ຢ້ຽມຢາມສຳນັກງານທະນາຄານລົງທຶນ ແລະ ພັດທະນາ ຫວຽດນາມ ແລະ ສະຫະສະມາຄົມບັນດານັກລົງທຶນ ຫວຽດນາມ ຢູ່ ມ້ຽນມາ, ໃຫ້ການຕ້ອນຮັບຜູ້ວ່າການເຂດ Yanggun Myint Swe. ທີ່ການຕ້ອນຮັບປະທານສະພາສູງ ແລະ ປະທານສະພາຕຳ່ມ້ຽນມາ, ທ່ານປະທານປະເທດ ເຈືອງເຕີນຊາງ ຢືນຢັນວ່າ: ຫວຽດນາມ ພ້ອມແລ້ວແບ່ງປັນ ບັນດາບົດຮຽນກ່ຽວກັບການສ້າງກົດໝາຍ ກັບມ້ຽນມາ, ພິເສດແມ່ນກົດໝາຍຮັບໃຊ້ການເປີດປະຕູອອກສູ່ພາຍນອກ, ພັດທະນາເສດຖະກິດ. ທ່ານປະທານສະພາສູງ ແລະ ສະພາຕຳ່ມ້ຽນມາ ເຫັນດີຈະລົງນາມໃນຂໍ້ຕົກລົງການຮ່ວມມືສອງຝ່າຍກັບ ສະພາແຫ່ງຊາດ ຫວຽດນາມ ໂດຍໄວ, ສ້າງບັນດາຫນ່ວຍສະມາຊິກສະພາແຫ່ງຊາດມິດຕະພາບ, ເພີ່ມທະວີການພົບປະແລກປ່ຽນບົດຮຽນໃນວຽກງານລະຫວ່າງບັນດາອົງການວິຊາສະເພາະ ແລະ ສົມທົບຕິດຕາມກວດກາການປະຕິບັດບັນດາຂໍ້ຕົກລົງ ແລະ ໂຄງການຮ່ວມມືລະຫວ່າງສອງລັດຖະບານ, ສືບຕໍ່ຮ່ວມມືໃນບັນດາເວທີປາໄສພາກພື້ນ ແລະ ສາກົນ.
ກ່ອນຫນ້ານັ້ນ, ຕອນບ່າຍວັນທີ 29/11, ທ່ານປະທານປະເທດຫວຽດນາມ ເຈືອງເຕີ້ນຊາງໄດ້ເລີ່ມຕົ້ນການຢ້ຽມຢາມທາງລັດຖະກິດປະເທດ ສ.ສະຫະພາບມ້ຽນມາ ຕາມຄຳເຊີນຂອງປະທານາທິບໍດີມ້ຽນມາ Thein Sein . ພາຍຫຼັງພິທີຕ້ອນຮັບ, ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ມີການພົບປະ ກັບປະທານາ ທິບໍດີມ້ຽນມາ Thein Sein. ຕໍ່ຈາກນັ້ນ, ທ່ານປະທານປະເທດຫວຽດນາມ ເຈືອງເຕີ້ນຊາງ ແລະ ປະທານາທິບໍດີມ້ຽນມາ Thein Sein ໄດ້ນຳໜ້າຄະນະຜູ້ແທນ ຂັ້ນສູງຂອງ 2 ປະເທດດຳເນີນການເຈລະຈາ. ການນຳ ທັງ 2 ທ່ານຕ່າງກໍໄດ້ເນັ້ນໜັກເຖິງຄວາມຈຳເປັນເພີ່ມທະວີການແລກປ່ຽນຄະນະຜູ້ແທນ ແລະ ພົບປະໃນຂັ້ນຕ່າງໆກໍຄືການພົວພັນແລກປ່ຽນປະຊາຊົນ ແນໃສ່ຮັດແໜ້ນຄວາມໄວ້ເນື້ອເຊື່ອໃຈ ແລະ ເຂົ້າໃຈຊຶ່ງກັນ ແລະ ກັນ. ທ່ານປະທານປະເທດຫວຽດນາມ ເຈືອງເຕີ້ນຊາງ ແລະ ທ່ານປະທານາທິບໍດີມ້ຽນມາ Thein Sein ໄດ້ເປັນເອກະສັນກັນຄວນຍູ້ແຮງບັນດາການເຄື່ອນໄຫວສົ່ງເສີມການຄ້າລະຫວ່າງ 2 ປະເທດ. ພ້ອມກັນນັ້ນ, ກໍເພີ່ມທະວີ ແລະ ເປີດກ້ວາງການຮ່ວມມືໃນຫຼາຍຂົງເຂດຄື ກະສີກຳ-ປ່າໄມ້-ການປະມົງ, ຄົມມະນາຄົມຂົນສົ່ງ, ຂຸດຄົ້ນແຮ່ທາດ ແລະ ອື່ນໆ
ກ່ຽວກັບບັນດາບັນຫາພາກພື້ນ ແລະ ສາກົນ, ການນຳທັງ 2 ທ່ານຢືນຢັນວ່າ ຫວຽດນາມ ແລະ ມ້ຽນມາຈະສືບຕໍ່ຮ່ວມມື ແລະ ສົມທົບກັນຢ່າງແໜ້ນແຟ້ນຢູ່ ບັນດາເວທີປາໄສຮ່ວມມືຫຼາຍຝ່າຍກໍຄືສະໜັບສະໜູນກັນອອກສະໝັກຮັບ ເລືອກຕັ້ງເຂົ້າເປັນສະມາຊິກບັນດາອົງການໃນພາກພື້ນ ແລະ ສາກົນ.
