ທ່ານນາຍົກລັດຖະມົນຕີ ຍີ່ປຸ່ນ Shinzo Abe ແລະ
ທ່ານປະທານາທິບໍດີ ລັດເຊຍ Vladimir Putin
(ພາບ: Ria Novosti)
(vovworld) - ວັນທີ 22/01, ທ່ານນາຍົກລັດຖະມົນຕີ ຍີ່ປຸ່ນ Shinzo Abe ແລະ ທ່ານປະທານາທິບໍດີ ລັດເຊຍ Vladimir Putin ມີການໂອ້ລົມທາງໂທລະສັບກ່ຽວກັບບັນດາບັນຫາລະຫວ່າງ 2 ປະເທດ ກໍ່ຄືໃນໂລກ. ການນຳ 2 ທ່ານໄດ້ເຫັນດີເປັນເອກະສັນຈະດຳເນີນການຢ້ຽມຢາມບໍ່ເປັນທາງການຂອງທ່ານ Shinzo Abe ເຖິງ ລັດເຊຍ, ຫລັງຈາກນັ້ນ ທ່ານ Putin ຈະຢ້ຽມຢາມ ຍີ່ປຸ່ນ. ກ່ອນໜ້ານັ້ນ, ທີ່ການພົບປະເຈລະຈາຢູ່ ຕວກກີ ໃນເດືອນ 11 ປີ 2014, ທ່ານປະທານາທິບໍດີ Putin ສະແດງແນວຄວາມຄິດຢາກເຊີນທ່ານ Shinzo Abe ມາຢ້ຽມຢາມນະຄອນໜຶ່ງຂອງ ລັດເຊຍ ຢູ່ຊານກຳແພງນະຄອນ ມົດສະກູ.
ທ່ານນາຍົກລັດຖະມົນຕີ Shinzo Abe ແລະ ທ່ານປະທານາທິບໍດີ Putin ເຫັນດີເປັນເອກະພາບນຳກັນວ່າ ລັດຖະບານ 2 ປະເທດຈະຈັດຕັ້ງການປະຊຸມຂັ້ນລັດຖະມົນຕີຊ່ວຍວ່າການໃນເດືອນ 2 ຈະມາເຖິງຢູ່ນະຄອນຫລວງ ໂຕກຽວ ເພື່ອ ກະກຽມໃຫ້ການພົບປະຄັ້ງຕ່າງໆຂອງການນຳ 2 ທ່ານ. ແລະກໍ່ໃນການໂອ້ລົມທາງໂທລະສັບ, ການນຳ 2 ທ່ານໄດ້ເຫັນດີຮ່ວມມືກັນຢູ່ສະພາຄວາມໝັ້ນຄົງສະຫະປະຊາຊາດໃນການຮັບມືກັບເຫດທົດລອງນິວເຄຼຍຂອງ ສປປ ເກົາຫຼີ ເມື່ອໃນຕົ້ນເດືອນນີ້. ນອກຈາກນັ້ນ, ໃນການໂອ້ລົມທາງໂທລະສັບ, ການນຳ 2 ທ່ານກໍ່ໄດ້ແລກປ່ຽນທັດສະນະກ່ຽວກັບສະພາບການຢູ່ຕາເວັນອອກກາງ, ໃນນັ້ນມີການເສິກກາງເມືອງຢູ່ ຊີຣີ ແລະ ວິກິດການຢູ່ ຢູແກຼນ.