ທິດເຄື່ອນຂອງພາຍຸ Mujegae |
(vovworld)- ຕອນເຊົ້າວັນທີ 3/10 ຢູ່ຮ່າໂນ້ຍ, ຫ້ອງການຊີ້ນຳສູນກາງກ່ຽວກັບການປ້ອງກັນ ແລະ ຕ້ານໄພທຳມະຊາດ ໄດ້ໂຮມປະຊຸມປຶກສາຫາລືກ່ຽວກັບການຮັບມືກັບພາຍຸ Mujegae . ຢູ່ທີ່ນີ້, ຄະນະຊີ້ນຳໄດ້ເນັ້ນໜັກເຖິງວຽກງານຈຸດສຸມໃນປະຈຸບັນ ແມ່ນສຸມໃສ່ຮຽກຮ້ອງໃຫ້ເຮືອ, ກຳປັ່ນຈົ່ງຍົກຍ້າຍອອກຈາກເຂດທີ່ອັນຕະລາຍ. ໄລ່ຮອດເວລາ 6 ໂມງເຊົ້າວັນທີ 3/10, ກຳລັງປ້ອງກັນຊາຍແດນບັນດາແຂວງ, ນະຄອນແຄມທະເລຈາກ ກວາງນິງລົງຮອດ ແຄ້ງຮ່ວາ ໄດ້ສົມທົບກັບທ້ອງຖິ່ນ, ບັນດາຄອບຄົວເຈົ້າຂອງເຮືອ, ກັບຕັນ ເພື່ອຊີ້ນຳບັນດາຍານພາຫະນະ, ເຮືອ, ກຳປັ່ນ, ຮາກຖານລ້ຽງປູກສິນໃນນ້ຳ ຮັບຊາບກ່ຽວກັບສະພາບພາຍຸເພື່ອເປັນເຈົ້າການຫຼົບຫຼີກ. ທ່ານເຈີນກວາງຮ່ວາຍ ຮອງຫົວໜ້າກົມໃຫຍ່ຊົນລະປະທານ, ກະຊວງກະສີກຳ ແລະ ພັດທະນາຊົນນະບົດຫວຽດນາມກ່າວວ່າ :
“ ຫ້ອງການປະຈຳວຽກງານໄດ້ກະຕຸກຊຸກຍູ້ບັນດາທ້ອງຖິ່ນເພີ່ມທະວີການແຈ້ງຂ່າວເຖິງປະຊາຊົນ. ສະເໜີບັນດາທ້ອງຖິ່ນໃນເຂດຮັບຜົນສະທ້ອນ ໄດ້ຮັບຂໍ້ມູນຂ່າວສານ, ຕິດຕາມກວດກາບັນດາຍານພາຫະນະເຄື່ອນໄຫວບົນທະເລ, ກຽມພ້ອມບັນດາພາຫະນະກູ້ໄພກູ້ຊີບເມື່ອສະພາບທີ່ບໍ່ດີເກີດຂຶ້ນ. ບັນດາເຂດລ້ຽງປູກສິນໃນນ້ຳຢູ່ແຄມທະເລຄວນເອົາໃຈໃສ່ເປັນພິເສດ. ຢູ່ດິນຕໍ່ແຜ່ນ, ຕິດຕາມການຜັນແປຂອງພາຍຸນ້ຳຖ້ວມ, ກະກຽມວິທີການແກ້ໄຂຢ່າງທັນການ”