ທ່ານເລຂາທິການໃຫຍ່ຫງວຽນຟູ໋ຈ້ອງໃຫ້ການຕ້ອນຮັບເລຂາຄະນະພັກເຂດປົກຄອງດ້ວຍຕົນເອງຈວາງ
(ພາບ: TTXVN)
(vovworld) - ທີ່ການຕ້ອນຮັບທ່ານ ເປິ໋ງຈິງຄວາ, ເລຂາຄະນະພັກເຂດປົກຄອງດ້ວຍຕົນເອງຊົນເຜົ່າຈວາງ, ແຂວງກວາງສີ, ໃນຕອນບ່າຍວັນທີ 27/4, ຢູ່ສຳນັກງານສູນກາງພັກ, ທ່ານ ຫງວຽນຟູ໋ຈ້ອງ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ຕີລາຄາສູງບັນດາຜົນງານທີ່ຕັ້ງໜ້າ ແລະ ການພັດທະນາຢ່າງແຮງ, ແທດຈິງໃນການພົວພັນມິດຕະພາບ, ການຮ່ວມມືຮອບດ້ານລະຫວ່າງແຂວງ ກວາງສີ ກັບບັນດາທ້ອງຖິ່ນຂອງ ຫວຽດນາມ ໃນໄລຍະຜ່ານມາ. ທ່ານເລຂາທິການໃຫຍ່ຢືນຢັນວ່າ, ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ຖືເປັນສຳຄັນການປັບປຸງ ແລະ ເພີ່ມທະວີການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານກັບພັກ, ລັດ ແລະ ປະຊາຊົນຈີນ; ເນັ້ນໜັກເຖິງທີ່ຕັ້ງສຳຄັນຂອງ ກວາງສີ ໃນການພົວພັນລະຫວ່າງ ຫວຽດນາມ - ຈີນ, ທ່ານສະເໜີວ່າ, ໃນໄລຍະຈະມາເຖິງ, ແຂວງກວາງສີ ແລະ ບັນດາທ້ອງຖິ່ນຂອງ ຫວຽດນາມ ຄວນສຸມໃສ່ຜັນຂະຫຍາຍບັນດາຄວາມຮັບຮູ້ລວມລະຫວ່າງການນຳຂັ້ນສູງສອງພັກ, ສອງລັດຢ່າງມີປະສິດທິຜົນ, ຍູ້ແຮງ ແລະ ຍົກສູງປະສິດທິຜົນແຫ່ງການຮ່ວມມືໃນຂົງເຂດຕ່າງໆ, ປະກອບສ່ວນແທດຈິງເຂົ້າໃນການຊຸກຍູ້ການພົວພັນ ຫວຽດນາມ - ຈີນໃຫ້ພັດທະນາສະຖຽນລະພາບ ແລະ ຈົບງາມຢ່າງບໍ່ຢຸດຢັ້ງ.
ສ່ວນທ່ານ ເປິ໋ງຈິງຄວາ ກໍ່ຢືນຢັນວ່າ, ພັກ, ອຳນາດການປົກຄອງ ແລະ ປະຊາຊົນເຂດປົກຄອງດ້ວຍຕົນເອງຊົນເຜົ່າ ຈວາງ, ແຂວງກວາງສີ ຖືເປັນສຳຄັນການພັດທະນາການພົວພັນມິດຕະພາບທີ່ເປັນມູນເຊື້ອກັບ ຫວຽດນາມ ແລະ ປາດຖະໜາຢາກພ້ອມກັບບັນດາແຂວງຊາຍແດນ ຫວຽດນາມ ເພີ່ມທະວີການເຊື່ອມຕໍ່ເສດຖະກິດ, ການຮ່ວມມືຢ່າງແທດຈິງໃນຂົງເຂດຕ່າງໆ, ມານະພະຍາຍາມກໍ່ສ້າງເສັ້ນຊາຍແດນສັນຕິພາບ, ມິດຕະພາບ, ສະຖຽນລະພາບ ແລະ ວັດທະນາຖາວອນ, ປະກອບສ່ວນຊຸກຍູ້ການພົວພັນລະຫວ່າງສອງພັກ, ສອງລັດຫວຽດນາມ - ຈີນ ໃຫ້ນັບມື້ນັບພັດທະນາຢ່າງຈົບງາມ.