(vovworld) – ເລື່ອງ ຈີນ ຕັ້ງຮ້ານເຈາະນ້ຳມັນ ໄຮຢາງ - 981 ຢ່າງຜິດກົດໝາຍໃນເຂດນ່ານທະເລ ຫວຽດນາມ ສືບຕໍ່ກໍ່ໃຫ້ເກີດບັນດາປະຕິກິລິຍາຢ່າງຮຸນແຮງໃນປະຊາຄົມໂລກ. ທີ່ການພົບປະເພື່ອແນໃສ່ແບ່ງປັນບັນດາຂໍ້ມູນຂ່າວສານ ແລະ ການຜັນແປໄລຍະມໍ່ໆມານີ້ຢູ່ທະເລຕາເວັນອອກ, ໂດຍສະຫະພັນບັນດາອົງການມິດຕະພາບ ຫວຽດນາມ ຈັດຕັ້ງໃນຕອນເຊົ້າວັນທີ 13/5, ຢູ່ຮ່າໂນ້ຍ, ບັນດາສ່ວນບຸກຄົນ, ອົງການສາກົນ, ຜູ້ຕາງໜ້າບັນດາອົງການບໍ່ຂຶ້ນກັບລັດຖະບານຕ່າງປະເທດຢູ່ ຫວຽດນາມ, ລ້ວນແຕ່ສະແດງການສະໜັບສະໜູນ ຫວຽດນາມ, ສະໜັບສະໜູນຫຼັກໝັ້ນເດັດດຽວປົກປັກຮັກສາອະທິປະໄຕຜືນແຜ່ນດິນອັນຄົບຖ້ວນຂອງ ຫວຽດນາມ.
ບັນດາຄຳອະທິບາຍໂດຍບັນດານັກບັນລະຍາຍ ຫວຽດນາມ ຍົກອອກມາແມ່ນອີງໃສ່ຂໍ້ມາດຕາຕ່າງໆຂອງກົດບັດ ສປຊ, ສົນທິສັນຍາສາກົນກ່ຽວກັບກົດໝາຍວ່າດ້ວຍທະເລປີ 1982 ແລະ ເອກະສານນິຕິກຳທີ່ກ່ຽວຂ້ອງຫຼາຍສະບັບໄດ້ຢັ້ງຢືນວ່າ: ຈີນໄດ້ລະເມີດຢ່າງເປີດແປນບັນດາຂໍ້ກຳນົດຂອງກົດໝາຍສາກົນ, ລະອຽດແມ່ນສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982, ລະເມີດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ, ໄປຝືນກັບເນື້ອໃນຈິດໃຈຂໍ້ຕົກລົງຂັ້ນສູງລະຫວ່າງ 2 ປະເທດ....
ພາຍຫຼັງໄດ້ຮັບຂ່າວຈາກບັນດານັກບັນລະຍາຍ, ບັນດາສ່ວນບຸກຄົນ, ອົງການຈັດຕັ້ງສາກົນ, ຜູ້ຕາງໜ້າບັນດາອົງການບໍ່ຂຶ້ນກັບລັດຖະບານຕ່າງປະເທດປະຈຳ ຫວຽດນາມ, ຕີລາຄາສູງບັນດາແຫຼ່ງຂ່າວຂອງບັນດານັກຮຽນຮູ້ ຫວຽດນາມ. ທ່ານນາງ Kim Young Shin, ຮອງຜູ້ອຳນວຍການສູນພົວພັນແລກປ່ຽນວັດທະນະທຳ ຫວຽດນາມ - ສ ເກົາຫຼີ ໃຫ້ຮູ້ວ່າ:
“ປະຊາຊົນ ສ. ເກົາຫຼີ ພວກຂ້າພະເຈົ້າຂໍແບ່ງປັນບັນດານ້ຳໃຈຄວາມຮັກແພງປະຊາຊົນ ຫວຽດນາມ. ຜ່ານການພົບປະຄັ້ງນີ້, ຊາວຕ່າງປະເທດທີ່ພວມດຳລົງຊີວິດ ແລະ ເຮັດວຽກຢູ່ ຫວຽດນາມ ຄືພວກຂ້າພະເຈົ້າມີແຫຼ່ງຂ່າວກ່ຽວກັບການຜັນແປພວມເກີດຂຶ້ນຕື່ມອີກ. ປະຈຸບັນ, ຫວຽດນາມ ພວມຕັ້ງໜ້າຮຽກຮ້ອງການສະໜັບສະໜູນຂອງປະຊາຄົມໂລກ. ນີ້ແມ່ນມາດຕະການດ້ານການທູດສຳຄັນ, ແຕ່ວ່າເພື່ອໃຫ້ວຽກງານນີ້ມີປະສິດທິຜົນຕື່ມອີກ, ຂ້າພະເຈົ້າຖືວ່າ: ຫວຽດນາມ ຄວນສ້າງແວບໄຊດ້ວຍຫຼາຍພາສາ, ຮວບຮ່ວມຄຳເຫັນຂອງທັງຊາວ ຫວຽດນາມ ແລະ ຊາວຕ່າງປະເທດ. ຖ້າຫາກເຜີຍແຜ່ບັນດາແຫຼ່ງຂ່າວນີ້ ໄດ້ສ້າງເງື່ອນໄຂອັນໃຫຍ່ຫຼວງໃຫ້ ຫວຽດນາມ ໂຄສະນາເຜີຍແຜ່ອອກສູ່ໂລກ”
ສ່ວນທ່ານ Greig Craft, ອະດີດປະທານກອງທຶນປ້ອງກັນ, ຕ້ານບາດເຈັບ, ລົ້ມຕາຍ ອາຊີ ຖືວ່າ ຫວຽດນາມ ບໍ່ເວັນເສຍກໍລະນີນຳເຫດການນີ້ຂຶ້ນຕໍ່ສະພາຄວາມໝັ້ນຄົງ ສປຊ:
“ຂ້າພະເຈົ້າຖືວ່າ: ແນ່ນອນວ່ານີ້ແມ່ນບາດກ້າວສຳຄັນ ແລະ ມີປະສິດທິຜົນ ຍ້ອນວ່າ ສປຊ ແມ່ນອົງການມີຈຳນວນປະເທດສະມາຊິກຫຼາຍ ແລະ ເມື່ອ ຫວຽດນາມ ອອກສຽງຄັດຄ້ານຈະໄດ້ຮັບຄວາມເອົາໃຈໃສ່ຂອງຫຼາຍປະເທດ. ເມື່ອປະເທດໜຶ່ງມີການກະທຳເກາະຜິດຢູ່ຊາຍແດນຂອງຕົນ ແນ່ນອນວ່າຈະໄດ້ຮັບປະຕິກິລິຍາໂຕ້ຕອບ.”
ຜູ້ຕາງໜ້າບັນດາອົງການບໍ່ຂຶ້ນກັບລັດຖະບານຕ່າງປະເທດຫຼາຍທ່ານກໍ່ໄດ້ສະແດງຄວາມເຫັນດີເຫັນພ້ອມກັບວິທີປະຕິກິລິຍາຂອງ ຫວຽດນາມ ໃນປະຈຸບັນ ຕໍ່ໜ້າການກະທຳຂອງຈີນ. ທ່ານນາງ Elizabeth, ສັງກັດອົງການບໍ່ຂຶ້ນກັບລັດຖະບານຂອງ ອົດສະຕາລີ ປະຈຳ ຫວຽດນາມ, ໃຫ້ຮູ້ວ່າ:
“ປະຊາຄົມໂລກລ້ວນແຕ່ຢືນຢັນວ່າ: ບັນດາຝ່າຍທີ່ກ່ຽວຂ້ອງຕ້ອງນຳໃຊ້ມາດຕະການທາງດ້ານການທູດຕ່າງໆເພື່ອແກ້ໄຂສະພາບການສັບສົນໃນປະຈຸບັນ. ຂ້າພະເຈົ້າຖືວ່າ: ຫວຽດນາມ ພວມມີວິທີແກ້ໄຂເໝາະສົມ, ໂດຍຜ່ານທາງການທູດກັບ ອາຊຽນ. ຂ້າພະເຈົ້າຄິດວ່າ: ດ້ວຍຖານະເປັນອົງການບໍ່ຂຶ້ນກັບລັດຖະບານປະຈຳ ຫວຽດນາມ, ຂ້າພະເຈົ້າສະໜັບສະໜູນວິທີນີ້ຂອງ ຫວຽດນາມ.”