ກ່ຽວກັບບັນຫາທະເລຕາເວັນອອກ, ການນຳທັງ 2 ທ່ານໄດ້ເປັນເອກະສັນກ່ຽວກັບທັດສະນະຄວນຮັກສາສັນຕິພາບ, ສະຖຽນລະພາບ, ຄວາມສະຫງົບປອດໄພໃນການເດີນເຮືອຢູ່ທະເລຕາເວັນອອກ; ແກ້ໄຂການພິພາດກັນໂດຍສັນຕິວິທີບົນພື້ນຖານເຄົາລົບກົດໝາຍສາກົນ, ພິເສດແມ່ນສົນທິສັນຍາຂອງ ສ.ປ.ຊ ກ່ຽວກັບກົດໝາຍທະເລປີ 1982(UNCLOS).
ທ່ານປະທານປະເທດຫວຽດນາມ ເຈືອງເຕີ້ນຊາງ ແລະ ທ່ານປະທານາທິ ບໍດີມ້ຽນມາ Thein Seinໄດ້ເປັນສັກຂີພິຍານພິທີລົງນາມໃນເອກະສານຮ່ວມມື 3 ສະບັບ, ຊຶ່ງລວມມີ : ບົດບັນທຶກຊ່ວຍຈຳກ່ຽວກັບການແລກປ່ຽນຂໍ້ມູນຂ່າວສານການກວດກາ , ຕິດຕາມກວດກາທະນາທະນາຄານລະຫວ່າງທະນາຄານແຫ່ງລັດຫວຽດນາມ ແລະ ທະນາຄານແຫ່ງລັດມ້ຽນມາ, ສັນຍາຮ່ວມມືລະຫວ່າງທາງດ້ານນ້ຳມັນອາຍແກັດລະຫວ່າງກຸ່ມບໍລິສັດນ້ຳມັນອາຍແກັດຫວຽດນາມ ແລະ ກະຊວງພະລັງງານມ້ຽນມາ ແລະ ສັນຍາຮ່ວມມືລະຫວ່າງຫ້ອງການການຄ້າ ແລະ ອຸດສາຫະກຳຫວຽດນາມ ກັບ ຫ້ອງການການຄ້າ ແລະ ອຸດສາຫະກຳມ້ຽນມາ.
ພາຍຫຼັງການເຈລະຈາ, ທ່ານປະທານປະເທດຫວຽດນາມ ເຈືອງເຕີ້ນຊາງ ແລະ ທ່ານປະທານາທິບໍດີມ້ຽນມາ Thein Seinໄດ້ມີການພົບປະກັບນັກຂ່າວ. ປະທານາທິບໍດີມ້ຽນມາ Thein Sein ກ່າວວ່າ :
“ຫວຽດນາມ ແລະ ມ້ຽນມາຕ່າງກໍແມ່ນສະມາຊິກອາຊຽນ ແລະ ມີສາຍພົວພັນມິດຕະພາບມາແຕ່ດົນນານ. ພິເສດ 2 ຝ່າຍບໍ່ມີສິ່ງກິດຂວາງແຕ່ຢ່າງໃດ. ນີ້ແມ່ນພື້ນຖານທີ່ສຳຄັນເພື່ອຊຸກຍູ້ການຮ່ວມມືລະຫວ່າງ 2 ຝ່າຍ. ຫວຽດນາມ ແລະ ມ້ຽນມາ ມີ 12 ຂົງເຂດຮັບບຸລິມະສິດໃນການຮ່ວມມືຄື ກະສີກຳ, ປູກຕົ້ນໄມ້ອຸດສາຫະກຳ, ສິນໃນນ້ຳ, ທະນາຄານ-ການເງິນ, ການບິນ, ໂທລະຄົມ ....ຂົງເຂດເຫຼົ່ານີ້ໄດ້ຮັບຄວາມເປັນເອກະສັນກັນຈາກ 2 ຝ່າຍນັບແຕ່ເດືອນ 4/2010. ຂ້າພະເຈົ້າເຊື່ອແ່ນວ່າ 2 ຝ່າຍຈະບັນລຸບັນດາໝາກຜົນໃນການຮ່ວມມືອັນດີງາມໃນຂົງເຂດເສດຖະກິດ ”
ສ່ວນ ທ່ານປະທານປະເທດຫວຽດນາມ ເຈືອງເຕີ້ນຊາງ ເນັ້ນໜັ້ກວ່າ :
“ ທາງດ້ານເສດຖະກິດການຄ້າ ແລະ ການລົງທຶນ ຄືປະທານາທິບໍດີມ້ຽນມາ Thein Seinໄດ້ເວົ້າວ່າແມ່ນມີ 12 ຂົງເຂດຮັບບຸລິມະສິດຊຶ່ງລັດຖະບານຂອງ 2 ປະເທດໄດ້ຕົກລົງນຳກັນ, ຈະໄດ້ຮັບການຍູ້ແຮງໃນກ່ວາອີກໃນໄລຍະທີ່ຈະມາເຖິງ. ບົນຈິດໃຈຄວາມຮັກແພງອ້າຍນ້ອງ, 2 ຝ່າຍໄດ້ຊ່ວຍເຫຼືອຊຶ່ງກັນ ແລະ ກັນເພື່ອພ້ອມກັນພັດທະນາ. ໃນຂົງເຂດພົວພັນຕ່າງປະເທດ, ພວກເຮົາໄດ້ປຶກສາຫາລືນຳກັນ ຈະສົມທົບກັນຢ່າງແໜ້ນແຟ້ນຢູ່ບັນດາເວທີປາໄສພາກພື້ນ ແລະ ສາກົນ ”